ఈ ప్రభుత్వ శాఖ తరఫున ఆంధ్రజ్యోతికి భారీ అభిమాన ప్రకటన…

.

ఉంటాయి ఉంటాయి… ఎందుకు ఉండవు..? ప్రధాన ఆదాయ ప్రభుత్వ శాఖలకు అభిమాన పత్రికలు కూడా ఉంటాయి… సందర్భం వచ్చినప్పుడు వాణిజ్య ప్రకటనలు ఇచ్చి, అడిగినంత టారిఫ్ చెల్లించి మరీ తమ అభిమానాన్ని చాటుకుంటాయి…

అవును, ఇదేమిటిలా అని నొసలు విరవనక్కర్లేదు… ఆంధ్రప్రదేశ్‌లో అదంతే… ఎవరో ఆదేశిస్తారు, ఎవరో ఏదో ప్రభుత్వ శాఖ నుంచి యాడ్ వస్తుంది… పబ్లిష్ చేస్తారు… అంతా మాయ… అసలు ఒక ప్రభుత్వ శాఖ ‘అభిమాన పత్రిక’గా ప్రస్తావిస్తూ యాడ్ ఇవ్వడం అనైతికమే కాదు… అవాంఛనీయం కూడా…

అసలు ఈ రోజుల్లో నిష్పక్షపాత పత్రిక అంటూ ఉంటేగా.., ఏదో ఓ పార్టీకి సొంతమో, కొమ్ముకాసేవో… తెలుగుదేశం కూటమి అధికారంలో ఉంది కదా ఇప్పుడు… ఇంకేం..? ప్రభుత్వ శాఖలన్నింటికీ ఈనాడు, టీవీ5, ఆంధ్రజ్యోతి ఎట్సెట్రా మీడియా హౌజులన్నీ అభిమాన మీడియా సంస్థలే అయిపోయాయి…

16 ఏళ్ల ఏబీఎన్ పాఠకులపై చెరగని ముద్ర అంటూ సాక్షాత్తూ చంద్రబాబూ ట్వీట్ శుభాకాంక్షలు చెబుతాడు… 23 ఏళ్ల అభిమాన ఆంధ్రజ్యోతి అని రిజిస్ట్రేషన్లు, స్టాంపుల శాఖ కూడా తన అభిమానాన్ని ఓ యాడ్ ఇచ్చి ప్రకటించుకుంది… ఇవన్నీ సరే…

మరీ దరిద్రంగా కనిపిస్తున్నది ఏమిటంటే… ఈ యాడ్ విజయవాడ తూర్పు జోన్ పేజీలో కనిపించింది… ఆ ఇచ్చేదేదో మెయిన్ పేజీలో వేయొచ్చుగా… పైగా అందులో ఆంధ్రజ్యోతి బాస్ రాధాకృష్ణ ఫోటో ప్రముఖంగా, ఓ పావు పేజీ పరిచేసి… ఫాఫం, చంద్రబాబు బొమ్మను, ఆ శాఖ మంత్రి అనగాని బొమ్మను కనీకనిపించని స్టాంపు సైజులో ‘ఏదో మొహమాటానికి’ అన్నట్టు పబ్లిష్ చేశారు…

అన్నింటికన్నా చిత్రంగా కాస్త భూమిలో చతురస్రాకారపు బిట్ కత్తిరించి, దానిపై మ్యాప్స్ తరహాలో దాన్ని పిన్ చేయడం… మిగతా ఏదేదో మ్యాటర్, ఆ శాఖ సేవలు ఇంగ్లిషులో… వివిధ సందర్భాల్లో ఆయా పత్రికలు ప్రభుత్వ శాఖల నుంచి యాడ్స్ తీసుకోవడం రెండు తెలుగు రాష్ట్రాల్లోనూ ఉన్నదే…

కానీ మరీ ఇంత భారీ అభిమానాన్ని చాటుకోవడం బహుశా ఇదే మొదటిసారేమో..!! పోనీ, ఇదేదో సమాచార శాఖ నుంచి ఇచ్చినా కాస్త బాగుండేదేమో..!!