Subramanyam Dogiparthi….. మూడు సెంటర్లలో వంద రోజులు ఆడిన హిట్ సినిమా 1970 లో వచ్చిన ఈ పెత్తందార్లు సినిమా . NTR వియ్యంకులు అయిన యు విశ్వేశ్వరరావు నిర్మాత . సి యస్ రావు దర్శకులు . ఓ చిన్న గ్రామంలో బడా పెత్తందారు నాగభూషణం . ఆయన ముఠాలో రావు గోపాలరావు , అల్లు రామలింగయ్య , ముక్కామల , ధూళిపాళ , సత్యనారాయణ ఉంటారు .
ఆ పెత్తందారు ఆ గ్రామంలో చేయని అఘాయిత్యం ఉండదు . ఆ అఘాయిత్యాలను అరికడతాడు ఆయన మేనల్లుడు , గ్రామ యువజన సంఘం నాయకుడు NTR . ఇలాంటి సినిమాలు ఆయనకు కొట్టిన పిండి . ఇలాంటి కధాంశం ఉన్న సినిమాలు ఎన్ని నటించాడో !
నాకయితే NTR ఈ సినిమాలో అంత గొప్పగా ఏం నటించలేదనే అనిపిస్తుంటుంది . స్క్రీన్ ప్లే కూడా అంత గొప్పగా ఏం ఉండదు . కె వి మహదేవన్ సంగీత దర్శకుడు అయినా ఒక్క ఏకాంత సేవకు వేళాయెరా అనే పాట తప్పించి మిగిలిన పాటలు హిట్ కాలేదు . అయినా సినిమా హిట్టయంది . సినిమాలు , జీవితాలు సక్సెస్ కావాలంటే సుడి / అదృష్టం కూడా ఉండాలి .
Ads
బుర్ర కధ ఒకటి బాగుంటుంది . NTR బుర్ర కధలో నటించిన సినిమా ఇదొక్కటేనేమో ! శాంతి , అహింసలను బోధించిన జీసస్ క్రైస్ట్ , మహాత్మాగాంధీ ఎలా ఘోరంగా హత్య చేయబడ్డారో , శిలువ వేయబడ్డారో ఆ బుర్రకధలో కీర్తించడం ఉంటుంది . బహుశా ఇప్పటి సినిమాలలో అలాంటి సీన్లు చూడటం అసంభవం ఏమో ! ముఖ్యంగా మహాత్మాగాంధీ గురించి . నయా చరిత్రకారులు , భాష్యకారులు వచ్చారు కదా !
NTR , విజయనిర్మల , శోభన్ బాబు , సంధ్యారాణి , రాజబాబు , రమాప్రభ , ప్రభాకరరెడ్డి, సావిత్రి జంటలు . విలన్ల గురించి ముందే చెప్పేసా . ఇతర పాత్రల్లో నాగయ్య , హేమలత , చలపతిరావు , విజయలలిత , బేబీ రాణి ప్రభృతులు నటించారు . రేలంగి పోలీసు ఇనస్పెక్టర్ పాత్ర . చివర్లో తెలుస్తుంది . ముందరంతా పిచ్చోడి లాగా గ్రామంలో తిరుగుతుంటాడు . వేమన పద్యాలు పాడుతూ చురకలు అంటిస్తుంటాడు . మంచి పాత్ర . విజయలలిత హొయలు బాగుంటాయి . జ్యోతిలక్ష్మి గ్రూప్ డాన్స్ బాగుంటుంది .
మొత్తం మీద సినిమా హిట్టయిన సినిమా . డబ్బులు , పేరు రెండూ వచ్చాయి . మా నరసరావుపేటలోనే చూసా . వెంకటేశ్వర పిక్చర్ పేలస్ అని గుర్తు . యూట్యూబులో ఉంది . NTR అభిమానులు , విజయలలిత , నాగభూషణం అభిమానులు చూడవచ్చు . 1970s దశకం అంతా నాగభూషణానిదే . 1980s వచ్చేటప్పటికి రావు గోపాలరావు వచ్చేసాడు . #తెలుగుసినిమాలసింహావలోకనం #తెలుగుసినిమాలు
Share this Article