‘గూగుల్ మ్యాప్స్‌’కు చిక్కిన సూపర్‌స్టార్‌… సరైన దారి తెలియక తిప్పలు …

.

అది టెక్నాలజీ యుగం. ఏ మూలకు వెళ్లాలన్నా, ఏ చిరునామా వెతకాలన్నా మన చేతిలోని స్మార్ట్‌ఫోన్, అందులో ‘గూగుల్ మ్యాప్స్’ ముందుంటాయి. కానీ, కొన్నిసార్లు ఈ డిజిటల్ దారి చూపులే మనుషులను ముప్పుతిప్పలు పెడుతుంటాయి.

దారులు మార్చి దారితప్పించడం, తెలియని ఊర్లలో గంటల తరబడి తిప్పడం చాలామందికి ఎదురయ్యే అనుభవమే. విచిత్రం ఏమిటంటే.. సరిగ్గా ఇదే సమస్య ఏకంగా ఓ పాన్-ఇండియా సూపర్‌స్టార్‌ను కూడా ముప్పతిప్పలు పెట్టింది. చివరకు టెక్నాలజీ చూపించలేని దారిని, ఓ సామాన్య యువకుడి బైక్ చక్రాలు చూపించాల్సి వచ్చింది!

మలయాళ మెగాస్టార్ మమ్ముట్టికి తమిళనాడులో తాజాగా ఇలాంటి విచిత్రమైన, ఆసక్తికరమైన అనుభవమే ఎదురైంది. మమ్ముట్టి కంపెనీ నిర్మాణంలో, నితీష్ సహదేవ్ దర్శకత్వంలో ఓ సినిమా షూటింగ్ కారైకుడిలో జరుగుతోంది. షూటింగ్ ముగిసిన తర్వాత మమ్ముట్టి, నిర్మాత ఆంటో జోసెఫ్, నటుడు రమేష్ పిషారడిలతో కలిసి కారులో కేరళకు బయలుదేరారు.

• తెల్లవారుజామున సుమారు 3:30 గంటల సమయంలో తిరుపత్తూరు సమీపంలో హైవే బ్లాక్ కావడంతో వారి ప్రయాణానికి ఆటంకం ఏర్పడింది. దాంతో డ్రైవర్ గూగుల్ మ్యాప్స్‌ను నమ్ముకుని ప్రత్యామ్నాయ మార్గం వెతికాడు. మ్యాప్స్ చెప్పినట్లుగా ముందుకు వెళ్తే.. కొద్దిసేపటి తర్వాత మళ్లీ మొదటికే వస్తూ పదేపదే అదే ప్రాంతానికి చేరుకోవడం ప్రారంభమైంది. అలా దాదాపు గంటపాటు ఆ చీకటి తెల్లవారుజామున దారితెన్ను తెలియక ఇబ్బంది పడ్డారు. పరిస్థితి చూసి చివరకు విసుగొచ్చి, తిరిగి కారైకుడిలోని తమ రూమ్‌కే వెళ్లిపోదామని అనుకున్నారు.

అదే సమయంలో పట్టమంగళం వద్ద ఓ పెట్రోల్ బంక్ కనిపించడంతో అక్కడ ఆగి దారి అడగాలని నిర్ణయించుకున్నారు. అక్కడే ఉన్న యువకులను డ్రైవర్ సంప్రదించగా.. వారిలో పాండియన్ అనే యువకుడు కారులో ఉన్నది సాక్షాత్తు మమ్ముట్టిని గుర్తించి ఆశ్చర్యపోయాడు.

వారి ఇబ్బందిని అర్థం చేసుకున్న పాండియన్, ఎలాంటి సంకోచం లేకుండా వెంటనే తన మోటార్ బైక్‌ను స్టార్ట్ చేశాడు. “నన్ను ఫాలో అవ్వండి.. నేను దారి చూపిస్తా” అంటూ ముందుకు కదిలాడు. గూగుల్ మ్యాప్స్ సైతం విఫలమైన ఆ రహదారిలో, తెల్లవారుజామున సుమారు 10 కిలోమీటర్ల మేర తన బైక్‌పై ముందుండి మమ్ముట్టి కారుకు వేరే దారి చూపించాడు. సరిగ్గా హైవే ఎక్కాల్సిన సరైన మార్గంలోకి చేర్చిన తర్వాత, కేరళ వెళ్లే దిశను స్పష్టంగా వివరించి మరీ వీడ్కోలు చెప్పాడు.

సమయానికి ఆదుకున్న ఆ యువకుడి మంచితనానికి మమ్ముట్టి మనసు హత్తుకుపోయారు. వెంటనే కారు దిగి పాండియన్‌ను అప్యాయంగా హత్తుకున్నారు. పేరు అడిగి తెలుసుకుని, ఆయనతో కలిసి ఓ సెల్ఫీ కూడా దిగి తన ఆప్యాయతను చాటుకున్నారు.

ఎంతటి సాంకేతిక పరిజ్ఞానం ఉన్నా, అంతులేని అనుభవాలున్న పెద్దమనుషులైనా.. కొన్నిసార్లు జీవితంలో స్థానిక మనుషుల సహకారం ఎంత అవసరమో ఈ సంఘటన మరోసారి నిరూపించింది. టెక్నాలజీ విఫలమైన చోట, ఓ సామాన్య యువకుడు అందించిన చిన్న సాయం.. ఒక సూపర్‌స్టార్ ప్రయాణాన్ని సులభతరం చేయడమే కాక, సోషల్ మీడియాలో అందరి మనసులు గెలుచుకుంది.