దృఢం..! జీతూ జోసెఫ్ మార్క్ ‘దృశ్యం’ లేదు… దృఢంగా లేదు…

.

ఓటీటీల్లో ప్రతివారం డజన్ల కొద్దీ సినిమాలు వస్తుంటాయి. వాటిలో చాలా వరకు వచ్చాయన్న విషయం కూడా తెలియకుండా వెళ్లిపోతాయి. “దృఢం” పరిస్థితి కూడా అలాంటిదే అయ్యుండేది. కానీ “దృశ్యం” దర్శకుడు జీతూ జోసెఫ్ పేరు సమర్పణ పేరుతో ఈ ప్రాజెక్ట్‌తో జతకావడం, అదీ మలయాళ క్రైమ్ థ్రిల్లర్ కావడంతో కాస్త అటెన్షన్ దక్కింది. ఎందుకంటే మలయాళీలు థ్రిల్లర్ తీస్తే… కథ ఎంత చిన్నదైనా ప్రేక్షకుడిని చివరి వరకు కుర్చీలో కూర్చోబెట్టగలరన్న పేరు ఉంది. మరి “దృఢం” కూడా ఆ కోవలో చేరిందా?

కథ విషయానికి వస్తే… కేరళలోని ఓ అందమైన, ప్రశాంతమైన హిల్ స్టేషన్‌కు కొత్త ఎస్ఐగా విజయ్ (షేన్ నిగమ్) వస్తాడు. అక్కడ పెద్దగా నేరాలు ఉండవు. పోలీస్ స్టేషన్ కూడా ప్రశాంతంగానే నడుస్తుంటుంది. కానీ విజయ్ బాధ్యతలు చేపట్టిన కొద్ది రోజులకే పరిస్థితి మారిపోతుంది. ఒక గుర్తుతెలియని శవం బయటపడుతుంది. దాని వెనక ఉన్న మిస్టరీని ఛేదించేలోపే ఓ ఫైనాన్స్ కంపెనీలో భారీ దోపిడీ జరుగుతుంది. ఆ తర్వాత మరో హత్య. అసలు ఈ సంఘటనలన్నింటికీ సంబంధం ఉందా? లేక వేర్వేరు కేసులా? అనే దిశగా కథ సాగుతుంది.

సినిమాకు ప్రధాన బలం షేన్ నిగమ్ నటనే. కొత్తగా ఉద్యోగంలో చేరిన పోలీస్ అధికారికి ఉండే ఆత్మవిశ్వాసం, అయోమయం, ఒత్తిడి… ఇవన్నీ అతను చాలా సహజంగా చూపించాడు. కేసు క్లిష్టమవుతున్న కొద్దీ అతని పాత్రలో వచ్చే మార్పులు కూడా బాగానే కనిపిస్తాయి. మిగతా నటీనటులు తమ పరిధిలో న్యాయం చేశారు.

అయితే సినిమా అసలు సమస్య ఎక్కడంటే… కథలో కాదు, కథనం దగ్గర. మొదటి అరగంటలో దర్శకుడు ప్రేక్షకుడిని కథలోకి తీసుకెళ్లడానికి చాలా సమయం తీసుకున్నాడు. సరే, థ్రిల్లర్ కాబట్టి బిల్డప్ ఇస్తున్నాడనుకుంటే… రెండో భాగంలో కూడా అదే నెమ్మదిగా కొనసాగుతుంది. వరుసగా నేరాలు జరుగుతున్నా, ఇన్వెస్టిగేషన్ సాగుతున్నా, ప్రేక్షకుడిని కుర్చీ అంచున కూర్చోబెట్టే ఉత్కంఠ మాత్రం పెద్దగా కనిపించదు.

మధ్యలో వచ్చే ప్రేమకథ కూడా కథకు పెద్దగా ఉపయోగపడినట్టు అనిపించదు. అసలు మిస్టరీపై దృష్టి పెట్టాల్సిన సమయంలో అది బ్రేక్ వేసిన భావన కలుగుతుంది. దర్శకుడు మొత్తం సినిమాను ఒక క్లైమాక్స్ ట్విస్ట్ కోసం దాచిపెట్టినట్టు అనిపిస్తుంది.

అయితే చివరి ఇరవై నిమిషాల్లో సినిమా కొంత గేర్ మారుస్తుంది. అప్పటివరకు చెల్లాచెదురుగా కనిపించిన కొన్ని అంశాలు ఒక్కసారిగా కలుస్తాయి. క్లైమాక్స్ ట్విస్ట్ కూడా బాగానే పని చేస్తుంది. సినిమా ముగిసిన తర్వాత “ఈ కోణంలో ఆలోచించలేదే” అనిపించే అవకాశం ఉంది. కానీ అక్కడికి చేరుకునే ప్రయాణమే కొంచెం ఓపికను పరీక్షిస్తుంది.

మొత్తానికి “దృఢం” నాసిరకం సినిమా కాదు. మంచి ఐడియా ఉంది. ఇంట్రెస్టింగ్ మిస్టరీ కూడా ఉంది. కానీ మలయాళ థ్రిల్లర్లకు అలవాటు పడిన ప్రేక్షకులు ఆశించే ఆ పదునైన కథనం, ఉత్కంఠభరితమైన నెరేషన్ ఇందులో కనిపించవు. క్లైమాక్స్ బాగుంది కాబట్టి సినిమా పూర్తిగా నిరాశపరచదు. అదే సమయంలో “వావ్” అనిపించే స్థాయికీ వెళ్లదు.

అందమైన లొకేషన్లు, మంచి కథా బీజం, షేన్ నిగమ్ నటన… ఇవన్నీ ఉన్నా, నత్తనడకన సాగే కథనం సినిమాను వెనక్కి లాగాయి. క్లైమాక్స్ కోసం ఓపికగా ఎదురుచూడగలిగితే ఒకసారి చూడొచ్చు. కానీ “దృశ్యం” స్థాయి మాయాజాలం ఆశిస్తే మాత్రం నిరాశ తప్పదు…