భారీ ఆర్థిక మోసం ‘షేర్ బజార్’ – ‘కిసాన్ పరివార్’ స్కామ్ వెనుక అసలు కథ!

.

( ప్రియదర్శిని కృష్ణ ) …. ప్రస్తుతం మార్కెట్‌లో వెలుగు చూసిన ‘షేర్ బజార్ – కిసాన్ పరివార్’ స్కామ్ సంచలనం సృష్టిస్తోంది. హైదరాబాద్ కేంద్రంగా కార్యకలాపాలు సాగించిన Shares Bazaar Pvt Ltd (SBPL) మరియు Kisaan Parivar Ltd (KPL) అనే రెండు సంస్థలు వేలాది మంది పెట్టుబడిదారులను నిలువునా ముంచేశాయి. ఈ వ్యవహారంలో జరిగిన మోసం అక్షరాలా ₹14,000 కోట్లు ఉంటుందని అంచనా.

మోసం ఎలా జరిగింది?
షేర్ బజార్ (SBPL): తాము సెబీ (SEBI) రిజిస్టర్డ్ అని, రిథమ్-బేస్డ్ స్టాక్ మార్కెట్ ట్రేడింగ్ ప్లాట్‌ఫారమ్ అని నమ్మబలికారు. ఏడాదికి దాదాపు 48% హామీ లాభాలు, ప్రతి నెలా ఫిక్స్‌డ్ డివిడెండ్ ఇస్తామని ఆశ చూపారు.

కిసాన్ పరివార్ (KPL): తాము ఆర్గానిక్ వ్యవసాయం, ల్యాండ్ పూలింగ్ కంపెనీ అని చెప్పుకుంటూ, భూమి రిజిస్ట్రేషన్ ఆధారంగా ఏడాదికి 24% ట్యాక్స్-ఫ్రీ రిటర్న్ ఇస్తామని నమ్మించారు.

కాల్ సెంటర్లు, సోషల్ మీడియా ప్రకటనలు, వ్యక్తిగత సమావేశాల ద్వారా ప్రజలను ఆకర్షించి, రాతపూర్వక ఒప్పందాల (MoU) పేరుతో ప్రజల నుంచి భారీగా డిపాజిట్లు సేకరించారు. ఆశపడిన సామాన్యులు, రిటైర్డ్ ఉద్యోగులు తమ పొలాలు, బంగారం అమ్మి, అప్పులు చేసి మరీ ఈ స్కీముల్లో పెట్టుబడి పెట్టారు.

కీలక మలుపు… అక్టోబర్ 2025 నుంచి నెలవారీ చెల్లింపులు నిలిచిపోవడంతో బాధితులకు అనుమానం మొదలైంది. హైదరాబాద్‌కు చెందిన ఒక రిటైర్డ్ నేవీ అధికారి తన ₹4.51 కోట్లు పోగొట్టుకున్నానని ఫిర్యాదు చేయడంతో, సైబరాబాద్ ఎకనామిక్ అఫెన్సెస్ వింగ్ (EOW) రంగంలోకి దిగింది. సంస్థ వ్యవస్థాపకుడు మరియు ఎండీ నవవంత్ భూపాల్ నాయక్ తో పాటు ఇతర డైరెక్టర్లను పోలీసులు అదుపులోకి తీసుకుని విచారిస్తున్నారు.

ప్రసన్న అట్లూరి మరణం – కేసుపై ప్రభావం!
ఈ కేసులో మరో సంచలన అంశం ఏంటంటే.. కిసాన్ పరివార్ సంస్థలో డైరెక్టర్‌గా వ్యవహరించిన ప్రసన్న అట్లూరి. ఈమె ఈ సంస్థల రిజిస్ట్రేషన్లు, పెట్టుబడిదారులతో సంప్రదింపులు, ఆర్థిక లావాదేవీలలో కీలక పాత్ర పోషించారు. అయితే, జూన్ 8న అమెరికాలో జరిగిన ఒక రోడ్డు ప్రమాదంలో ప్రసన్న అట్లూరి మృతి చెందారు. కీలక వ్యక్తి మరణించడంతో, ఈ కేసు విచారణ, బాధితులకు డబ్బులు తిరిగి దక్కే ప్రక్రియపై ఎలాంటి ప్రభావం చూపుతుందనేది ఇప్పుడు పెద్ద ప్రశ్నగా మారింది.

బాధితులకు సూచనలు: పత్రాలను భద్రపరచుకోండి…: మీ దగ్గర ఉన్న MoU, రిసీట్లు, బ్యాంక్ స్టేట్‌మెంట్‌లు, WhatsApp/ఇమెయిల్ చాట్స్ వంటి సాక్ష్యాలను జాగ్రత్తగా ఉంచుకోండి.

అధికారికంగా ఫిర్యాదు చేయండి…: తాజా మీడియా రిపోర్టులు, FIR నంబర్ల ఆధారంగా సైబరాబాద్ పోలీస్ లేదా EOW అధికారులను సంప్రదించి లిఖితపూర్వక ఫిర్యాదు చేయండి.

అప్రమత్తంగా ఉండండి…: “ఫీజు ఇస్తే డబ్బులు తిరిగి ఇప్పిస్తాం” అని చెప్పే మోసపూరిత వ్యక్తుల పట్ల అప్రమత్తంగా ఉండండి. అలాంటి వారిని నమ్మి మరోసారి మోసపోకండి.

ఇతర ఆర్థిక నేరాల మాదిరిగానే ఈ కేసు కూడా కాలగర్భంలో కలిసిపోతుందా? లేక బాధితులకు న్యాయం జరుగుతుందా? అనేది వేచి చూడాలి…