Subramanyam Dogiparthi ….. ఇంతేనయా తెలుసుకోవయా ఈ లోకం ఇంతేనయా, నీతీ లేదు నిజాయితీ లేదు అనే రంగుల్లో పాటకు మా నరసరావుపేట వెంకటేశ్వర పిక్చర్ పేలస్ జనం ఈలలతో , డాన్సులతో దద్దరిల్లటం ఈరోజుకీ నాకు గుర్తే . ఈ పాట కోసమే నాలుగయిదు సార్లు చూసా ఈ సినిమాను . జనాన్ని ఒక ఊపు ఊపిన మరో పాట వినవయ్యా రామయ్య ఏమయ్యా భీమయ్యా మన మంచే గెలిచిందయ్యా పాట . ఈ తప్పెట్ల పాటలో జయలలిత బ్రహ్మాండంగా నృత్యించింది .
సంగీత దర్శకుడు టి వి రాజుని ప్రత్యేకంగా అభినందించాలి . పాటలన్నీ వీర హిట్ . ముత్యాల జల్లు కురిసె రతనాల మెరుపు మెరిసే వాన జల్లు పాటలో జయలలిత నిజంగానే జనం మీద తన రతనాల అందాన్ని కురిపించింది . మంచివాడు మా బాబాయి మా మాటే వింటాడోయి , వయసు మళ్ళిన బుల్లోడా కొంటె చూపుల కుర్రోడా , పళ్ళ పాట బాగుంటాయి . ఇల్లరికం అల్లుళ్ళు పద్మనాభం , రాజబాబుల పాట రావేలా దయ లేదా బాలా ఇంటికి రారాదా పాట పేరడీతో ఇప్పటికీ జనం పాడుకుంటూ ఉంటారు .
ఈ సినిమా కధను తయారు చేసిన ముళ్ళపూడి వెంకట రమణను , మాటలు పేల్చిన భమిడిపాటి రాధాకృష్ణను అభినందించాలి . అంతకుముందు పెద్ద మనుషులు , దేశద్రోహులు వంటి ఇలాంటి సినిమాలు ఉన్నా , ఈ సినిమాలో కధ పరుగులెత్తుతుంది . తర్వాత కాలంలో వచ్చిన ఈ మార్కు ఎన్నో సినిమాలకు ఈ సినిమా శ్రీకారం చుట్టింది .
Ads
ఈ సినిమా షూటింగ్ సమయంలోనే తమిళనాడు ముఖ్యమంత్రి అన్నాదురై చనిపోవడం , MGR డైరెక్ట్ రాజకీయాల్లోకి రావాలనుకోవడం , నాగిరెడ్డి చక్రపాణిలను ఏదయినా సినిమా సజెస్ట్ చేయమంటే , ఈ కధానాయకుడు సినిమానే రీమేక్ చేద్దామని సజెస్ట్ చేయడం , MGR – జయలలితలు నటించి తమిళంలో కూడా ఓ ఊపు ఊపడం జరిగిపోయాయి . ఆ తర్వాత హిందీలో రాజేష్ ఖన్నా – ముంతాజ్ లతో అప్నా దేశ్ అనే టైటిల్ తో రీమేక్ చేసారు . అక్కడా బాగా హిట్టయింది .
NTR-జయలలితలు 12 సినిమాల్లో జోడీ కట్టారు . అన్ని సినిమాలలో వీరి జోడీ జనానికి కన్నుల పండుగ చేసినా , ఈ సినిమా బ్లాక్ బ్లస్టరుగా నిలిచింది . నాగభూషణం సాఫ్ట్ & క్రూయెల్ విలనీ బాగా పేలింది . అయితే ఇప్పుడు మన రాజకీయ నాయకులు ఇలాంటి విలనీలో లక్ష ఆకులు ఎక్కువ చదివారనుకోండి .
అల్లు రామలింగయ్య , ధూళిపాళ , మిక్కిలినేని , టి జి కమలాదేవి , రావి కొండలరావు , రాధా కుమారి , కాకరాల , రమాప్రభ , నాగయ్య , ముక్కామల , బేబీ పద్మిని , బేబీ రాణి ప్రభృతులు నటించారు . ఈ సినిమాలో గమ్మత్తు ఏంటంటే CBI వాళ్ళు విలన్లను అరెస్ట్ చేస్తారు . పెద్ద పెద్ద ఘరానా విలన్లను తాకటానికి కూడా వణికిపోయే ఇప్పటి నిజ CBI ని చూస్తే , కించిత్ హాశ్చర్యము కలుగక మానదు .
మరో విశేషం . ఇంత గొప్ప బ్లాక్ బస్టర్లో NTR-జయలలితలకు డ్యూయెట్ లేకపోవడం . దడదడసాగే సినిమా ఆ సంగతిని కూడా జనానికి తెలియనీయదు . యూట్యూబులో ఉంది . చూడనివారు తప్పక చూడండి . నేడే చూడండి . ఆదివారమే కదా . చూసేయండి .
Share this Article