.
నవంబరు మొదటి ఆదివారం… న్యూయార్క్ సెంట్రల్ పార్కు సందర్శనకు వెళ్లాం… ఈ కాంక్రీట్ సిటీలో ఆ గ్రీనరీని పదిలంగా కాపాడుకుంటున్నారు… ప్రకృతి అందాలు, సరస్సులు, పచ్చని చెట్లు, నడక దారులు… కానీ పాథ్‌‌లు, సబ్‌వేలు కిక్కిరిసి కనిపించాయి… పార్కు గేట్ల వద్ద కూడా విపరీతంగా రద్దీ… న్యూయార్క్ మొత్తం అక్కడే ఉన్నట్టుగా ఉంది…
కొన్ని గేట్లు మామూలు సందర్శకులకు మొత్తమే మూసేశారు… ఇక లోపలకు కూడా వెళ్లలేక వాపస్ వచ్చేశాం… అక్కడ మారథాన్ రన్నర్ల ఆహార్యంపై టీసీఎస్ స్పాన్సర్ చేస్తున్నట్టుగా చూసి… కాస్త ఆరా తీస్తే చాలా ఇంట్రస్టింగు స్టోరీ తెలిసింది… ఈ మారథాన్‌ల వెనుక వేల కోట్ల వ్యాపారం గురించీ తెలిసింది…
Ads
ఇది కేవలం ఓ క్రీడా పోటీ కాదు… ప్రపంచవ్యాప్తంగా లక్షలాది మందిని ఆకర్షించే ఒక భారీ ఈవెంట్… అంతర్జాతీయ బ్రాండ్లకు ప్రచార వేదిక… కోట్లాది డాలర్ల వ్యాపారం… అందులో మన భారతీయ సంస్థ టాటా కన్సల్టెన్సీ సర్వీసెస్ (TCS) కూడా కీలక భాగస్వామి కావడం విశేషం…
1970లో 127 మందితో మొదలై… న్యూయార్క్ మారథాన్ చరిత్ర 1970లో మొదలైంది… అప్పట్లో కేవలం 127 మంది పాల్గొనగా, పోటీ మొత్తం సెంట్రల్ పార్కులోనే నాలుగు చక్కర్లు కొట్టేలా ఉండేది… 1976లో అమెరికా ద్విశతాబ్ది ఉత్సవాల సందర్భంగా నిర్వాహకులు ఈ పోటీని నగరంలోని ఐదు బారోల (పాలన విభాగాలు- ప్రధాన ప్రాంతాలు) మీదుగా నిర్వహించాలని నిర్ణయించారు… అప్పటినుంచి ఇది న్యూయార్క్ నగరానికి ఒక గుర్తింపుగా మారిపోయింది…
ఇప్పుడు ఈ మారథాన్ అంటే ప్రపంచం నలుమూలల నుంచి వచ్చే పరుగుల వీరుల సంగమం… స్టాటెన్ ఐలాండ్‌లోని వెర్రజానో బ్రిడ్జి దగ్గర ప్రారంభమై, బ్రూక్లిన్, క్వీన్స్, బ్రాంక్స్ మీదుగా సాగి చివరకు మన్‌హాటన్‌లోని సెంట్రల్ పార్కులో ముగుస్తుంది… మొత్తం దూరం 42 కిలోమీటర్లు… దారిపొడవునా లక్షలాది మంది ప్రేక్షకులు పరుగుల వీరులను ప్రోత్సహిస్తుంటారు…
- మొన్నటి మారథాన్ మరో ప్రపంచ రికార్డు సృష్టించింది… ఏకంగా 61,146 మంది పరుగును పూర్తి చేశారు… ఒక మారథాన్‌లో ఇంతమంది ఫినిషర్లు ఉండటం ప్రపంచంలోనే ఇదే తొలిసారి… 153 దేశాలకు చెందిన వారు ఈ పోటీలో పాల్గొన్నారు… అంతర్జాతీయంగా వచ్చినవారే 15,745 మంది… ఈ ఏడాది మారథాన్‌కు 50 ఏళ్లు పూర్తయిన సందర్భంగా ఐదు బారోల మీదుగా సాగే ప్రస్తుత మార్గం స్వర్ణోత్సవాన్ని కూడా జరుపుకుంది…
పరుగుల పోటీ కాదు… నగరానికో పెద్ద పండుగ!
ఈ మారథాన్‌లో విశేషమేమిటంటే, పరుగులు తీసేవాళ్లే కాదు… చూసేవాళ్లూ లక్షల్లో ఉంటారు… నిర్వాహకుల అంచనా ప్రకారం రెండు మిలియన్లకు పైగా ప్రేక్షకులు ఐదు బారోల్లోని వివిధ ప్రాంతాల్లో నిలబడి ఈ పోటీని వీక్షిస్తారు… కుటుంబ సభ్యులు, స్నేహితులు, స్థానికులు, పర్యాటకులు… ఇలా అందరూ ఇందులో భాగమైపోతారు…
ప్రతి ఒక్కరూ ప్రొఫెషనల్ రన్నర్ కావాల్సిన అవసరం లేదు… వయసుతో సంబంధం లేకుండా, వివిధ శారీరక సామర్థ్యాలు ఉన్నవారికి కూడా ఇందులో అవకాశం ఉంటుంది… కొందరు ప్రపంచ రికార్డుల కోసం పరుగెడితే, మరికొందరు తమ జీవితంలో ఒక్కసారైనా మారథాన్ పూర్తి చేయాలనే లక్ష్యంతో వస్తారు… ఇంకొందరు స్వచ్ఛంద సంస్థల కోసం విరాళాలు సేకరిస్తూ పరుగులో పాల్గొంటారు…
ఈసారి న్యూయార్క్ రోడ్ రన్నర్స్ సంస్థ తన చారిటీ కార్యక్రమాల ద్వారా 100 మిలియన్ డాలర్ల నిధుల సేకరణ లక్ష్యాన్ని కూడా మారథాన్‌కు ముందే అధిగమించింది… 670కి పైగా స్వచ్ఛంద సంస్థలకు ఈ కార్యక్రమం ద్వారా ప్రయోజనం కలుగుతుంది…
న్యూయార్క్‌కు మారథాన్ తెచ్చే డబ్బెంత?
మారథాన్ కోసం ప్రపంచం నలుమూలల నుంచి వచ్చే వేలాది మంది రన్నర్లు, వారి కుటుంబ సభ్యులు, స్నేహితులు, పర్యాటకులు… వీరంతా న్యూయార్క్‌లో హోటళ్లలో బస చేస్తారు… రెస్టారెంట్లలో తింటారు… షాపింగ్ చేస్తారు… మ్యూజియంలు, ఇతర పర్యాటక ప్రాంతాలను సందర్శిస్తారు… స్థానిక రవాణా వ్యవస్థను ఉపయోగిస్తారు… అంటే ఈ ఒక్క క్రీడా ఈవెంట్ కారణంగా నగరంలోని అనేక వ్యాపారాలకు భారీగా ఆదాయం సమకూరుతుంది…
న్యూయార్క్ రోడ్ రన్నర్స్ సంస్థ FY2025 ఆర్థిక ప్రభావ అధ్యయనం ప్రకారం, ఆ ఏడాది నిర్వహించిన 34 రేసుల వల్ల నగర ఆర్థిక వ్యవస్థకు 934 మిలియన్ డాలర్ల ప్రయోజనం చేకూరింది… అందులో ఒక్క TCS న్యూయార్క్ మారథాన్ వాటానే 692 మిలియన్ డాలర్లు! అంటే సుమారు 69 కోట్ల డాలర్లు కాదు… 69.2 కోట్ల డాలర్లు (భారత కరెన్సీలో దాదాపు రూ.6,000 కోట్లకు పైగా, మారకపు విలువను బట్టి)… అంటే రన్నర్లు పరుగెత్తుతుంటే, నగర ఆర్థిక వ్యవస్థ కూడా పరుగులు పెడుతుందన్నమాట!
టీసీఎస్‌కు ఈ మారథాన్‌తో ఇంత అనుబంధం ఎందుకు?
టాటా గ్రూప్‌కు చెందిన టాటా కన్సల్టెన్సీ సర్వీసెస్ (TCS) ఈ మారథాన్‌కు కేవలం స్పాన్సర్ మాత్రమే కాదు. ఈ ఈవెంట్‌లో సాంకేతిక భాగస్వామిగా కూడా వ్యవహరిస్తోంది… 2012లో టీసీఎస్ ఈ మారథాన్‌కు టెక్నాలజీ స్పాన్సర్‌గా చేరింది… రెండేళ్ల తర్వాత అంటే 2014 నుంచి టైటిల్ స్పాన్సర్‌గా మారింది… అప్పటినుంచి పోటీ పేరు ముందు TCS చేరింది… 2021లో మరో ఎనిమిదేళ్లకు, అంటే 2029 వరకు ఒప్పందాన్ని పునరుద్ధరించుకుంది… 14 ఏళ్ల అనుబంధం…
అయితే టీసీఎస్ ఇక్కడ డబ్బు పెట్టి పేరు తెచ్చుకోవడంతోనే ఆగిపోలేదు… తన సాంకేతిక పరిజ్ఞానాన్ని కూడా ఈ పోటీలో ఉపయోగిస్తోంది… రన్నర్లు ఎక్కడ ఉన్నారు? ఎంత దూరం పూర్తి చేశారు? ఎప్పుడు ఫినిషింగ్ లైన్ చేరుకుంటారు? వంటి వివరాలను వారి కుటుంబ సభ్యులు, స్నేహితులు మొబైల్ యాప్ ద్వారా తెలుసుకునే సదుపాయం కల్పిస్తోంది… ఆగ్మెంటెడ్ రియాలిటీ, డిజిటల్ టెక్నాలజీలతో ప్రేక్షకులకు కూడా కొత్త అనుభూతిని అందిస్తోంది…
టీసీఎస్‌కు మారథాన్లతో అనుబంధం న్యూయార్క్‌తోనే ఆగిపోలేదు… లండన్, సిడ్నీ మారథాన్లకు కూడా టైటిల్ స్పాన్సర్‌గా వ్యవహరిస్తోంది… బోస్టన్, చికాగో వంటి ప్రపంచ ప్రఖ్యాత మారథాన్లతోనూ అనుబంధం ఉంది… ప్రపంచవ్యాప్తంగా 14 రన్నింగ్ ఈవెంట్లతో భాగస్వామ్యం కలిగి ఉంది… ఈ ఈవెంట్లలో ఏటా ఆరు లక్షల మందికి పైగా పాల్గొంటున్నారు…
ఒక బ్రాండ్‌కు ఇంత ప్రచారం ఎలా వస్తుంది?
సాధారణంగా ఓ కంపెనీ తన ఉత్పత్తులకు ప్రచారం కల్పించుకోవాలంటే టీవీ ప్రకటనలు, పత్రికలు, డిజిటల్ మీడియా, ఇతర ప్రచార మార్గాలపై ఆధారపడుతుంది… కానీ ఇలాంటి అంతర్జాతీయ క్రీడా ఈవెంట్‌కు భాగస్వామిగా ఉంటే బ్రాండ్‌కు వచ్చే గుర్తింపు వేరు…
ముఖ్యంగా టీసీఎస్ వంటి బిజినెస్ టు బిజినెస్ సంస్థలకు ఇది చాలా ఉపయోగకరం… సాధారణ వినియోగదారులకు తమ సేవలను నేరుగా అమ్మకపోయినా, ప్రపంచవ్యాప్తంగా ఉన్న పెద్ద కంపెనీలకు తమ సామర్థ్యాన్ని పరిచయం చేసుకోవడానికి ఇలాంటి వేదికలు ఉపయోగపడతాయి…
మన హైదరాబాద్‌లోనూ మారథాన్లు జరుగుతున్నాయి… రన్నింగ్‌పై ఆసక్తి పెరుగుతోంది… కానీ ఒక క్రీడా కార్యక్రమాన్ని నగరానికి అంతర్జాతీయ గుర్తింపుగా, పర్యాటక ఆకర్షణగా, ఆర్థిక కార్యకలాపంగా మార్చుకోవడం ఎలాగో న్యూయార్క్ మారథాన్‌ను చూస్తే అర్థమవుతుంది..!
Share this Article