వారసత్వ పన్ను..! కాంగ్రెస్ ప్రాణానికి నువ్వెక్కడ దొరికావురా నాయనా…!!

ఈయన ఎక్కడో సోది మాట్లాడుతూ అమెరికాలో ఉన్న వారసత్వ పన్ను ( Inheritance Tax ) ఇండియాలో కూడా ఉంటే ఈయన మొహంలా ఉంటుందని వక్కాణించారు . అసలీ పన్ను అమెరికా అంతా లేదు . ఇది ఫెడరల్ టాక్స్ కాదు . కేవలం ఆరు రాష్ట్రాలలో ఉంది . అవి : అయోవా , కెంటుకీ , మేరీలాండ్ , నెబ్రాస్కా , న్యూజెర్సీ , పెన్సిల్వేనియా . ఇది కూడా ఒక పరిమితి దాటిన తర్వాత 1% నుండి 10% దాకా వేర్వేరు రాష్ట్రాల్లో వేర్వేరుగా ఉంది .

ఇలాంటి పన్ను మన దేశంలో ఎస్టేట్ డ్యూటీ అనే పేరుతో దేశమంతా ఉండేది . 1985 లో రాజీవ్ గాంధీ ప్రభుత్వం రద్దు చేసింది . మూలిగే నక్క మీద తాటికాయ పడ్డట్లు ఇలాంటి అనవసర , అసందర్భ ప్రేలాపనల వలన కాంగ్రెసుకు అనవసర నష్టం . నేనలా అనలేదు ; ఇలా అనలేదు అంటే భా జ పా వంటి అత్యంత బలమైన అధికార పార్టీ ఊరక ఉంటుందా ?

అసలేమీ లేకపోతేనే లేపి లేపి కొడుతుంది . అన్నాక వదలిపెడుతుందా !? ఏడ దొరుకుతార్రా నాయనా మీరందరూ ? సైధ్ధాంతిక గందరగోళం . అంతర్గత మేధోమధనం లేకపోవటమే ఇలాంటి గందరగోళానికి కారణం .

కాంగ్రెస్ పార్టీ తెలుసుకోవలసిన విషయం ఏమిటంటే ఇప్పటికిప్పుడు అధికారంలోకి రావాలనుకోవటం భ్రమే అని . ఎవడే సుబ్రమణ్యం అనే సినిమాలో కృష్ణంరాజు డైలాగ్ ఒకటి ఉంటుంది . నేను డబ్బుల కోసం పని చేయటం లేదు ; పనిచేస్తుంటే డబ్బులు వస్తున్నాయి అని . అలాగే దేశం కోసం నిఖార్సుగా పనిచేసుకుంటూ పోతుంటే అధికారం వస్తుంది . అధికారం కోసం రాజకీయ పార్టీలు పని చేయకూడదు . కాంగ్రెస్ పార్టీ సైధ్ధాంతిక గందరగోళంలో నుండి బయటపడనంత కాలం ఇలాగే ఉంటుంది . మొత్తం పార్టీని జీరో నుండి పునర్నిర్మించుకోవాలి . ఎవరికి అంత ఓపిక !?