.
Raghu Mandaati …….. థాయిలాండ్లో ప్రత్యేకమైన ఆతిధ్యాన్ని అందుకోగలిగాను ముఖ్యంగా భోజనం పూర్తయ్యాక గొప్ప విలాసవంతమైన విందు చివరగా ఒక ఐస్ క్రీమ్ తో లేదా ఫ్రూట్ బౌల్ తో పూర్తవుతుంది.
ఫ్రూట్ బౌల్ తీసుకొని తిన్నాను. ఒక విధంగా అద్భుతాన్ని రుచి చూసాననే చెప్పాలి. అయితే ఆ గుప్పెడు ఫ్రూట్ బౌల్ ఖరీదు నాలుగు వేల ఐదు వందల రూపాయలు.. నిజం.. అది చూసి నోట మాట రాలేదు.
Ads
ఎందుకంత ఖరీదు అనే ప్రశ్న, అవాక్కు, కుతుహలం వెంట వెంటనే కలిగాయి. అప్పుడు తెలుసుకున్నాను. అందులో వేసిన నాలుగైదు చిన్న చిన్న మియాజాకి మామిడి పండు ముక్కల మహత్యం గురించి..
ప్రకృతి కూడా చాలా చిత్రమైన స్వభావం అత్యంత విలువైనదానిని అత్యంత నెమ్మదిగా పెంచుతుంది.
ప్రపంచంలో మామిడిపండ్లు అనేక రకాలున్నా, కొన్ని ప్రత్యేకమైనవి. అందులో ఒకటి మియాజాకి మామిడి, ఇది కేవలం పండు మాత్రమే కాదు. ఇది విలువకు, ప్రత్యేకతకు, మరియు సహజ శ్రమకు నిలువెత్తు నిదర్శనం.
ఈ మామిడి పుట్టింది జపాన్‌లోని మియాజాకి ప్రిఫెక్చర్‌లో. కానీ దీనికి ఉన్న మహత్తు ఈ చిన్న పరిచయంతో పూర్తవదు. ఎందుకంటే, ఇది ఓ సాధారణ పండు కాదు దీనిని సన్ ఎగ్ మాంగో అని కూడా పిలుస్తారు, అంటే ఎగిరే సూర్యుడి మామిడి!
ఏది విలువైనదో, అది పెరగడానికి ఎక్కువ శ్రమపడుతుంది. అది ఒక మామిడి కాదు, అది ఓ కళాఖండం అని నేనంటాను.. సాధారణ మామిడిపండ్లకు ఇది పూర్తిగా భిన్నంగా ఉంటుంది. దీని రంగు మామూలుగా ఉండదు. గులాబీ, ఎరుపు, ఉదా రంగుల మేళవింపుతో ఒక అరుదైన అందాన్ని కలిగి ఉంటుంది. తియ్యని రుచి, నోట్లో కరిగిపోయే మృదుత్వం, కమ్మని పరిమళం… ఇవన్నీ దీనిని అత్యంత విలువైన మామిడి పండుగా మార్చాయి..
ఒక సాధారణ మామిడి చెట్టు వేలాది పండ్లను ఇస్తుంది. కానీ మియాజాకి మామిడి చెట్టుకు సంవత్సరానికి చాలా తక్కువ పండ్లు మాత్రమే వస్తాయి. ఎందుకంటే, ఇది సాధారణ పెంపక విధానాలకు భిన్నంగా, అత్యంత శ్రద్ధతో పెంచబడుతుంది.
ఇవి బలమైన ఎండలో పెరగాలి. అందుకే దీని పేరు “సన్ ఎగ్” – ఈ మామిడి పండుగానే కాదు, సూర్యుని కిరణాలను తనలో నింపుకున్న అరుదైన పండు. ఎంత ఖరీదైనా, అసలు విలువ దాని లోపలే ఉంటుంది. మీకు తెలుసా?
ఒక మియాజాకి మామిడి దాదాపు ₹2.5 లక్షల వరకు కూడా ధర పలుకుతుంది. కొన్ని వేల రూపాయలు ఇచ్చిన కూడా దొరకడం చాలా అరుదు. ప్రతి పండు ప్రత్యేకమైన గుణాలు కలిగి ఉంటేనే దానికి అత్యున్నత ధరకు అమ్ముతారు. కానీ దీనిని ఖరీదైనదిగా చూసే ముందు, దాని వెనుక ఉన్న సహజత్వాన్ని గుర్తించాలి.
మనం కేవలం ఆర్ధిక విలువతోనే కాకుండా, పెంపకం శైలిని, ప్రత్యేక రుచిని, ప్రకృతిని అర్థం చేసుకోవాలి.
మనం ఎంత ప్రయత్నించినా, ప్రకృతిని మించిన విలువను సృష్టించలేం. కళాత్మకత, సహజత్వం కలిసినప్పుడే అసలు అందం ఉద్భవిస్తుంది.
అందుకే, మియాజాకి మామిడిని గురించి విన్నప్పుడల్లా, మన జీవితాన్ని కూడా అలాగే చూడాలి. సహనంతో ఎదగాలి. సహజత్వాన్ని ఆహ్వానించాలి. విశ్వాసంతో ఎదుగుదల సాధించాలి. మియాజాకి మామిడి – ప్రకృతితో నడిచిన ఓ ప్రయాణం. అసలైన విలువ ధరలో కాదు, దాన్ని అర్థం చేసుకునే మన మనసులో ఉంటుంది.
ప్రపంచంలోని అనేక అద్భుతాలను నేను నా కెమెరాతో బంధించాను. ప్రకృతి, సంస్కృతి, మనుషుల జీవితాలను నా దృష్టితో కధలుగా మార్చాను. కానీ, కొన్ని అనుభవాలు కేవలం ఫోటోల కోసం మాత్రమే కాదనిపిస్తుంది. వాటిని అనుభవించాలి, అర్థం చేసుకోవాలి, మనసులో నిలుపుకోవాలి. మియాజాకి మామిడి కూడా నాకు అలాంటి ఓ అనుభవాన్ని ఇచ్చింది.
ఒక పండుకోసం నా ప్రయాణం…
జపాన్‌ లో మాత్రమే అరుదైన పండ్లు పెరుగుతాయి కాని థాయిలాండ్ లో చాలా అరుదుగా ఎక్కడో ఒక చోట మాత్రమే పెరుగుతాయి.. అన్ని పండ్లు అనుకున్నట్టుగా వస్తాయా అంటే చెప్పలేం, కాని ప్రకృతిని, పద్ధతిని, సహనాన్ని కొత్తగా చూడగలిగాను. నేను వెళ్లిన గ్రామంలో అక్కడి వ్యవసాయ విధానం నాకు ఆశ్చర్యాన్ని కలిగించింది. ప్రతి విత్తనానికి ఓ గౌరవం ఉంటుంది, ప్రతి పండుకు ఓ కథ ఉంటుంది. మియాజాకి మామిడి కథ కూడా అలాంటిదే.
రైతుల కష్టాన్ని, ప్రకృతిని గౌరవించే విధానాన్ని నేను చూసాను. ఓ చిన్న పండుకి అంత శ్రద్ధ అవసరమా? అని మొదట అనిపించింది. కానీ ఆ తర్వాత అది కేవలం పండు కాదు… అది ఒక ప్రాక్టీస్, ఒక కళా ప్రక్రియ, ఒక జీవన విధానం అని అర్థమైంది.
ఈ మామిడిని సాధారణంగా పెంచరు. ప్రత్యేకమైన ఎండ, తేమ, గాలి ప్రతీది సమపాళ్లలో ఉండేలా జాగ్రత్తగా పెంచుతారు. ఒక్కో పండును చేతితో పట్టుకుని చూస్తే, అది నెమ్మదిగా సున్నితంగా ప్రేమగా పెరిగిందని, ఎంతో సహనంగా తీర్చిదిద్దారని అర్థమవుతుంది.
ఈ మామిడి కేవలం పండే కాదు, అది ప్రకృతిలో ఒక అద్భుత కళాఖండం! మన జీవితంలోనూ ఇదే వర్తిస్తుంది. విలువ అంటే ధనంతో కాదు శ్రమ, సహనం, సహజత్వం ఉంటేనే అసలైన విలువ.
అంతా చూస్తున్నప్పుడు, నాకు నా సొంత జీవితం గుర్తొచ్చింది. ప్రకృతి తనదైన శైలిలో, తన గమనంలో నడుస్తుంది. మనం ఎంత త్వరగా ఎదగాలని అనుకున్నా, ప్రకృతికి ఎప్పుడూ నిర్ధిష్టమైన ఓ పరిపూర్ణమైన సమయాన్ని కేటాయిస్తుంది. మనం నమ్మి, ఎదురు చూడాలి. అదే సహనం, అదే అసలైన అర్ధం.
ఒకసారి హోంగ్‌కాంగ్‌లో ఓ తోటలోకి వెళ్ళాను. అక్కడ ఒక మామిడి చెట్టు వందేళ్లుగా పెరిగి ఉంది. రైతులు దాన్ని కేవలం పండ్ల కోసం కాదు, తమ కుటుంబ సంపదగా చూసుకున్నారు. మియాజాకి మామిడిని చూస్తుంటే ఆ సంఘటన గుర్తొచ్చింది.
మనలో చాలా మందికి ఒక పండు లక్షలు పలికిందంటే ఆశ్చర్యంగా ఉంటుంది. కానీ ఆ ధర దాని రుచికి కాదు, దాని వెనుక ఉన్న కష్టానికి, సహనానికి, ప్రేమకి. మన జీవితంలోనూ ఇలానే కదా? మన శ్రమను, ఎదుగుదలను బయటివారు అర్థం చేసుకోవడం కష్టం. కానీ సహనం మనలో ఉంటే, మన విలువను ప్రపంచం తప్పక గుర్తిస్తుందనే నమ్మకం ఉండాలి.
ప్రకృతిని గమనించడం అంటే జీవితాన్ని అర్థం చేసుకోవడమే.. పండ్లను కోసే ముందు వృక్షాన్ని గమనించు, జీవితాన్ని అర్థం చేసుకునే ముందు కాలాన్ని గమనించు.
ప్రపంచంలో ఎన్నో దేశాలు తిరిగాను. ప్రతి చోటా కొత్త జీవనశైలిని నేర్చుకున్నాను. కానీ ప్రకృతిని దగ్గరిగా గమనించినప్పుడు, మన జీవితం కూడా ఒక నెమ్మదిగా పండే పండులాంటిదే అని అనిపించింది. మన ప్రయాణం అంతా సహనంగా సాగాలి. మియాజాకి మామిడి నెమ్మదిగా పండినట్టే, మనం అనుకున్న విజయాలు కొంత సమయం తీసుకుంటాయి. కానీ వాటికి సహనం, పట్టుదల, కృషి ఉంటే, ఆ ఫలితం అమూల్యమైనదే అవుతుంది.
నా కెమెరా కళ్ళల్లో ఎన్నో మామిడిపండ్లు బంధించాను. కానీ మియాజాకి మామిడి నాకు కేవలం ఓ ఫోటో కాదని అర్థమైంది. అది ఒక జీవన విధానం, ఒక నిబద్ధత, ఒక సహనం. మన ప్రయాణాన్ని మనమే ఓ కళా ప్రక్రియగా తీర్చిదిద్దుకోవాలి. ప్రతి అనుభవాన్ని ఓ కొత్త రుచిగా ఆస్వాదించాలి, అర్థం చేసుకోవాలి, జీవించాలి.
అన్నింటికంటే గొప్ప రుచి జీవితానికే ఉంటుంది – అది ఎలా ఎదిగిందో మనం ఎలా అర్థం చేసుకున్నామో అనే దాని బట్టే మన జీవితపు తీపి విలువ దాగి ఉంటుంది.
.
.
(ఇండియాలో కూడా కొందరు దీన్ని పండించే ప్రయత్నాలు చేశారు ఆమధ్య… విపరీతమైన ప్రచారమూ సోషల్ మీడియాలో జరిగింది… ఆ కథనం లింక్ ఇదుగో… – ముచ్చట )
మియాజాకి @ దామిని..! అసలు ఏమిటి దీని స్పెషాలిటీ..? అంత రేటేమిటి..?!
Share this Article