.
నీర్జా భానోత్… ఈమె కథ చాలామంది చాలాసార్లు చదివారు… మీడియా, సోషల్ మీడియాలో మాత్రమే కాదు… ఆమె పేరుతోనే సినిమా కూడా వచ్చింది… సోనమ్ కపూర్ చేసింది ఆ పాత్రను, ఆమె నటనకూ మంచి ప్రశంసలే దక్కాయి… ఆమె కథ మరోసారి సోషల్ మీడియాలో బాగా కనిపిస్తోంది… దాన్ని మరోసారి చదువుతూ ఉంటే ఓ డౌట్ వచ్చింది… ముందుగా ఆ కథ చదవండి…
1963లో చండీగఢ్లో పుట్టి, ముంబై వీధుల్లో పెరిగిన ఒక సామాన్యమైన అమ్మాయి.. ప్రపంచం గర్వించే అసాధారణ సాహసానికి చిరునామాగా మారుతుందని ఎవరూ ఊహించలేదు. అందమైన రూపంతో మోడలింగ్ రంగంలో మెరిసిన నీర్జా, 1985లో పాన్ అమ్ విమాన సంస్థలో ఫ్లైట్ అటెండెంట్గా చేరినప్పుడు ఆమె వయస్సు కేవలం 23 ఏళ్లు.
Ads
ఆమె తల్లి ఒకసారి భయంతో, “ఒకవేళ విమానం హైజాక్ అయితే, నీ ప్రాణాలు కాపాడుకోవడానికి అక్కడి నుండి పారిపోమ్మా” అని చెప్పింది. దానికి ఆ ధైర్యశాలి ఇచ్చిన సమాధానం అజరామరం: “మమ్మీ.. చనిపోతానో ఏమో కానీ, భయపడి పారిపోయే పిరికిదాన్ని మాత్రం కాదు.”
ఆ 17 గంటల పోరాటం… 1986, సెప్టెంబర్ 5 … ముంబై నుంచి కరాచీ మీదుగా న్యూయార్క్ వెళ్తున్న ‘పాన్ అమ్ ఫ్లైట్ 73’లో నీర్జా సీనియర్ పర్సర్గా విధుల్లో ఉంది. ఉదయం 6 గంటల సమయం.. కరాచీ విమానాశ్రయంలో విమానం ఆగి ఉండగా, భద్రతా సిబ్బంది ముసుగులో నలుగురు సాయుధ ఉగ్రవాదులు మృత్యువులా లోపలికి చొరబడ్డారు.
నీర్జా అప్రమత్తత అమోఘం! ఉగ్రవాదులు తన మీద తుపాకీ గురిపెట్టినా వణకకుండా, చాకచక్యంగా ‘హైజాక్ కోడ్’ను పైలట్లకు చేరవేసింది. ఫలితంగా పైలట్లు కిటికీ గుండా తప్పించుకున్నారు. విమానం కదలలేని స్థితికి చేరింది. 380 మంది ప్రయాణికులు, 13 మంది సిబ్బంది ప్రాణాలు ఇప్పుడు ఆ 23 ఏళ్ల యువతి చేతుల్లో ఉన్నాయి.
మానవత్వపు గొప్పతనం … ఉగ్రవాదులు అమెరికన్లను టార్గెట్ చేసి, అందరి పాస్పోర్టులు సేకరించమని ఆమెను ఆదేశించారు. వారి కుట్రను పసిగట్టిన నీర్జా.. తన టీమ్తో కలిసి అమెరికన్ పాస్పోర్టులను సీట్ల కింద దాచిపెట్టి, మరికొన్నింటిని చెత్త బుట్టల్లో వేయించింది. అలా ఆ విమానంలోని 44 మంది అమెరికన్లలో 42 మందిని ఉగ్రవాదుల కంట పడకుండా రక్షించింది.
ప్రాణం ఇచ్చి.. ప్రాణాలు నిలిపి… దాదాపు 17 గంటల ఉత్కంఠ తర్వాత.. సహనం కోల్పోయిన ఉగ్రవాదులు విమానంలో కాల్పులు జరుపుతూ, గ్రెనేడ్లు విసరడం మొదలుపెట్టారు. అదే సమయంలో నీర్జా అత్యవసర ద్వారాన్ని తెరిచింది. ఆమె ముందుగా బయటపడి ప్రాణాలు కాపాడుకునే అవకాశం ఉన్నా.. తాను పక్కకు నిలబడి ఒక్కో ప్రయాణికుడిని బయటకు పంపింది.
చివరి క్షణాల్లో.. దిక్కుతోచని స్థితిలో ఉన్న ముగ్గురు పసిపిల్లలను కాపాడబోతుండగా, ఉగ్రవాదులు నీర్జాను జుట్టు పట్టి లాగి అతి దగ్గర నుంచి కాల్చారు. తన 24వ పుట్టినరోజుకు కేవలం రెండు రోజుల ముందు, కరాచీ రన్వేపై ఆ వీరవనిత నేలకొరిగింది.
గర్వించదగ్గ గౌరవం … ఆమె త్యాగానికి చిహ్నంగా భారత ప్రభుత్వం ఆమెను ‘అశోక చక్ర’తో సత్కరించింది. ఈ అత్యున్నత పురస్కారాన్ని అందుకున్న అతి పిన్న వయస్కురాలిగా, తొలి మహిళగా ఆమె రికార్డు సృష్టించింది. కేవలం భారతదేశమే కాదు.. పాకిస్థాన్ (‘తమ్ఘా-ఎ-ఇన్సానియత్’ (Tamgha-e-Insaaniyat) ), అమెరికా (స్పెషల్ కరేజ్ అవార్డు) కూడా ఆమె సాహసాన్ని కొనియాడాయి…
నీర్జా భానోత్… ఒక పేరు కాదు, అదొక ధైర్యానికి నిలువెత్తు సాక్ష్యం. ఆమె రక్షించిన ఆ ముగ్గురు పిల్లలలో ఒకరు నేడు పెద్ద విమాన సంస్థలో పైలట్గా పనిచేస్తున్నారంటే, అది ఆమె వేసిన ప్రాణభిక్షే!
ఇక్కడ సందేహం ఏమిటంటే..? అమెరికన్లకు కాపాడింది కాబట్టి అమెరికా అవార్డు ఇచ్చి గౌరవించింది, రీజనబుల్… ఆమె ఇండియన్, అశోకచక్ర ఇచ్చి గౌరవించింది, వెరీ రీజనబుల్… కానీ మధ్యలో పాకిస్థాన్ ఎందుకొచ్చింది, అది ఎందుకు పురస్కారం ఇచ్చింది..? ఇండియాను శత్రు దేశంగా భావించే పాకిస్థాన్ ఒక భారతీయ యువతికి తన దేశ అత్యున్నత పురస్కారాన్ని ఎందుకు ఇచ్చింది..?
– హైజాక్ జరిగిన ‘పాన్ అమ్ ఫ్లైట్ 73’ అప్పుడు కరాచీ (పాకిస్థాన్) విమానాశ్రయంలో ఉంది. అంతర్జాతీయ నిబంధనల ప్రకారం, ఒక దేశ భూభాగంలో ఇలాంటి ఘటన జరిగినప్పుడు, అక్కడ ప్రాణాలు కాపాడిన వారిని గౌరవించాల్సిన బాధ్యత ఆ దేశంపై ఉంటుంది. నీర్జా చూపిన సాహసం వల్ల పాకిస్థాన్ గడ్డపై జరగాల్సిన భారీ రక్తపాతం చాలా వరకు తగ్గింది.
– ఆ విమానంలో కేవలం భారతీయులు, అమెరికన్లు మాత్రమే లేరు. గణనీయమైన సంఖ్యలో పాకిస్థాన్ పౌరులు కూడా ఉన్నారు. ఉగ్రవాదులు కాల్పులు జరుపుతున్నప్పుడు నీర్జా కేవలం భారతీయులనో, అమెరికన్లనో చూడలేదు. జాతి, మత భేదం లేకుండా అందరినీ కాపాడింది. ఆమె రక్షించిన వారిలో పాకిస్థానీయులు కూడా ఉండటంతో ఆ ప్రభుత్వం ఆమెను గౌరవించక తప్పలేదు.
– ఆ రోజుల్లో ఈ హైజాక్ ఉదంతం ప్రపంచవ్యాప్తంగా సంచలనం సృష్టించింది. ఒక 23 ఏళ్ల అమ్మాయి ఉగ్రవాదులకు ఎదురునిలిచి అంతమందిని కాపాడటం అనేది ప్రపంచ దేశాలను ఆశ్చర్యపరిచింది. కేవలం ఒక దేశానికి పరిమితం కాకుండా, ‘మానవత్వానికి’ ఆమె చేసిన సేవను గుర్తించకపోతే అంతర్జాతీయంగా విమర్శలు వస్తాయని పాకిస్థాన్ భావించింది. అందుకే ఆమెకు ‘తమ్ఘా-ఎ-ఇన్సానియత్’ (మానవత్వ పురస్కారం) ప్రకటించింది.
- సాధారణంగా పాకిస్థాన్ భారతీయుల విషయంలో చాలా కఠినంగా ఉంటుంది. కానీ నీర్జా చేసిన త్యాగం అటువంటి సరిహద్దులను, రాజకీయాలను చెరిపివేసింది. ఒక రకంగా చెప్పాలంటే, పాకిస్థాన్ వంటి దేశం కూడా తలవంచి సల్యూట్ చేసేలా ఆమె తన ప్రాణాలను పణంగా పెట్టి పోరాడింది. అందుకే ఆమెను ‘హీరో ఆఫ్ నేషన్స్’ అని పిలుస్తారు…
Share this Article