.
ఎంత దరిద్రమైన సినిమా అయినా, ఏదో ఒకటి మెచ్చుకునే అంశం కనిపిస్తుంది… తరచి చూస్తే… టాక్సిక్ ఓ చెత్త సినిమా, అందులో డౌట్ లేదు, కారణాలు బోలెడు చెప్పుకున్నాం… ఇందులో ఒకటి కాస్త ఆసక్తికరంగా చర్చించుకోవచ్చు… అవి డైలాగ్స్…
కన్నడ ఒరిజినల్లో రాఘవ్ వినయ్ శివగంగే డైలాగ్స్ రాస్తే, తెలుగులో రాధాకృష్ణ భట్టర్ రాసినట్టు క్రెడిట్స్లో కనిపిస్తోంది… ఐతే ఒక విమర్శ మాత్రం ఉంది, మరీ డైలాగ్స్ కొటేషన్లలాగా, కృతకంగా… మరీ “ప్రామాణికం, క్రౌర్యం, అపరాధం” వంటి పాతకాలపు పదజాలం ఏమాత్రం సహజంగా లేకుండా ఉన్నాయనే విమర్శ కూడా వినవచ్చింది…
Ads
కన్నడ డైలాగ్స్ను తెలుగులోకి తీసుకొచ్చేటప్పుడు లిప్ సింకింగ్ వంటి అంశాలను కూడా రచయిత దృష్టిలో పెట్టుకోవాలి, ఆ ఒరిజినాలిటీ అనువాదంలో అచ్చంగా ధ్వనించాలంటే కష్టమే, క్లిష్టమే… కొన్ని బాగున్నాయి అనిపించిన డైలాగ్స్ ఏమిటంటే..? (సోషల్ మీడియాలో కనిపిస్తున్నవి)…
1. నా కథ ఎదిగిన వాళ్లకు చెప్పే ఫెయిరీ టేల్.
2. ఈసారి నువు నాతో కలిసినపుడు అది సంబరంలా ఉండాలి. ఆక్రమణలా కాదు.
3. జ్ఞాపకాలు ఇచ్చే ఆనందం టాక్సిక్.
4. అయిపోయిందని నువ్వు చెప్పినప్పుడు కాదు. నేను చెప్పినప్పుడే అయిపోతుంది.
5. నన్ను చంపాలని చాలామంది ప్రయత్నించారు. బతకాలని నేను ఒక్కణ్ణే నిర్ణయించుకున్నాను.
6. భయం మనిషిని ఆపదు. భయాన్ని ఎవరు నియంత్రిస్తున్నారో వాళ్లే మనిషిని ఆపుతారు.
7. నువ్వు నన్ను ఓడించాలంటే నా బలాన్ని తెలుసుకుంటే సరిపోదు. నేను ఏం కోల్పోవడానికి సిద్ధంగా ఉన్నానో తెలుసుకోవాలి.
8. విశ్వాసం చాలా ఖరీదైన వస్తువు. అందుకే నేను దాన్ని చవక మనుషుల దగ్గర కొనను.
9. శత్రువు ఎదురుగా నిలబడితే ప్రమాదం కాదు. స్నేహితుడిలా పక్కన నిలబడితేనే ప్రమాదం.
10. డబ్బుతో మనుషులను కొనొచ్చు. కానీ వాళ్ల భయాన్ని కొనాలంటే అధికారం కావాలి.
11. నువ్వు నా గతాన్ని తవ్వుతున్నావు. జాగ్రత్త అందులో పాతిపెట్టిన వాళ్లు ఇంకా ఎక్కువమంది ఉన్నారు.
12. నాకు మంచి పేరు అవసరం లేదు. నా పేరు విన్నప్పుడు వాళ్లు మౌనంగా ఉంటే చాలు.
13. ప్రతీకారం అంటే ఎదుటివాడిని చంపడం కాదు. వాడు బతికుండగానే ఓడిపోయానని తెలిసేలా చేయడం.
14. కొన్ని అప్పులు డబ్బుతో తీరవు. రక్తం కూడా కొన్నిసార్లు చిన్న చెల్లింపే.
15. నువ్వు నిజం కోసం వెతుకుతున్నావా? నిజం దొరికాక దాన్ని భరించగలవా?
16. ఈ ప్రపంచంలో అమాయకులు ఎవరూ ఉండరు. అవకాశం రానివాళ్లు మాత్రమే ఉంటారు.
17. నువ్వు నన్ను తప్పుగా అర్థం చేసుకున్నావు. నేను గెలవడానికి రాలేదు ఎవరు గెలవాలో నిర్ణయించడానికి వచ్చాను.
18. మనిషికి అన్నీ పోయాక భయం పోతుందంటారు. కాదు. అన్నీ పోయాక అతనే భయంగా మారతాడు.
19. చావు నా వెనక చాలా కాలంగా తిరుగుతోంది. దానికి ఇంకా నాతో మాట్లాడే ధైర్యం రాలేదు.
20. ప్రతి కథలో ఒక హీరో, ఒక విలన్ ఉంటారని ఎవరు చెప్పారు? కొన్ని కథల్లో బతికి మిగిలినవాడే హీరో.
21. అగ్నితో అగ్నిలాగానే పోరాడాలి.
22. ఈ మగవాళ్ళ కోసం మనం ఆడవాళ్ళం పోరాడి పోరాడి పరమ రాక్షసంగా తయారయాం .
23. నాకు నైతికత అంటే ఎలర్జీ
24. హింస నా మాతృభాష. అదే ప్రపంచ భాష.
విమర్శనూ, ప్రశంసనూ… మంచీ చెడూ, పాలూనీళ్లను ఓసారి విడదీసి చూస్తే…
సినిమా బాగుందా? బాలేదా? అది వేరే చర్చ. కథ ఎలా ఉంది? అది ఇంకో చర్చ. కానీ టాక్సిక్ గురించి ఇప్పుడు ఒక ప్రత్యేకమైన చర్చ అవసరం — సినిమాలోని సంభాషణల గురించి. ఎందుకంటే ఒకవైపు…
“భయం మనిషిని ఆపదు. భయాన్ని ఎవరు నియంత్రిస్తున్నారో వాళ్లే మనిషిని ఆపుతారు.”
“మనిషికి అన్నీ పోయాక భయం పోతుందంటారు. కాదు. అన్నీ పోయాక అతనే భయంగా మారతాడు.”
“నువ్వు నన్ను ఓడించాలంటే నా బలాన్ని తెలుసుకుంటే సరిపోదు. నేను ఏం కోల్పోవడానికి సిద్ధంగా ఉన్నానో తెలుసుకోవాలి.”
“ప్రతి కథలో ఒక హీరో, ఒక విలన్ ఉంటారని ఎవరు చెప్పారు? కొన్ని కథల్లో బతికి మిగిలినవాడే హీరో.”
ఇలాంటి డైలాగ్స్ వింటే… అబ్బా! డైలాగ్ రైటింగ్ బాగుందే! అనిపిస్తుంది.
మరోవైపు… అదే డైలాగ్స్ను కాస్త జాగ్రత్తగా వింటే,
“ఇది మనిషి మాట్లాడుతున్నాడా? లేక రచయిత రాసిన లిటరరీ వాక్యాల్ని ఆ పాత్రల నోట్లో పెట్టారా?” అనిపించే సందర్భాలూ ఉన్నాయి.
అక్కడే టాక్సిక్ డైలాగ్స్లోని మంచి–చెడు రెండూ కనిపిస్తాయి. డైలాగ్ బాగుంది… కానీ తెలుగు ఎక్కడ?
“విశ్వాసం చాలా ఖరీదైన వస్తువు. అందుకే నేను దాన్ని చవక మనుషుల దగ్గర కొనను.” భావం బాగుంది. పంచ్ ఉంది. గుర్తుండిపోయే వాక్యం. కానీ ఇది మనం సాధారణంగా మాట్లాడుకునే తెలుగు కాదు.
“విశ్వాసాన్ని కొనడం”, “చవక మనుషులు” — ఇవన్నీ ఒక రూపకంలో బాగానే పనిచేస్తాయి. కానీ సంభాషణగా వింటే తెలుగులో రాసిన కోట్స్ అనిపిస్తుంది. అలాగే… “డబ్బుతో మనుషులను కొనొచ్చు. కానీ వాళ్ల భయాన్ని కొనాలంటే అధికారం కావాలి.”
ఐడియా చాలా బాగుంది. కానీ భయాన్ని కొనడం అనే ప్రయోగం తెలుగు నుడికారంలో సహజమైనది కాదు. భావం అర్థమవుతుంది. పంచ్ కూడా వస్తుంది. కానీ అది తెలుగు మనిషి నోట పుట్టిన మాటలా కాకుండా, మరో భాషలో ఉన్న ఆలోచనను తెలుగులోకి కృతకంగా మలిచినట్టుగా అనిపిస్తుంది.
ఇదే టాక్సిక్ డైలాగ్స్పై వస్తున్న “కృతకమైన తెలుగు” అనే విమర్శకు అసలు కారణం. అయితే కృతకంగా ఉందంటే చెడ్డదేనా? అసలు కాదు. ఇది గుర్తుపెట్టుకోవాల్సిన విషయం. సినిమా డైలాగ్ అంటే మన ఇంట్లో మాట్లాడుకునే మాటలే అయి ఉండాల్సిన అవసరం లేదు.
హీరో ఎలివేషన్కు ఒక భాష ఉంటుంది. విలన్కు ఒక భాష ఉంటుంది. ఒక డార్క్ క్యారెక్టర్కు మరో రకం భాష ఉంటుంది. టాక్సిక్ కూడా తన ప్రపంచాన్ని ఒక ప్రత్యేకమైన, చీకటి, హింసాత్మకమైన భాషలో మాట్లాడించడానికి ప్రయత్నించింది. కాకపోతే లోతు ఎక్కువై సగటు ప్రేక్షకుడికి ఎక్కకుండా పోయాయి…
“నేను గెలవడానికి రాలేదు. ఎవరు గెలవాలో నిర్ణయించడానికి వచ్చాను.” ఇది సహజ సంభాషణ కాదు. కానీ సినిమా డైలాగ్గా మాత్రం పనిచేస్తుంది. అలాగే… “చావు నా వెనక చాలా కాలంగా తిరుగుతోంది. దానికి ఇంకా నాతో మాట్లాడే ధైర్యం రాలేదు.” ఇది కూడా మనం రోజూ మాట్లాడుకునే తెలుగు కాదు. ఏదో కవితాపాదంలా ఉంది… కానీ పాత్ర స్వభావాన్ని చెప్పే సినిమాటిక్ డైలాగ్. కాబట్టి దాన్ని కేవలం “కృతక తెలుగు” అని కొట్టిపారేయడం కూడా సరికాదు.
అసలు సమస్య ఎక్కడ? ఒక్కో డైలాగ్ బాగుండటం వేరు. మొత్తం సినిమా సంభాషణలు సహజంగా అనిపించడం వేరు. ఒక సినిమాలో పది గొప్ప కోటేషన్లు ఉండొచ్చు. కానీ ప్రతి పాత్రా ప్రతి సందర్భంలో కోటేషన్లే చెబుతుంటే… సంభాషణ కంటే డైలాగ్ రైటింగ్ కనిపించడం మొదలవుతుంది. అక్కడే ప్రేక్షకుడికి కాస్త దూరం ఏర్పడుతుంది.
టాక్సిక్లో కొన్ని చోట్ల ఇదే జరిగింది. మాటల వెనుక ఉన్న ఆలోచన బలంగా ఉంది. పంచ్ కూడా ఉంది. కానీ తెలుగు నుడికారం, సహజత్వం, పాత్ర నోట పుట్టినట్టున్న భావన కొన్నిచోట్ల తగ్గిపోయింది. అంటే…
భావం పది మార్కులు. పంచ్ పది మార్కులు. కానీ తెలుగు సహజత్వానికి కొన్ని చోట్ల కోత. మరి “హింస నా మాతృభాష” సంగతేంటి? “హింస నా మాతృభాష. అదే ప్రపంచ భాష.” ఇలాంటి మాటను తీసుకుంటే…
ఇది సాధారణ తెలుగు కాదు. కానీ ఈ ఒక్క డైలాగ్ను తీసుకుని “కృతకమైన తెలుగు” అని చెప్పడం కష్టం. ఎందుకంటే ఇక్కడ రచయిత ఉద్దేశమే ఒక పాత్ర తన ప్రపంచాన్ని ఎంత క్రూరంగా చూస్తుందో చెప్పడం. “హింస నా మాతృభాష” అనేది వాస్తవానికి ఒక character statement. అది మనకు సహజంగా అనిపించకపోవడమే దాని ఉద్దేశం కూడా కావచ్చు.
మహిళా పాత్రల దగ్గర మరో రకం భాష . “ఈ మగవాళ్ల కోసం మనం ఆడవాళ్లం పోరాడి పోరాడి పరమ రాక్షసంగా తయారయ్యాం.” ఇక్కడ మాత్రం డైలాగ్కు ఒక సామాజిక కోణం కూడా ఉంది. ఇది కేవలం పంచ్ కాదు. ఒక అనుభవం నుంచి వచ్చిన కోపం. అందుకే ఇలాంటి డైలాగ్స్ను కేవలం “హెవీ తెలుగు” అంటూ పక్కన పెట్టడం కూడా సరైంది కాదు.
చివరికి… టాక్సిక్ డైలాగ్స్ గురించి తీర్పు “బాగున్నాయి” లేదా “బాలేవు” అని రెండు ముక్కల్లో చెప్పలేం. అవి ఆలోచనలో బలంగా ఉన్నాయి. పంచ్లో బలంగా ఉన్నాయి. క్యారెక్టరైజేషన్లో కొన్ని చోట్ల అద్భుతంగా ఉన్నాయి.
కానీ… తెలుగు నుడికారంలో, సహజ సంభాషణలో కొన్ని చోట్ల తడబడ్డాయి. అందుకే టాక్సిక్ డైలాగ్స్కు సరైన విమర్శ బహుశా ఇదే…..
చివరగా మరో మాట… సినిమా మొత్తం కేజీఎఫ్ హ్యాంగోవర్ అని చెప్పుకున్నాం కదా, డైలాగ్స్ కూడా అంతే… KGF: Chapter 1లోని చాలా ప్రసిద్ధమైన డైలాగ్. తెలుగులో సాధారణంగా ఇలా వినిపిస్తుంది: “హింసను నేను వ్యతిరేకిస్తాను… కానీ హింస నన్ను వదలడం లేదు.”
ఇదే KGF డైలాగ్ రైటింగ్లో ఉన్న ప్రత్యేకతకు మంచి ఉదాహరణ. టాక్సిక్లో “హింస నా మాతృభాష. అదే ప్రపంచ భాష.” అని వస్తే, KGFలో “హింసను నేను వ్యతిరేకిస్తాను… కానీ హింస నన్ను వదలడం లేదు” అంటాడు.
రెండింటి మధ్య చాలా చిన్నదైన, కానీ ముఖ్యమైన తేడా ఉంది. KGF డైలాగ్లో మాట కంటే పరిస్థితి మాట్లాడుతుంది. హింసను ఇష్టపడని వ్యక్తి, హింసాత్మక ప్రపంచంలోకి నెట్టబడుతున్న విరుద్ధత ఆ ఒక్క వాక్యంలోనే కనిపిస్తుంది. అందుకే అది సినిమాటిక్ అయినప్పటికీ సహజంగా అనిపిస్తుంది… కానీ హింస నా మాతృభాష అంటూ అదే టైపు డైలాగ్ టాక్సిక్లో రాశారు గానీ ఆర్టిఫిషియల్గా, అంత పేలలేదు..!!
Share this Article