మనమేంటో పరిచయం చేస్తా… తెలంగాణ ‘కల్చరల్ ముద్రల’తో అమెరికా శిక్షణకు…

అనుకోకుండా అమెరికా లాంటి దేశాలకు వెళ్లాల్సి వస్తే…? ఇక్కడి మట్టి వాసన, ఛాయలు ఏమీ కనిపించకుండా అత్యంత ఆధునికులం మేమే అన్నట్టుగా వెళ్తాం కదా… కానీ ఈయన వేరు… అమెరికా ప్రభుత్వం ప్రపంచవ్యాప్తంగా ఎంపిక చేసిన యాభై మంది ఉపాధ్యాయుల్లో మన హనుమకొండ జిల్లా ఐనవోలు హైస్కూల్ లో ఇంగ్లీష్ చెప్పే డాక్టర్ కోలా రవికుమార్… ఏమేం తీసుకెళ్తున్నారు, లిమిటెడ్ లగేజ్ తీసుకెళ్లండి అని సూచించాను…

 

దానికి ఆయన చెప్పిన లగేజ్ జాబితాకు నోరు వెళ్ళబెట్టాల్సి వచ్చింది… మన అంతరిక్ష యాత్రికుడు రాకేష్ శర్మను అప్పటి ప్రధాని ఇందిరా గాంధీ అంతరిక్షం నుంచి మన దేశం ఎలా కనిపిస్తుందని అడిగితే, మేరా భారత్ మహాన్ అని సమాధానం ఇచ్చారట. మన ఊరు దేశం పవిత్రమైనవి అని ఆ వ్యాఖ్యకు అర్థం… సేమ్, తెలంగాణ సంస్కృతిని ప్రతిబింబించేలా రుమాలు, దువ్వెన, కుంకుమ, దసరా పండుగ నాడు ఆరాధించే దుర్గ మాత తేలిక పాటి బొమ్మ, చేర్యాల నకాషీ చిత్రం, దసరా నాడు బంగారంగా పిలిచే జమ్మి పత్రి, సిరిసిల్ల నుంచి అగ్గిపెట్టెలో పట్టే చీర, నిర్మల్ కొయ్యబొమ్మ, రేపు పౌర్ణమినాడు కట్టుకునే రాఖీలు, ఢమరుకం, గంగా జలం, బుద్దుడి బొమ్మ, పెన్నులు, పెన్సిళ్లు… ఇవీ ఆయన తీసుకుపోతున్న సామగ్రి…

 

కానీ ఎందుకిలా..? ‘‘నాలుగు నెలలు ఉంటానక్కడ… మన పండుగలు, మన సంస్కృతి, మన మట్టి, మన సొసైటీ గుర్తులను తీసుకువెళ్తున్నా… అక్కడ మన పండుగల ప్రాముఖ్యత చెబుతా, రాఖీలు కట్టిస్తా, అక్కడి పద్ధతులు తెలుసుకుంటా, మన గురించి చెబుతా… అగ్గిపెట్టెలో చీరలోని నేత సామర్థ్యం, నకాషీ చిత్రంలోని పెయింటింగ్ నైపుణ్యం ఎట్సెట్రా వాళ్లకూ తెలియాలి కదా మరి’’ అంటున్నారు ఆయన…  ఇంతకీ ఆయన వెళ్లే ఆ శిక్షణ ఏమిటంటే…?