.
చిల్లర దేవుళ్లు …. చిల్లర దేవుళ్లు సినిమా విడుదలయ్యిందా అని ఎవరో అడిగారు ఆ మద్దెల .. ఒకవేళ అయ్యుంటే ఫ్లాప్ అయ్యే ఉంటుంది కదా అన్నారు లాయరు గారు …
అంచేతన నేను చెప్పేదేంటంటే … ఆ సినిమాను తారకరామా వారు విడుదల చేశారు. బెజవాడ రామా టాకీసు వారి చేతుల్లోనే ఉండేదని నా అనుమానం. అందులోనే ఈ చిల్లర దేవుళ్లు ఆడింది .
Ads
చిల్లర దేవుళ్లు సినిమా 1977 మార్చి 11న విడుదలైంది. దాశరథి రంగాచార్య నవల చిల్లర దేవుళ్లు అప్పటికే అటు తెలంగాణలోనూ ఇటు ఆంధ్రాలోనూ కూడా పాపులర్. చాలా మంది చదివేశారు. నేను మానికొండ లైబ్రీలో చదివాను…
తెలంగాణ పోరాట నేపధ్యంలో రంగాచార్య గారు రాసిన నవలల పరంపరలో ఇది ఒకటి. ఆ తర్వాత మోదుగు పూలు, జనపథం వచ్చాయి.
తెలంగాణ నుంచీ తెలంగాణ వరకు … అంటే తెలంగాణ సాయుధ రైతాంగ పోరాటం నుంచీ నక్సల్బరీ రాజకీయాలు తిరిగి తెలంగాణలో సాయుధ పోరాట రాజకీయాలకు కొలిమి ఊదే వరకు … పరిణామాలు అన్నీ – మార్క్స్ టూ మావో… ఈ నవలలన్నీ సీరియల్ గా సీరియస్ గా చర్చించాయి.
అలాంటి సిరీస్ లో భాగంగా వచ్చిన చిల్లర దేవుళ్లు నవలను వరంగల్ కి చెందిన మాధవరావు డైరక్షన్ లో తెరకెక్కించారు. సినిమా ఆర్ధిక విజయం సాధించలేదు. పాటలు అప్పటికే హిట్ అయి ఉండడం వల్ల రెండు వారాలు రన్నింగ్ కలక్షన్ వచ్చింది.
అయితే ఈ సినిమా విడుదలైన వారం రోజుల్లోనే ఎన్టీఆర్ నిప్పులాంటి మనిషి సెకండ్ రిలీజు , అక్కినేని ఆలుమగలు విడుదలవడంతో ఇది పూర్తిగా అడుగంటింది.
…………..
ఇందులో … ఏటికేతంబట్టి ఎయిపుట్లు పండించి గంజిలో మెతుకెరుగరన్నా … అనే పాటయూ … శ్రీ లక్ష్మి నీ మహిమలూ గౌరమ్మ చిత్రమై తోచునమ్మా అనే పాటయున్నూ తప్ప కడమావన్నీ ఆత్రేయే రాసినారు. (కలువకు చంద్రుడు ఎంతో దూరం, పాడాలనే ఉన్నదీ విని మెచ్చే మనిషుంటే)..,
……
ఈ రెండూ కూడాను … తెలంగాణ ప్రాంతపు జానపద గీతాలనే తీసుకోవడం జరిగింది. ఏటికేతంబట్టి పాట ఆకాశవాణి గాయకుడు నరసింహమూర్తి పాడారు. అతనే పెండ్యాల సంగీత దర్శకత్వంలో … సతీ సావిత్రిలో కృష్ణంరాజుకు ప్లేబ్యాక్ పాడారు. అయితే సినిమా పరిశ్రమలో నిలదొక్కుకోలేదు.
ఒంగోలులో ఆకాశవాణి వారు నిర్వహించిన ఓ కార్యక్రమంలో ఎనభై ఒకటి ప్రాంతాల్లో … ఆయన వేదికపై పాడగా విన్నాను. ఆయన ప్రధానంగా ఆకాశవాణికి చెందిన జానపద గాయకుడుగానే ఎక్కువ పాపులర్. అలా చిల్లర దేవుళ్లు సినిమా శానా పాత విషయాలను గుర్తు చేసింది… …………….. Bharadwaja Rangavajhala
నెట్లో ప్రముఖ చిత్ర సమీక్షకుడు వారాల ఆనంద్ రాసిన రివ్యూ కనిపించింది… సినిమా విడుదలై 40 ఏళ్లు పూర్తయిన సందర్భంగా రాసిన సమీక్ష…
Share this Article