.
రామాయణం సినిమా విడుదలైన తర్వాత రావణుడి గురించి చర్చ మళ్లీ మొదలైంది. రావణుడు గొప్ప శివభక్తుడా? మహా పండితుడా? సంగీత విద్వాంసుడా? సకల విద్యాపారంగతుడా? లేక అహంకారం, అధికార దాహంతో పతనమైన రాక్షస రాజా? ఇలా రావణుడి గుణగణాలపై రకరకాల చర్చలు జరుగుతున్నాయి. కానీ ఈ చర్చల్లో చాలామంది మరిచిపోతున్న ఒక ఆసక్తికరమైన పురాణ కథ ఉంది. అసలు రావణుడు ఈ జన్మలోనే ప్రతినాయకుడిగా పుట్టాడా? అతడి వెనుక మరో జన్మ కథ ఉందా? విష్ణుమూర్తి ద్వారపాలకులైన జయవిజయులకు రావణుడితో ఉన్న సంబంధం ఏమిటి?
ఈ కథ తెలిస్తే రామాయణంలో రావణుడి పాత్రను మరో కోణంలో అర్థం చేసుకోవచ్చు. వైకుంఠంలో మొదలైన కథ.. భూలోకంలో రాక్షసులుగా జన్మ… పురాణాల ప్రకారం విష్ణుమూర్తి నివసించే వైకుంఠానికి జయుడు, విజయుడు అనే ఇద్దరు ద్వారపాలకులు ఉండేవారు. వీరిద్దరూ సామాన్యులు కాదు. సాక్షాత్తూ శ్రీమహావిష్ణువుకు అత్యంత సన్నిహితులు, ఆయన సేవలో నిరంతరం ఉండే పరిచారకులు.
Ads
ఒకరోజు బ్రహ్మదేవుడి కుమారులైన సనక, సనందన, సనాతన, సనత్కుమారులు విష్ణుమూర్తిని దర్శించుకోవడానికి వైకుంఠానికి వచ్చారు. అయితే బాలుర రూపంలో ఉన్న ఆ నలుగురు మహర్షులను గుర్తించని జయవిజయులు వారిని లోపలికి వెళ్లకుండా అడ్డుకున్నారు. దీంతో ఆగ్రహించిన కుమారులు జయవిజయులను శపించారు.
వైకుంఠంలో ఉండే అర్హత కోల్పోయి భూలోకంలో రాక్షసులుగా జన్మించాలని శాపం పెట్టారు. విష్ణుమూర్తి జోక్యంతో శాపానికి ఒక మినహాయింపు లభించింది. మూడు జన్మల తర్వాత తిరిగి వైకుంఠానికి చేరుకోవచ్చని నిర్ణయమైంది.
ఇక్కడే అసలు ఆసక్తికరమైన విషయం ఉంది. వైకుంఠం నుంచి భూలోకానికి వెళ్లిన జయవిజయులకు రెండు మార్గాలున్నాయి. ఏడు జన్మలు భగవంతుడి భక్తులుగా గడిపి తిరిగి రావడమా? లేక మూడు జన్మలు ఆయనకు శత్రువులుగా ఉండి, ఆయన చేతిలోనే మరణించి త్వరగా తిరిగి చేరుకోవడమా? జయవిజయులు రెండో మార్గాన్ని ఎంచుకున్నారని వైష్ణవ సంప్రదాయంలోని ప్రసిద్ధ కథనం చెబుతుంది.
మూడు జన్మలు.. ఆరుగురు ప్రతినాయకులు.. మూడు విష్ణు అవతారాలు … జయవిజయులు మూడు జన్మల్లో ఆరుగురు వ్యక్తులుగా జన్మించారు. ప్రతి జన్మలోనూ విష్ణుమూర్తి వేర్వేరు అవతారాల్లో వారిని సంహరించాడు.
మొదటి జన్మ: హిరణ్యాక్షుడు, హిరణ్యకశిపుడు
కృతయుగంలో జయవిజయులు దితి, కశ్యపులకు పుత్రులుగా హిరణ్యాక్షుడు, హిరణ్యకశిపుడిగా జన్మించారు. హిరణ్యాక్షుడిని విష్ణుమూర్తి వరాహ అవతారంలో సంహరించగా, హిరణ్యకశిపుడిని నరసింహ అవతారంలో అంతమొందించాడు.
రెండో జన్మ: రావణుడు, కుంభకర్ణుడు
త్రేతాయుగంలో విశ్రవసుడి కుమారులుగా రావణుడు, కుంభకర్ణుడిగా జన్మించారు. ఈసారి సాక్షాత్తూ శ్రీరాముడి చేతిలో ఇద్దరూ మరణించారు. రావణుడి అహంకారం, సీతాపహరణం, శ్రీరాముడితో యుద్ధం… చివరకు అతడి పతనానికి దారితీశాయి.
మూడో జన్మ: శిశుపాలుడు, దంతవక్త్రుడు
ద్వాపరయుగంలో శిశుపాలుడు, దంతవక్త్రుడిగా జన్మించారు. ఈ ఇద్దరినీ శ్రీకృష్ణుడు తన సుదర్శన చక్రంతో సంహరించాడు. శిశుపాలుడి వధ రాజసూయ యాగంలో జరగగా, దంతవక్త్రుడి వధ అనంతరం జయవిజయుల మూడు జన్మల శాపం పూర్తయింది. చివరకు వారు తిరిగి విష్ణుమూర్తి సన్నిధికి చేరుకున్నారు.
ఈ మూడు జన్మల కథను శ్రీమద్భాగవతంలోని మూడో, ఏడో, పదో స్కంధాలు వివరిస్తాయి.
మరి రావణుడు నిజంగా చెడ్డవాడేనా? ఇక్కడ ఒక ఆసక్తికరమైన తాత్విక ప్రశ్న ఎదురవుతుంది. జయవిజయులుగా ఉన్నప్పుడు విష్ణుమూర్తికి అత్యంత ఆప్తులైనవారే, రావణుడు, కుంభకర్ణుడిగా మారిన తర్వాత ఆయనకు బద్ధశత్రువులయ్యారు. ఒకే పూర్వజన్మ కథలో ఇంతటి వైరుధ్యం ఎందుకు?
భాగవత పురాణం చెప్పే అంతరార్థం ఏమిటంటే.. భగవంతుడితో శత్రుత్వం పెట్టుకున్నప్పటికీ, నిరంతరం ఆయన గురించే ఆలోచిస్తూ ఉండటం వల్ల కూడా జయవిజయులు చివరకు ఆయన సాన్నిధ్యానికి చేరుకున్నారు. వారి శత్రుత్వం కూడా భగవంతుడి లీలలో భాగంగానే పురాణం వివరిస్తుంది.
అయితే దీనర్థం రావణుడు చేసిన పనులన్నీ సమర్థనీయమని కాదు. సీతను అపహరించడం, తన అధికారాన్ని అడ్డుపెట్టుకుని ఇతరులను వేధించడం, తన అహంకారంతో సొంత కుటుంబాన్నే ప్రమాదంలోకి నెట్టడం.. ఇవన్నీ అతడి పతనానికి కారణమైన లక్షణాలే. పాండిత్యం, భక్తి, పరాక్రమం ఉన్నంత మాత్రాన వ్యక్తిలోని దురహంకారం మాయమైపోదని రావణుడి కథ గుర్తుచేస్తుంది…
- రామాయణంలో రావణుడిని కేవలం విలన్‌గా చూడటం ఒక కోణమైతే, అతడి వెనుక ఉన్న ఈ పూర్వజన్మ కథను తెలుసుకోవడం మరో కోణం. అందుకే భారతీయ పురాణాల్లో ఒక్కో పాత్రకు ఎన్నో పొరలు ఉంటాయి. వాటిని తెలుసుకున్నప్పుడు మనకు తెలిసిన రామాయణమే కొత్తగా కనిపిస్తుంది!
Share this Article