.
కెప్టెన్సీకి నేను రెడీ’ అని స్మృతి చెప్పింది… మూడు నెలలకే హర్మన్ తప్పుకుంది! అంటే కెప్టెన్సీ మార్పు ఎప్పటి నుంచో ఆలోచనలో ఉందా? ఎందుకు? చిరస్మరణీయమైన విజయాల్ని అందించిన కెప్టెన్‌ను ఎందుకు తప్పించినట్టు..? తనంతట తానే తప్పుకున్నట్టు ఎందుకు ప్రకటింపజేసినట్టు?
భారత మహిళా క్రికెట్‌లో కెప్టెన్సీ మారింది. హర్మన్‌ప్రీత్ కౌర్ మూడు ఫార్మాట్ల కెప్టెన్సీ నుంచి తప్పుకుంది. 37 ఏళ్ల హర్మన్ స్థానంలో ఇప్పుడు 30 ఏళ్ల స్మృతి మంధాన నాయకత్వం వహించే అవకాశాలు కనిపిస్తున్నాయి. అయితే ఇది అక్టోబర్ 6న ఒక్కసారిగా తెరపైకి వచ్చిన పరిణామమా? లేక కొంతకాలంగా భారత మహిళల క్రికెట్‌లో నాయకత్వ మార్పు గురించి ఆలోచన మొదలైందా?
Ads
ఈ ప్రశ్నకు ఆసక్తికరమైన సమాధానం స్మృతి మంధాన చెప్పిన ఒక్క మాటలోనే కనిపిస్తుంది.
జూలైలో హర్మన్ గైర్హాజరైతే కెప్టెన్సీ బాధ్యతలు చేపట్టేందుకు సిద్ధమేనా అని అడిగితే స్మృతి ఇచ్చిన సమాధానం చాలా సింపుల్‌గా ఉంది.
“Yes, of course. I am ready.”
అది హర్మన్‌ను తప్పించాలని తాను కోరుకుంటున్నానన్న ప్రకటన కాదు. కెప్టెన్‌గా అవకాశం వస్తే బాధ్యత తీసుకోవడానికి తాను సిద్ధంగా ఉన్నానన్న సహజమైన సమాధానం. కానీ ఆ మాటకు ఇప్పుడు కొత్త అర్థం వస్తోంది. ఎందుకంటే అప్పటికి స్మృతి వైస్ కెప్టెన్ మాత్రమే. ఇప్పుడు హర్మన్ కెప్టెన్సీ నుంచి తప్పుకుంది…
సాధారణంగా ఓ సక్సెస్‌ఫుల్ కెప్టెన్ ఉన్నప్పుడు, నేను కెప్టెన్సీకి రెడీ అనే మాట సహజంగా ఓ జట్టు సభ్యురాలి నుంచి రాదు, కానీ స్మృతికి అన్నీ తెలుసు… అందుకే ఆ వ్యాఖ్య చేసింది అని ఇప్పుడు అనుకోవాలి మనం… నిజానికి కెప్టెన్సీ మార్పు ప్రచారానికి మరింత బలం చేకూర్చిన వ్యక్తి మాజీ భారత కెప్టెన్ డయానా ఎడుల్జీ.
జూలైలోనే ఎడుల్జీ ఒక కీలకమైన సూచన చేసింది. స్మృతిని ఇంకా ఎక్కువ కాలం వైస్ కెప్టెన్‌గా ఉంచడం సరికాదని, కనీసం వైట్‌బాల్ క్రికెట్‌లో ఆమెకు నాయకత్వం అప్పగించాల్సిన సమయం వచ్చిందని చెబుతూ, అవసరమైతే హర్మన్‌ను టెస్టు కెప్టెన్‌గా కొనసాగించవచ్చని ఆమె సూచించింది.
సెప్టెంబర్‌కు వచ్చేసరికి ఎడుల్జీ మాట మరింత స్పష్టమైంది. “స్మృతిని చాలా కాలంగా ఆపుతున్నాం” అన్నది ఆమె వాదన. స్మృతి ఇప్పుడే 30లోకి వచ్చిందని, హర్మన్ 37లో ఉందని గుర్తు చేస్తూ, భవిష్యత్ నాయకత్వం కోసం ఇప్పటి నుంచే మార్పు మొదలుపెట్టాలని ఆమె అభిప్రాయపడింది. హర్మన్‌ను కెప్టెన్సీ ఒత్తిడి నుంచి తప్పించి, సీనియర్ బ్యాటర్‌గా కొనసాగించాలి అన్నదే ఎడుల్జీ మాట.
ఇక్కడే ఈ మొత్తం కథలో అసలు ఆసక్తి ఉంది. స్మృతికి 30. హర్మన్‌కు 37. ఏడేళ్ల వయసు తేడా పెద్ద విషయం అనిపించకపోవచ్చు. కానీ అంతర్జాతీయ జట్టుకు కెప్టెన్‌ను ఎంచుకునేటప్పుడు అది భవిష్యత్ ప్రణాళికలో మాత్రం కీలకంగా మారుతుంది. ముఖ్యంగా తదుపరి ప్రపంచకప్‌లను దృష్టిలో పెట్టుకుంటే, ఒక కొత్త కెప్టెన్‌కు నాలుగైదేళ్ల సమయం ఇచ్చి, ఆమె నాయకత్వంలో మరో తరం ఆటగాళ్లను తయారు చేయడం అవసరం అవుతుంది.
అదే ఎడుల్జీ చెప్పిన ప్రధాన పాయింట్.
హర్మన్‌ను ఎందుకు తీసేయాలి? అన్నది కాదు.
స్మృతిని ఇంకా ఎంతకాలం ఆపాలి? అన్నది.
అదే సమయంలో హర్మన్ కెప్టెన్సీని కూడా తక్కువ చేసి చూడాల్సిన అవసరం లేదు. ఆమె నాయకత్వంలో భారత మహిళల జట్టు తొలిసారి వన్డే ప్రపంచకప్ గెలిచింది. ఆసియా క్రీడల్లోనూ భారత్‌కు వరుసగా రెండో స్వర్ణం వచ్చింది. అంటే కెప్టెన్‌గా ఆమె ప్రయాణాన్ని ఒక వైఫల్యంతో కొలవడం సరికాదు. అయితే క్రికెట్‌లో ప్రతి విజయవంతమైన కెప్టెన్సీకి ఒకరోజు succession planning అవసరమే.
విరాట్ కోహ్లీ, రోహిత్ శర్మ కెప్టెన్సీ చికాకుల నుంచి తప్పుకుని, వన్డే జట్టు సభ్యులుగా కొనసాగడం లేదా..? సేమ్, హర్మన్..!
మరి ఆ తర్వాత సహజమైన ప్రశ్న — స్మృతి ఎందుకు?
భారత జట్టు నాయకత్వ బృందంలో ఇప్పటికే ఉంది. హర్మన్ గైర్హాజరైన సందర్భాల్లో భారత్‌కు కెప్టెన్‌గా వ్యవహరించింది. అంతేకాదు, WPLలో రాయల్ ఛాలెంజర్స్ బెంగళూరు కెప్టెన్‌గా కూడా ఆమెకు అనుభవం ఉంది. అంటే జాతీయ జట్టు డ్రెస్సింగ్ రూమ్, అంతర్జాతీయ క్రికెట్, ఫ్రాంచైజీ క్రికెట్ — మూడు స్థాయిల్లోనూ నాయకత్వ అనుభవం ఉంది.
ఒకవైపు హర్మన్‌కు ఘనమైన కెప్టెన్సీ వారసత్వం, మరోవైపు స్మృతికి సిద్ధంగా ఉన్న నాయకత్వం.
ఈ రెండింటినీ కలిపి చూస్తే, అక్టోబర్ 6న జరిగిన మార్పు పూర్తిగా అనూహ్యంగా కనిపించడం లేదు.
ఇది ఒక కెప్టెన్‌ను తొలగించిన కథ కాదు.
ఒక గొప్ప కెప్టెన్ తర్వాతి కెప్టెన్ కోసం దారి వదిలిన కథ.
మరి ఆ దారిలో నిలబడి ఉన్నది ఎవరో కూడా మూడు నెలల క్రితమే చెప్పేసింది…
“Yes, of course. I am ready!”
Share this Article