ఆమె మాకొద్దు, మాకసలే వద్దు… శ్రీలీలకు ఏమిటి ఈ దురవస్థ !

.

శ్రీలీల-  స్టార్‌డమ్ నుంచి సందిగ్ధంలోకి… అసలేం జరుగుతోంది? మనం గతంలోనే పలుసార్లు చెప్పుకున్నాం శ్రీలీల ఎంచుకుంటున్న పాత్రలు ఆమెకు నష్టదాయకం అవుతాయని! సరిగ్గా అదే జరుగుతోంది ఇప్పుడు… అందం ఉంది, బ్రహ్మాండమైన డాన్స్ చేయగలదు, ఈజ్- ఎనర్జీ ఉంది… కానీ ఎందుకు హీరోలు రిజెక్ట్ చేస్తున్నారు..? ఐరన్ లెగ్ అనే ముద్ర ఎందుకు పడుతోంది..?

ఒకప్పుడు చేతిలో ఐదారు సినిమాలతో టాలీవుడ్‌లో ‘మోస్ట్ వాంటెడ్’ హీరోయిన్‌గా వెలుగొందిన శ్రీలీల, ప్రస్తుతం అవకాశాల కోసం ఎదురుచూసే స్థితికి రావడం అందరినీ ఆశ్చర్యపరుస్తోంది. ఒక వైపు ప్రతిభ, మరోవైపు గ్లామర్ ఉన్నా, అదృష్టం మాత్రం ఆమెకు మొహం చాటేస్తోంది.

చేజారిన అవకాశాల చిట్టా: శ్రీలీల క్రేజ్ తగ్గడానికి కారణం, వరుసగా ఆమె చేతిలోంచి పెద్ద ప్రాజెక్టులు జారిపోవడమే. ఈ క్రమంలో ఆమె కొన్ని కీలక అవకాశాలను కోల్పోయినట్లు సమాచారం…

• ప్రతిష్టాత్మక ప్రాజెక్టులు…: విజయ్ దేవరకొండ ‘కింగ్‌డమ్’, వరుణ్ ధావన్ నటిస్తున్న బాలీవుడ్ మూవీ ‘హై జవానీ.. ఇష్క్ హోనా హై’ వంటి భారీ చిత్రాల్లో ఆమెను ఫైనల్ చేసినట్లు వార్తలు వచ్చాయి. కానీ చివరి నిమిషంలో మేకర్స్ ఆమె స్థానంలో వేరే హీరోయిన్లను ఎంచుకోవడం శ్రీలీల కెరీర్‌కు పెద్ద షాక్ ఇచ్చింది.

• అజిత్ సినిమా…: కోలీవుడ్‌లోనూ తన అదృష్టాన్ని పరీక్షించుకోవాలని ప్రయత్నిస్తున్న శ్రీలీలకు, తాజాగా అజిత్ సినిమా ఆఫర్ కూడా చేజారినట్లు ప్రచారం జరుగుతోంది…

• మిస్ అయిన హిట్స్…: ‘లెనిన్’, ‘అనగనగా ఒక రాజు’ వంటి చిత్రాలను ఏకంగా ఒకే ఏడాది మిస్ చేసుకోవడం, ఆ సినిమాల విజయాలను ఆమె ఖాతాలోకి రాకుండా చేశాయి…

ఎందుకీ ‘ఐరన్ లెగ్’ ముద్ర? సినిమా రంగంలో సక్సెస్ ఉంటేనే అవకాశాలు వస్తాయి. శ్రీలీల నటించిన ‘భగవంత్ కేసరి’ వంటి చిత్రాల్లో ఆమె నటనకు ప్రశంసలు దక్కినా, ఆ తర్వాత వచ్చిన కొన్ని సినిమాలు ఆశించిన ఫలితాలను ఇవ్వలేదు. ఒకే సమయంలో ఎక్కువ సినిమాల ఒత్తిడి వల్ల, కథల ఎంపికలో ఆమె సరైన నిర్ణయాలు తీసుకోలేదనే విమర్శలు వినిపించాయి.

దీనివల్ల ట్రేడ్ వర్గాల్లో, హీరోల మధ్య ఒక రకమైన ‘నెగటివ్ ఇంప్రెషన్’ ఏర్పడింది. “శ్రీలీల డేట్స్ తీసుకుంటే సినిమాకు కలిసి రాదు” అనే భావన బలంగా నాటుకుపోవడం వల్లే, ఆమె పేరు చెబితేనే హీరోలు, దర్శకనిర్మాతలు వెనకడుగు వేస్తున్నారనే ప్రచారం జరుగుతోంది. అసలే ఇండస్ట్రీ అనేకరకాల మూఢ నమ్మకాలు, సెంటిమెంట్ల ప్రపంచం…

నిజంగా ప్రతిభ లేకనా? అసలు సమస్య ఆమె ప్రతిభలో లేదు. శ్రీలీల ఒక మంచి డ్యాన్సర్, తెరపై గ్లామరస్‌గా కనిపించగలదు. కానీ, ఆమెను కేవలం డ్యాన్సులకే పరిమితం చేసే పాత్రలు పడటం, పెర్ఫార్మెన్స్‌కు అవకాశం ఉన్న కథలు తక్కువగా రావడం ఆమెకు మైనస్‌గా మారాయి. ఆమెను కేవలం ‘కమర్షియల్ బొమ్మ’గా చూస్తున్నారే తప్ప, నటిగా ఎదిగే అవకాశం ఉన్న పాత్రలను దర్శకులు ఇవ్వడం లేదు.

ప్రస్తుతం శ్రీలీల కెరీర్ ఒక సంధి దశలో ఉంది. కెరీర్ మలుపు తిరగాలంటే కేవలం గ్లామర్ మాత్రమే సరిపోదు, కథాబలం ఉన్న పాత్రలను ఎంచుకోవడం ఇప్పుడు అత్యంత కీలకం. టాలీవుడ్‌లో కమ్‌బ్యాక్ కష్టంగా మారడంతో తమిళ, బాలీవుడ్ మార్కెట్లపై ఆమె దృష్టి సారించింది. అయితే, అక్కడ కూడా ఈ ‘ఐరన్ లెగ్’ ముద్రను చెరిపేసి, తన సత్తా చాటుకోవాలంటే ఆమెకు ఒక సాలిడ్ హిట్ ఖచ్చితంగా అవసరం. శ్రీలీల మళ్ళీ పుంజుకుంటుందా? లేక ఈ అదృష్టహీనతను దాటుకుని నిలబడుతుందా? అనేది వేచి చూడాలి…

ప్రస్తుతానికి బ్రాండ్ ఎండార్స్‌మెంట్లు, ఈవెంట్లు, సోషల్ మీడియా ప్రమోషన్లతో కాలక్షేపం చేస్తోంది పాపం!!