.
ఆమె పేరు శుభ శంకరనారాయణన్… ఆమెకు 21 ఏళ్లు, బెంగళూరులో లా (న్యాయశాస్త్రం) విద్యార్థిని… తనకంటే రెండేళ్లు చిన్నవాడైన అరుణ్ వర్మ అనే కాలేజీ జూనియర్తో ఆమె ప్రేమలో ఉంది… శుభ తండ్రికి ఈ ప్రేమ వ్యవహారం ఇష్టం లేదు… దాంతో ఆయన ఆమెకు మరొకరితో పెళ్లి నిశ్చయించారు…
2003 నవంబర్ 30న, 27 ఏళ్ల సాఫ్ట్వేర్ ఇంజనీర్ బి.వి. గిరీష్తో శుభ నిశ్చితార్థం జరిగింది. గిరీష్ కుటుంబం ఎంతో సంతోషించింది. అతని భవిష్యత్తు ఎంతో బాగుంటుందని భావించారు.
Ads
మూడు రోజుల తర్వాత, పెళ్లికి ముందే ఇద్దరం కలిసి కొంత సమయం గడుపుదామని గిరీష్కు ఫోన్ చేసి చెప్పింది శుభ. డిన్నర్ ముగించుకుని, ఆ తర్వాత ఇన్నర్ రింగ్ రోడ్డులోని వ్యూ పాయింట్ నుండి విమానాలు టేకాఫ్ అవ్వడాన్ని చూసేందుకు హెచ్ఏఎల్ (HAL) ఎయిర్పోర్ట్ దగ్గరకు వెళ్దామని ఆమె ప్రతిపాదించింది. అతను సరేనన్నాడు.
గిరీష్ రన్వే వైపు చూస్తూ నిలబడగా, ముగ్గురు వ్యక్తులు వెనుక నుండి మోటార్ సైకిల్ షాక్ అబ్జార్బర్తో అతనిపై దాడి చేశారు. శుభ పక్కనే నిలబడి, తనకు ఏమీ తెలియనట్లు నటిస్తూ దాడి చేసేవారిని ఆపమంటూ గట్టిగా అరిచింది.
గిరీష్ తలకు తీవ్ర గాయాలయ్యాయి. మరుసటి రోజు ఉదయం అతను ఆసుపత్రిలో కన్నుమూశాడు.
అతని కుటుంబ సభ్యులు పోలీసులకు ఫిర్యాదు చేశారు. మొదట్లో పోలీసులకు ఎలాంటి ఆధారాలు దొరకలేదు. గిరీష్కు శత్రువులెవరూ లేరు, పైగా కొన్ని రోజుల ముందే నిశ్చితార్థం జరగడంతో శుభపై ఎలాంటి అనుమానం రాలేదు.
కానీ, పోలీసులు నిశ్చితార్థం వీడియోను పరిశీలించినప్పుడు అసలు విషయం బయటపడింది. ఆ వీడియోలో శుభ నిరాసక్తంగా, అసంతృప్తిగా కనిపించింది. నిశ్చితార్థం చేసుకున్న అమ్మాయి ముఖంలో ఉండాల్సిన సంతోషం ఆమెలో లేదు. అక్కడ డౌట్ వచ్చింది పోలీసులకు. అసాధారణం అనిపించి, ఆ కోణంలో తవ్వడం మొదలుపెట్టారు.
దీంతో ఇన్వెస్టిగేటర్లు మరింత లోతుగా దర్యాప్తు చేశారు. హత్య జరిగిన రోజున శుభ.. అరుణ్ వర్మతో 73 సార్లు ఫోన్ మాట్లాడినట్లు, ఎన్నో మెసేజ్లు పంపుకున్నట్లు వారు గుర్తించారు.
ఆధారాలతో సహా నిలదీసేసరికి ఆమె తప్పు ఒప్పుకుంది.
నిశ్చితార్థానికి ముందే ఈ హత్యకు ప్రణాళిక రచించారు. శుభకు అరుణ్ వర్మతో కలిసి జీవించాలనే కోరిక ఉండేది. అందుకే ఆమె, అరుణ్, మరిద్దరు కిరాయి హంతకులు కలిసి గిరీష్ను చంపేందుకు ప్లాన్ వేశారు.
గిరీష్ నిశ్చితార్థం జరిగి కేవలం మూడు రోజులే అయింది.
2010 జూలైలో నలుగురు నిందితులకు కోర్టు జీవిత ఖైదు విధించింది. ఆ తర్వాత కర్ణాటక హైకోర్టు కూడా ఈ తీర్పును సమర్థించింది. 2025లో సుప్రీంకోర్టు సైతం ఆ నలుగురి జీవిత ఖైదు శిక్షను ఖరారు చేసింది.
ఈ సందర్భంగా సుప్రీంకోర్టు ఇలా వ్యాఖ్యానించింది:
“శుభ తన ప్రేమ- పెళ్లి సమస్యను పరిష్కరించుకోవడానికి అత్యంత విషాదకరమైన, ఆమోదయోగ్యం కాని మార్గాన్ని ఎంచుకుంది. ఇది ఒక అమాయక యువకుడి ప్రాణాన్ని బలిగొంది.”
అతను తన కాబోయే భార్యతో కలిసి విమానాలు ఎగరడం చూసేందుకు వెళ్లాడు. కానీ, తిరిగి ఇంటికి రాలేకపోయాడు.
- (కొన్ని కథలు మరుగునపడవు… పదే పదే సోషల్ మీడియాలో ప్రత్యక్షం అవుతూనే ఉంటాయి… ఇదీ అంతే… నిజానికి ఈరోజుల్లో ఇలాంటి మర్డర్లు కామన్ అయిపోయాయి… రంకు మొగుళ్ల కోసం మొగుళ్లను, పిల్లలను కూడా రఫారఫా చేసేస్తున్న కాలం… ఈమె 2003 లోనే చేసింది…)
Share this Article