‘ పెద్ది సినిమా చూడకపోతే చంపుతా ఒక్కొక్కడినీ’… ఓ మానసిక వైకల్యం..!!

.

( సైలాలజిస్ట్ విశేష్ ) ….  ‘సెలబ్రిటీ వర్షిప్’ ఉన్మాదంతో నలిగిపోతున్న Gen Z!
సామాజిక మాధ్యమాల్లో వైరల్ అవుతున్న ఈ చిన్న వీడియో క్లిప్, పైకి కేవలం ఒక థియేటర్ బయట జరిగిన తమాషాలా లేదా ఒక సాధారణ సినిమా అభిమాని ఆవేశంలా అనిపించవచ్చు.
కానీ, ఒక తండ్రిగా, సమాజ గమనాన్ని గమనిస్తున్న సైకాలజిస్ట్‌గా ఈ దృశ్యం నా గుండెల్లో తీవ్రమైన అలజడిని, ఆందోళనను, ఒక రకమైన భయాన్ని రేకెత్తించింది.

చదువుకోవాల్సిన వయసులో ఉన్న ఒక యువతి, సమాజంలో బాధ్యతాయుతమైన పౌరురాలిగా ఎదగాల్సిన ఒక ఆడపిల్ల… కళ్లల్లో రౌద్రం, గొంతులో వీధి రౌడీలను తలపించే ఉద్రేకం నింపుకుని, ఒక సినిమా చూడకపోతే ‘ఒక్కొక్కడిని చంపేస్తా’ అంటూ బహిరంగంగా మైకుల ముందు ఊగిపోతోంది. అంతకంటే ఘోరం… ఆమె వెనుక నిలబడి, కన్నకూతురి ఉన్మాదాన్ని చూసి సరిదిద్దాల్సింది పోయి, గర్వంతో ముసిముసి నవ్వులు నవ్వుతున్న తల్లి! (ఏం తల్లివి తల్లీ)…

ఇది కేవలం ఒక సినిమా పిచ్చి కాదు. ఇది మన పెంపకంలో జరిగిన అతిపెద్ద వైఫల్యం, మన విద్యావ్యవస్థలోని లోపం, మన సమాజాన్ని పట్టి పీడిస్తున్న ఒక మానసిక రోగానికి నిదర్శనం. దీని వెనుక ఉన్న సామాజిక, మానసిక కోణాలను చర్చించుకోవాల్సిన అవసరం ఎంతైనా ఉంది.

1️⃣ Celebrity Worship Syndrome – వినోదం నుండి ఉన్మాదంలోకి!
సినిమా అనేది ఒక వినోద సాధనం. కానీ మన సమాజంలో అది ఒక Cult గా, ఒక మతంగా మారిపోయింది. సైకాలజీలో దీన్ని ‘సెలబ్రిటీ వర్షిప్ సిండ్రోమ్’ (CWS) అంటారు. ఇది ఒక రకమైన Obsessive-Compulsive tendency.

🔹Identity Crisis: ఈ వ్యాధి బారిన పడిన యువతకు తమకంటూ ఒక సొంత అస్తిత్వం, సాధించాలనే లక్షణాలు ఉండవు. తమ జీవితాల్లోని శూన్యాన్ని భర్తీ చేసుకోవడానికి తెరపై ఉండే నటులను ఆశ్రయిస్తారు. తద్వారా తమ సొంత అస్తిత్వాన్ని పూర్తిగా కోల్పోతారు.

🔹భ్రమల్లో బతకడం (Parasocial Identification): “నేను చెప్తున్నాను, నేను రామ్ చరణ్ ఫ్యాన్ అయ్యాను…” అన్న ఆమె మాటల్లో ఒక నటుడి విజయాన్ని తన విజయంగా భావించే భ్రమ కనిపిస్తోంది. ఆ హీరో సాధించే రికార్డులు, అతని స్క్రీన్ ఇమేజ్ తన వ్యక్తిగత గౌరవంగా ఆమె ఫీల్ అవుతోంది. తన నిజ జీవితంలోని వైఫల్యాలను, అసంతృప్తిని మర్చిపోవడానికి ఈ ‘రీల్ ప్రపంచం’ ఒక మత్తుమందులా పనిచేస్తోంది.

🔹కలల ప్రపంచంలో బందీలు: Gen Z యువత నిత్యం ఇన్స్టాగ్రామ్, యూట్యూబ్ ప్రపంచంలో గడుపుతూ, వాస్తవానికి చాలా దూరంగా జరిగిపోతున్నారు. తమ నిజ జీవితంలోని సవాళ్లను ఎదుర్కోవడం చేతకాక, ఇలాంటి సెలబ్రిటీల వెనుక దాక్కుని తామేదో సాధిస్తున్నామనే భ్రమలో గడుపుతున్నారు.

2️⃣ Normalization of Violence – “చంపేస్తా” అనే మాట ఇంత తేలికా?
“చూడకపోతే ఉంటది రా ఒక్కొక్కడికి… చంపేస్తాడు అంతే!”
ఈ డైలాగ్ వింటుంటే ఒళ్ళు గగుర్పొడుస్తుంది. ఒక అపరిచిత వ్యక్తి (థియేటర్ కి వచ్చే సామాన్య ప్రేక్షకుడు) ఒక సినిమా చూడకపోతే, అతని ప్రాణాలు తీసేంత లేదా అతన్ని హింసించేంత కోపం ఎందుకు రావాలి?

🔹Desensitization: GenZ తరం సినిమాలు, వెబ్ సిరీస్‌లు, సోషల్ మీడియా రీల్స్‌లో విచ్చలవిడిగా చూపిస్తున్న హింస, బూతులు, గ్యాంగ్‌స్టర్ కల్చర్‌కు అలవాటు పడిపోయింది. మెదడు ఈ హింసకు అలవాటు పడిపోవడాన్ని ‘డీసెన్సిటైజేషన్’ అంటారు. అందుకే “చంపేస్తా”, “నరికేస్తా” అనే పదాలు ఈ తరం పిల్లలకు చాలా మామూలు పదాలుగా మారిపోయాయి.

🔹Fan Fascism: “నాకు నచ్చిన హీరో నీకు నచ్చాలి, నేను చూసిన సినిమా నువ్వు చూడాలి… లేదంటే నువ్వు నా శత్రువువి.” ఇది ఒక రకమైన మానసిక నియంతృత్వం. భిన్నాభిప్రాయాలను గౌరవించే విచక్షణ (Tolerance) నేటి తరం యువతలో పూర్తిగా నశించిపోతోందని ఈ వీడియో స్పష్టం చేస్తోంది.

🔹భాషా దారిద్ర్యం: ఒకప్పుడు ఆడపిల్లల సంభాషణల్లో ఎంతో వినయం, సంస్కారం ఉండేవి. కానీ, ఈ రోజుల్లో వీధి రౌడీలు వాడే “రా”, “రేయ్”, “ఒక్కొక్కడికి” అనే పదాలను కాలేజీ చదువులు చదివే అమ్మాయిలు పబ్లిక్ మీడియా ముందు ఎంత సహజంగా వాడుతున్నారో చూస్తుంటే, మన సమాజం ఎంతటి భాషా దారిద్ర్యంలోకి నెట్టబడుతుందో అర్థం చేసుకోవచ్చు.

3️⃣ Toxic Parenting – ముసిముసి నవ్వుల వెనుక ఉన్న భయంకర సత్యం!
ఈ వీడియోలో నన్ను అన్నిటికంటే ఎక్కువగా ఆందోళనకు గురిచేసిన అంశం – ఆ తల్లి ప్రవర్తన. కూతురు రోడ్డు మీద నిలబడి, అంతమంది ముందు అంత అనాగరికంగా అరుస్తుంటే, ఒక తల్లిగా ఆమెను వెనుక నుండి లాగి, “నోరు మూసుకో, ఇంటికి నడు” అనాల్సింది పోయి, గర్వంగా నవ్వుతోంది.

🔹Positive Reinforcement for Deviant Behavior: పిల్లలు తప్పు చేస్తున్నప్పుడు నవ్వడం లేదా దాన్ని చూసి ఆనందించడం అంటే, ఆ తప్పును తల్లిదండ్రులే స్వయంగా ఆమోదించినట్లు లెక్క. సమాజంలో ఎలా ప్రవర్తించాలో, ఎక్కడ ఏ భాష మాట్లాడాలో నేర్పించాల్సిన ప్రాథమిక బాధ్యత తల్లిదండ్రులదే. ఇక్కడ ఆ తల్లి తన బాధ్యతను పూర్తిగా విస్మరించింది.

🔹Clout Chasing: నేటి తల్లిదండ్రుల్లో కూడా ఒక వింతైన రోగం మొదలైంది. తమ పిల్లలకు లైకులు వస్తే చాలు, సోషల్ మీడియాలో వ్యూస్ వస్తే చాలు, వారు ‘వైరల్’ అయితే చాలు అనుకుంటున్నారు. ఆ వైరల్ అవ్వడం వెనుక కూతురి సంస్కారం బజారున పడుతోందనే కనీస జ్ఞానం కూడా ఆ తల్లికి లేకపోవడం మన పెంపక వ్యవస్థ కుప్పకూలిపోతోందని చెప్పడానికి నిదర్శనం.

🔹తరం మారినా మారవలసిన బుద్ధి: పాత తరం తల్లిదండ్రులకు సమాజంలో కుటుంబ గౌరవం ముఖ్యం. కానీ ఈ తరం తల్లిదండ్రులు తమ పిల్లల అహంకారాన్ని, అమాయకత్వాన్ని సామాజిక మాధ్యమాల్లో ప్రదర్శనకు పెడుతూ ఆనందం పొందుతున్నారు. ఇది భవిష్యత్తులో ఆ కుటుంబాలకే చేటు తెస్తుంది.

4️⃣ ఎలాంటి తరాన్ని తయారు చేస్తున్నాం? 
మనం చదువుకున్న, డిగ్రీలు ఉన్న ఒక ‘అనాగరిక’ తరాన్ని తయారు చేస్తున్నాం. విద్యావ్యవస్థ మార్కులు, ర్యాంకుల చుట్టూ తిరుగుతోంది కానీ, జీవితానికి కావలసిన ‘ఎమోషనల్ ఇంటెలిజెన్స్’ (EI) ని నేర్పించడంలో విఫలమైంది.

🔹Lack of Impulse Control: GenZ తరం పిల్లలకు తమ భావోద్వేగాలపై, నాలుకపై అస్సలు నియంత్రణ ఉండటం లేదు. ఒక చిన్న సినిమాకే ఇంతగా ఊగిపోయే వీళ్లు, రేపు నిజ జీవితంలో ఒక పరీక్షలో ఫెయిల్ అయినా, ప్రేమలో ఓడిపోయినా, ఉద్యోగంలో బాస్ తిట్టినా ఆ ఒత్తిడిని ఎలా తట్టుకుంటారు? ఇలాంటి వాళ్లే క్షణికావేశంలో ఆత్మహత్యలు చేసుకోవడం లేదా ఇతరులపై దాడులకు తెగబడటం చేస్తారు.

🔹Attention Seeking Syndrome: కెమెరా కనిపించగానే మరింత ఎక్కువగా అరిచి, హైలైట్ అవ్వాలనే తాపత్రయం ఇందులో కనిపిస్తోంది. అంటే, సమాజంలో గుర్తింపు తెచ్చుకోవడానికి చదువు, ప్రతిభ అవసరం లేదు… కేవలం ఇలా రోడ్డు మీద అరిస్తే చాలు అనే భావన యువత మైండ్ లోకి బలంగా వెళ్లిపోయింది.

🔹పరిణతి లేని ఆలోచనలు: కేవలం బాహ్య ప్రపంచంలోని ఆకర్షణలకు లొంగిపోతూ, అంతర్గత వ్యక్తిత్వాన్ని (Internal character) కోల్పోతున్నారు. ఇటువంటి తరం రేపు దేశ భవిష్యత్తును ఏ తీరాలకు చేరుస్తుందో ఊహించడానికే భయంగా ఉంది.

5️⃣ మీడియా, సోషల్ మీడియా బాధ్యతారాహిత్యం 
ఈ దుస్థితికి కేవలం ఆ అమ్మాయి, ఆమె తల్లి మాత్రమే కారణం కాదు. అక్కడ మైకులు పట్టుకుని నిల్చున్న కొన్ని మీడియా ఛానెళ్లు కూడా సమాన బాధ్యత వహించాలి.

🔹నెగెటివిటీని క్యాష్ చేసుకోవడం: ఒక అమ్మాయి అంత ఉద్రేకంగా తప్పుగా మాట్లాడుతుంటే, దాన్ని రికార్డ్ చేసి, దానికి పెద్ద పెద్ద థంబ్ నెయిల్స్ పెట్టి యూట్యూబ్‌లో వదలడం ద్వారా సమాజానికి మీడియా ఏం సందేశాన్ని ఇస్తోంది?

🔹క్రేజ్ కల్చర్: నేడు మీడియా కేవలం TRP ల కోసం, వ్యూస్ కోసం ఇలాంటి అనాగరిక ప్రవర్తనలను Glorify చేస్తోంది. ఇలాంటివాళ్లకు influencers అని పేరుపెట్టి, స్టూడియోల్లో కూర్చోపెట్టి ఇంటర్వ్యూలు చేస్తున్నారు. దీనివల్ల చూసే మిగతా పిల్లలు కూడా “మనం కూడా ఇలాగే మాట్లాడితే ఫేమస్ అయిపోవచ్చు” అనే తప్పుడు మార్గాన్ని ఎంచుకుంటున్నారు.

6️⃣ Digital Isolation & Addiction 
GenZ యువత భౌతిక ప్రపంచంలో స్నేహితులతో, కుటుంబ సభ్యులతో ఆరోగ్యకరమైన సంబంధాలను కోల్పోతోంది. రియల్ లైఫ్ రిలేషన్స్ లేకపోవడం వల్లే, వారు ఇలాంటి సెలబ్రిటీల ‘వర్చువల్’ ప్రపంచాన్ని తమ సొంత ప్రపంచంగా మార్చుకుంటున్నారు.

🔹కృత్రిమ డోపమైన్ హడావుడి: మెదడులో సహజంగా లభించాల్సిన సామాజిక ఆనందం (Social Dopamine) లోపించడం వల్లే, సినిమా థియేటర్ల దగ్గర ఇలాంటి కృత్రిమమైన ఉద్రేకాన్ని వెతుక్కుంటున్నారు. స్మార్ట్‌ఫోన్ స్క్రీన్‌లకు బందీలైన యువత, నిజమైన సంతోషాన్ని మరిచిపోయి డిజిటల్ ప్రపంచపు మత్తులో కొట్టుకుపోతోంది.

7️⃣Peer Pressure & Groupthink 
థియేటర్ల దగ్గర లేదా కాలేజీల్లో “నువ్వు ఫలానా హీరో ఫ్యాన్ కాకపోతే వేస్ట్ గాడివి” అనే ఒక రకమైన సామాజిక ఒత్తిడి యువతపై ఉంటోంది.

🔹ఉన్మాదపు సమూహాలు: గ్రూప్‌లో అందరిలాగే తాము కూడా అరవకపోతే వెనుకబడిపోతామనే భయం (FOMO – Fear of Missing Out) కూడా ఆ అమ్మాయి ప్రవర్తనకు ఒక కారణం కావచ్చు. ఒక సమూహంలో ఉన్నప్పుడు మనుషులు తమ వ్యక్తిగత విచక్షణను కోల్పోయి మంద బుద్ధితో ప్రవర్తిస్తారనే సైకలాజికల్ సత్యానికి ఈ సంఘటనే పెద్ద నిదర్శనం.

ఒక తండ్రిగా, ఒక సైకాలజిస్ట్‌గా సమాజానికి నా లేఖ! 
“మీరు రక్తం ధారపోసి, గొంతు చించుకునే హీరోలు కోట్లు సంపాదిస్తూ ఏసీ రూముల్లో లగ్జరీ జీవితాలు గడుపుతున్నారు. కానీ, వారి కోసం రోడ్డు మీద పడి కొట్టుకునే మీ జీవితాలు, మీ తల్లిదండ్రుల ఆశలు బూడిదలో పోసిన పన్నీరవుతున్నాయి.”

యువతకు నా హెచ్చరిక… 
రేపు మీ ఇంట్లో ఎవరికైనా ఆరోగ్యం బాగోలేకపోతే, లేదా మీకు ఫీజు కట్టడానికి డబ్బులు లేకపోతే మీరు ప్రాణమిచ్చే ఏ హీరో కూడా వచ్చి రూపాయి ఇవ్వడు. మీ తల్లిదండ్రుల కష్టార్జితాన్ని, మీ జీవితాన్ని ఒక సినిమా థియేటర్ దగ్గర తాకట్టు పెట్టకండి. తెరపై హీరోలను చూసి స్పందించడం కాదు… మీ నిజ జీవితంలో మీరు ఒక హీరోగా ఎదగడానికి ప్రయత్నించండి. వేరొకరి కటౌట్ కి పాలాభిషేకం చేసే గుంపులో ఒకడిగా కాదు, పదిమందికి సాయం చేసే వ్యక్తిగా గుర్తింపు తెచ్చుకోండి.

గుర్తుంచుకోండి, ఆ హీరోలు తమ పిల్లలను విదేశాల్లో చదివిస్తారు, ఉన్నత స్థానాల్లో ఉంచుతారు. కానీ మిమ్మల్ని మాత్రం కేవలం థియేటర్ల ముందు ఈలలు వేసే జనంలాగే చూడాలని కోరుకుంటారు. మీ జీవితాలను మీ చేతులతో నాశనం చేసుకోకండి.

తల్లిదండ్రులకు నా విన్నపం… 
దయచేసి మీ పిల్లల స్మార్ట్‌ఫోన్‌లను, వాళ్ల ప్రవర్తనను గమనించండి. వాళ్లు తప్పు దారిలో వెళ్తుంటే, సమాజంలో నవ్వులపాలవుతుంటే చూసి మురిసిపోకండి. పిల్లలకు సంస్కారం, విచక్షణ, ఇతరులను గౌరవించే గుణాన్ని చిన్నప్పటి నుండే నేర్పించండి.
సినిమా అనేది ఒక కేవలం ఒక వినోదం మాత్రమే, అది జీవితం కాదు అనే సత్యాన్ని వారి తలల్లోకి ఎక్కించండి.

పిల్లలు ఏదైనా తప్పు మాట్లాడినప్పుడు అక్కడికక్కడే ఖండించండి. వారి పిచ్చి చేష్టలను చూసి నవ్వడం ఆపండి. మీ నవ్వు వారి భవిష్యత్తుకు ఉరితాడు కాకూడదు.
మనమిప్పుడే మేల్కొనకపోతే… సంస్కార హీనమైన, ఉన్మాదంతో ఊగిపోయే ఒక బలహీనమైన, దిశాహీనమైన తరాన్ని మనం సమాజానికి అందించిన వాళ్లమవుతాం. ఆ నష్టం పూడ్చలేనిది!

సినిమా అనేది కేవలం ఒక వినోదం మాత్రమే. ఆ వినోదాన్ని వినోదంగానే చూడాలి తప్ప… అది మన నిత్యజీవితాన్ని, మన కుటుంబ విలువలను శాసించే స్థాయికి వెళ్ళకూడదు.
ఈ భయంకర ధోరణి మన కళ్ళు తెరిపించాలి.
ప్రతి పేరెంట్, ప్రతి స్టూడెంట్ తాము ఏ మార్గంలో ప్రయాణిస్తున్నామో ఒక్కసారి ఆత్మపరిశీలన చేసుకోవాలి. మార్పు మన ఇళ్ల నుండే ప్రారంభం కావాలి.
ఆలోచించండి, ఇప్పుడైనా మారండి!

.
సైకాలజిస్ట్ విశేష్, Genius Matrix Hub

🔹 ఇలాంటి పేరెంట్స్ కు, స్టూడెంట్స్ కు చేరేలా ఈ పోస్ట్ ను షేర్ చేయండి. చదివాకైనా కాస్త ఆలోచిస్తారేమో!