తొమ్మిది పెళ్లిళ్ల ‘భరణం’ కేటుగత్తె..! మొత్తానికి ముసుగు తొలిగింది..!!

.

ఇప్పుడంతా ఏ సెలబ్రిటీ ఎన్ని పెళ్లిళ్లు చేసుకున్నాడు, ఎందరికి విడాకులు ప్రసాదించారు అనేదే చర్చ కదా… కానీ మన సమాజంలో పెళ్లిళ్ల దందా ఒకటి బాగా పుంజుకుందని తెలుసా..? అవును, మహిళలు పెళ్లి కాని యువకుల్ని బకరాల్ని చేసి, భరణాలు- మనోవర్తిల చట్రంలో ‘ముంచేసే’ దందా ఇది… తాజాగా ఓ వార్త… చదవండి… (ఇలాంటివి పలు కేసులు వెలుగు చూశాయి, ఇది తాజాది)…

అనుబంధాల పేరుతో అక్రమ దందా… తొమ్మిది పెళ్లిళ్ల ‘భరణం’ కేటుగత్తె ముసుగు తొలగించిన కర్ణాటక హైకోర్టు… 

పెళ్లి అనేది నూరేళ్ల పంట.. రెండు మనసుల సమాగమం. కానీ, కొందరికి మాత్రం అది లక్షలాది రూపాయలు పిండుకునే ‘చట్టబద్ధమైన’ అక్రమ వ్యాపారం. వివాహ వ్యవస్థను, మహిళా రక్షణ చట్టాల్లోని వెసులుబాటును అడ్డుపెట్టుకుని వరుస పెళ్లిళ్లతో భరణం దందా నడుపుతున్న ఒక ఘరానా కిలాడీ ఉదంతమిది. ఏకంగా తొమ్మిది సార్లు వివాహం చేసుకుని, ఏడో భర్తపై పెట్టిన ముసుగు కేసుతో తీగ లాగితే డొంకంతా కదిలింది. ఈ దందా కోణాన్ని తీవ్రంగా పరిగణించిన కర్ణాటక హైకోర్టు, సదరు భర్తకు విముక్తి కల్పిస్తూ సంచలనాత్మక తీర్పు వెలువరించింది.

నయా పంథాలో ‘వివాహ మాయాజాలం’
సాధారణంగా దొంగ పెళ్లిళ్ల కేటుగాళ్లు పెళ్లయిన వెంటనే నగలు, డబ్బులతో పారిపోవడం చూస్తుంటాం. కానీ ఈమె స్టైల్ వేరు. ఇది తక్షణ దోపిడీ కాదు… చట్టపరమైన రక్షణల వెనుక దాక్కుని ఆడే సుదీర్ఘమైన ఆర్థిక బ్లాక్‌మెయిలింగ్ గేమ్‌!

టార్గెట్ ఎంపిక & మోసం…: మొదట ఆర్థికంగా, సామాజికంగా నిలదొక్కుకున్న పురుషులను టార్గెట్ చేయడం. తన పూర్వ వివాహాల చరిత్రను పూర్తిగా దాచిపెట్టి, నమ్మించి పెళ్లి పీటలెక్కడం…

వ్యూహాత్మక కలహాలు…: వివాహమైన కొద్ది రోజులకే చిన్న చిన్న విషయాలకు రచ్చ చేయడం, గృహహింస జరుగుతోందంటూ నాటకమాడటం…

బ్లాక్‌మెయిలింగ్ & కేసులు…: వెంటనే పోలీసు స్టేషన్‌ను ఆశ్రయించి ఐపీసీ 498A (గృహహింస), కట్నం వేధింపులు, ప్రాణ బెదిరింపుల కింద కఠినమైన కేసులు బనాయించడం…

‘భరణం’ సెటిల్మెంట్…: సమాజంలో పరువు పోతుందనే భయంతోనో, కోర్టుల చుట్టూ తిరగలేకో భర్తలు లొంగిపోగానే భారీగా ‘కోర్టు బయట సెటిల్మెంట్’ లేదా నెలానెలా లావుపాటి భరణం (Maintenance) దండుకోవడం… డబ్బులు చేతికి రాగానే విడాకులు ఇచ్చి, మళ్లీ కొత్త వేటకు సిద్ధమవడం…

ఏడో భర్త ఎస్కేప్.. వెలుగులోకి దందా నమూనా
కర్ణాటకలోని విజయనగర జిల్లా హొసపేటకు చెందిన రాజా హుసేన్ అనే రాజకీయ నాయకుడు 2022లో ఈమె బుట్టలో పడ్డారు… వివాహమైన కొద్ది రోజులకే ఆమె ప్రవర్తనపై అనుమానం వచ్చి ఆరా తీయగా… తాను ఆమెకు ఏడో భర్తనని, అంతకుముందే ఆమె ఆరుగురిని పెళ్లి చేసుకుని డబ్బులు పిండి విడాకులు ఇచ్చిందని తెలిసి దిగ్భ్రాంతి చెందాడు…

ఆ వెంటనే ఆయన చట్టబద్ధంగా విడాకులు తీసుకుని బయటపడ్డాడు… అయితే, పాత అలవాటు ప్రకారం సదరు మహిళ ఉడుపి పోలీస్ స్టేషన్‌లో రాజా హుసేన్‌పై తీవ్రమైన క్రిమినల్ కేసు నమోదు చేయించింది… ఈలోపే ఆమె మరో ఇద్దరిని బురిడీ కొటించి, ప్రస్తుతం తొమ్మిదో భర్తతో నివాసముంటోంది…

హైకోర్టు ఘాటు వ్యాఖ్యలు: చట్టం వేధింపులకు సాధనం కాదు
తనపై మోపిన అబద్ధపు క్రిమినల్ కేసును రద్దు చేయాలని రాజా హుసేన్ కర్నాటక హైకోర్టును ఆశ్రయించాడు… జస్టిస్ ఎం. నాగప్రసన్న నేతృత్వంలోని ఏకసభ్య బెంచ్ ఈ కేసును సమగ్రంగా విచారించింది… మహిళ అనుసరిస్తున్న తీరును, పెళ్లిళ్ల వరుస క్రమాన్ని గమనించిన కోర్టు ఇది పక్కా పథకం ప్రకారం జరుగుతున్న వేధింపుగా గుర్తించింది…

ఆధారాలు లేవు…: మహిళ చేసిన ఆరోపణల్లో ఎలాంటి వాస్తవిక ప్రాతిపదిక గానీ, ఆధారాలు గానీ లేవని న్యాయమూర్తి స్పష్టం చేశారు…

చట్టాల దుర్వినియోగం…: “మహిళల రక్షణ కోసం, వారి శ్రేయస్సు కోసం రూపొందించిన చట్టాలు… కొందరి చేతుల్లో పురుషులను వేధించడానికి, చట్టపరమైన ప్రక్రియలను దుర్వినియోగం చేయడానికి (Abuse of process of law) సాధనాలుగా మారుతున్నాయి” అని హైకోర్టు ఆందోళన వ్యక్తం చేసింది…

కేసు రద్దు..: ఇప్పటికే విడాకులు పొంది, వేరే పెళ్లిళ్లు చేసుకున్న మహిళ.. పాత భర్తను ఆర్థికంగా, మానసికంగా వేధించడానికే ఈ కేసు పెట్టిందని తేలుస్తూ రాజా హుసేన్‌పై ఉన్న క్రిమినల్ అభియోగాలను రద్దు చేస్తూ తీర్పునిచ్చింది…

వ్యవస్థకు హెచ్చరిక
అనుబంధాలను అంగడి సరుకుగా మార్చి, భరణం పేరుతో జరుగుతున్న ఈ అక్రమ వ్యాపారానికి ఈ తీర్పు చెక్ పెట్టింది… చట్టాలు బాధితులకు రక్షణగా ఉండాలి తప్ప, కేటుగాళ్ల దోపిడీకి ఆయుధాలుగా మారకూడదనే బలమైన సందేశాన్ని ఈ ఘటన స్పష్టం చేస్తోంది…