.
( దోగిపర్తి సుబ్రహ్మణ్యం ) ……. దాసరి మార్క్ సినిమా బుచ్చిబాబు . అన్ని పాటలూ ఆయనే వ్రాసుకున్నారు . ఓ అతిధి పాత్రలో MLA బూతుల పాపయ్యగా కూడా నటించారు . టోటల్ కధ , స్క్రీన్ ప్లే , మాటలు , పాటలు , నటన , దర్శకత్వం అన్నీ ఆయనే . షష్టావతారాలు .
ఆ ప్రజాప్రతినిధి పాత్రలో ఓటర్లు ఎంత అమాయకులో , చైతన్యరహితులో కూడా ఉపన్యాసం ఇస్తారు . ప్రజాప్రతినిధుల మీద వ్యంగ్య బాణాలను విసురుతారు . అన్నపూర్ణ ఆర్ట్స్ బేనరుపై నిర్మించబడిన ఈ బుచ్చిబాబు సినిమాకు అక్కినేని కుమారులు ఇద్దరూ నిర్మాతలు . తారాగణం భారీగా ఉన్నా సినిమా మాత్రం ఎబౌ ఏవరేజుగా ఆడింది .
Ads
మాంగల్యబలం సినిమాలోలాగా చిన్నపిల్లలుగా ఉన్నప్పుడు బావామరదళ్ళు బొమ్మల పెళ్ళి ఆడుకుంటూ మాంగల్యధారణ చేసేసుకుంటారు . అమెరికా నుండి తిరిగొచ్చిన హీరో చిన్నప్పుడు తాను తాళి కట్టిన మరదల్నే పెళ్లి చేసుకునేందుకు డిసైడ్ అయిపోతాడు .
అందుకోసం హీరోయిన్ ఇంట్లో వంటవాడి అవతారం ఎత్తి , ఎత్తుల మీద ఎత్తులు వేసి , చివరకు కధ సుఖాంతాన్ని చేస్తాడు . సినిమాలో ప్రధాన కార్యక్రమం అత్త గారి మెడను వంచటం . ఆమె గర్వాహంకారాల భగ్నం . టూకీగా ఇదీ కధ .
దాసరి వ్రాసిన పాటలకు మసాలా సంగీతాన్ని చక్రవర్తి అందించారు . చక్రవర్తి సంగీతం వలనే సినిమా ఎబౌ ఏవరేజుగా ఆడింది . లేకుంటే సూపర్ ఫ్లాప్ అయిఉండేది . గుండమ్మ కధ సినిమాలో అంజి పాత్రలో యన్టీఆర్ సూర్యకాంతాన్ని గుండక్కా అని పిలిచినట్లు ఈ బుచ్చిబాబు సినిమాలో మర్యాదరామన్న పాత్రలో ANR సూర్యకాంతాన్ని వంటవాడయినా అత్తగారు అని పిలుస్తారు . ANR కి కొండదొర మారువేషం , ఆ మారువేషంలో హీరోయిన్ని టీజ్ చేసే పాటొకటి కూడా ఉంటుంది .
ఈ బుచ్చిబాబు సినిమాలో హీరోకి పద్యాలు కూడా ఉంటాయి . వాటిని దాసరి వ్రాయలేదు . పాలగుమ్మి పద్మరాజు వ్రాసారు . ఏడు పాటలూ హిట్టే . పసుపు పచ్చతాడు పసుపు కొమ్మకు తోడు , ఎర్రకోక కట్టినావె పిట్టా , చందమామ పైటేసింది , సిత్తరాల తోటలో ఉత్తరాలు దొరికాయి నువ్వు రాసావా నేను రాసానా , గుండాబత్తుల బుచ్చెమ్మా , వాల్మీకి ఇంటిలో లవకుశులు పుట్టారు , కంగారవుతోంది బేజారవుతోంది పాటలు థియేటర్లలో వినబుల్ గా ఉండటమే కాకుండా బయట కూడా హిట్టయ్యాయి . డ్యూయెట్ల చిత్రీకరణ చాలా బాగుంటుంది .
హీరోయిన్ గా నటించిన జయప్రదది గ్లామర్ పాత్ర . అందగత్తె కదా ! సినిమాలో అందం పార్టుని ఆమె ఒక్కతే అందించారు . ఇతర పాత్రల్లో గుమ్మడి , ప్రభాకరరెడ్డి , రావి కొండలరావు , మోహన్ బాబు , కె వి చలం , చలం , నిర్మలమ్మ , గీత , పుష్పలత , రమాప్రభ నటించారు . నూతన నటుడు రాజా . అతిధి పాత్రల్లో దాసరి , రాజబాబు , సుజాత , మురళీమోహన్లు కనిపిస్తారు . మోహన్ బాబు టిపికల్ & డిఫరెంట్ డైలాగ్స్ డెలివరీ ప్రేక్షకులకు విసుగుని కలిగిస్తాయి .
అయిననూ ANR , జయప్రదల జోడీ , చక్రవర్తి సంగీతం వలన సినిమా కమర్షియల్ గా సక్సెస్ అయింది . సినిమా , పాటల వీడియోలు యూట్యూబులో ఉన్నాయి . మార్చి 1980 లో విడుదల అయిన ఈ సినిమా అప్పట్లో చూడని అక్కినేని అభిమానులు , జయప్రద అందపిపాసులు ఇప్పుడు చూసేయవచ్చు . An entertaining , feel good and comic movie . #తెలుగుసినిమాలసింహావలోకనం #తెలుగుసినిమాలు
గమనిక …. సిత్తరాల తోటలో ఉత్తరాలు దొరికాయి వంటి పాటల్లో సాహిత్య వాసనల కోసం అన్వేషణ అర్థరహితమని భావించ మనవి….
Share this Article