.
ప్రపంచవ్యాప్తంగా కోట్లాది మంది అభిమానులు ఉన్న ఓ స్టార్ హీరోయిన్. ఆమెతో ఒక్క సెల్ఫీ కోసం గంటల తరబడి ఎదురుచూసే అభిమానులు. కానీ అదే హీరోయిన్ పక్కనే కూర్చున్న ఓ భారతీయ యువకుడు… ఒక్కసారి కూడా ఆమె వైపు చూడలేదు.
ఎందుకు? అతనికి ఆమె ఎవరో తెలియదా? లేక ఆసక్తి లేదా? ఈ ప్రశ్నకే సమాధానం చెప్పే కథ జర్మనీలో కొన్నాళ్లుగా మానవాసక్తికర కథనంగా చర్చనీయాంశమవుతోంది.
జర్మనీలోని ఓ మెట్రో రైలులో ప్రయాణిస్తున్న సమయంలో తీసిన ఒక ఫొటో సోషల్ మీడియాలో వైరల్ అయింది. ఆ చిత్రంలో ప్రపంచ ప్రఖ్యాత ‘గేమ్ ఆఫ్ థ్రోన్స్’ సిరీస్లో ఆర్యా స్టార్క్ పాత్రతో గుర్తింపు పొందిన Maisie Williams ప్రశాంతంగా కూర్చుని ఉంది. ఆమె పక్కనే ఓ భారతీయ యువకుడు. కానీ అతని చూపు మాత్రం ఎక్కడో శూన్యంలో నిలిచిపోయింది.
Ads
ముఖంలో ఆందోళన… కళ్లలో నిద్రలేమి… భవిష్యత్తుపై అనిశ్చితి. ఆ ఫొటోలో కనిపించిన ఈ విరుద్ధ దృశ్యం చాలామందిని ఆలోచింపజేసింది.
అతను ఎవరు? అనే ప్రశ్నతో జర్మనీకి చెందిన ప్రముఖ పత్రిక డెర్ ష్పీగెల్ జర్నలిస్టులు అతడి కోసం వెతికారు. కొంతకాలం తర్వాత మ్యూనిక్లో అతడిని గుర్తించారు. అతను జర్మనీలో చట్టబద్ధమైన నివాస అనుమతి లేకుండా జీవిస్తున్న భారతీయ వలసదారు. జేబులో డబ్బు లేదు. టికెట్ కొనలేని పరిస్థితి. ప్రతిరోజూ రైళ్లలో తనిఖీలు జరుగుతాయేమోనన్న భయంతో ప్రయాణం. ఎప్పుడు పట్టుకుంటారో, ఎప్పుడు దేశం విడిచి వెళ్లమంటారో తెలియని ఆందోళన.
ఆ సమయంలో జర్నలిస్టు అతడిని ఒక ప్రశ్న అడిగాడు. “నీ పక్కన కూర్చున్నది మైసీ విలియమ్స్ అని తెలుసా? ఆమెతో ఒక ఫొటో కోసం ప్రపంచవ్యాప్తంగా లక్షల మంది ఎదురుచూస్తారు. నువ్వు మాత్రం ఒక్కసారి కూడా ఆమె వైపు చూడలేదు. ఎందుకు?”
కొద్దిసేపు నిశ్శబ్దంగా ఉన్న ఆ యువకుడు చెప్పిన సమాధానం మాత్రం అందరినీ కదిలించింది. “నీ దగ్గర నివాస అనుమతి లేకపోతే… జేబులో ఒక్క యూరో కూడా లేకపోతే… ప్రతి రోజు భయంతో రైళ్లలో ప్రయాణిస్తుంటే… నీ పక్కన ఎవరు కూర్చున్నారు అనేది అసలు ముఖ్యం కాదు…”
ఆ ఒక్క వాక్యం… ఒక వలసదారుడి జీవితాన్ని మొత్తంగా మార్చేసింది. ఆ సమాధానం ఆ పత్రిక జర్నలిస్టులను కదిలించింది. అనంతరం అతనికి నెలకు 800 యూరోల వేతనంతో పోస్టుమ్యాన్ ఉద్యోగం వచ్చేలా చేశారు. ఆ ఉద్యోగం ఆధారంగా చట్టబద్ధమైన నివాస అనుమతి కూడా లభించింది…
ఈ వైరల్ కథ నిజమా?
ఈ కథ సోషల్ మీడియాలో విస్తృతంగా వైరల్ అయినప్పటికీ, ఇందులో చెప్పిన ప్రతి అంశానికి స్వతంత్రంగా ధృవీకరించబడిన ఆధారాలు అందుబాటులో లేవు. ముఖ్యంగా డెర్ ష్పీగెల్ ఈ ఘటనపై ఇలాంటి కథనం ప్రచురించిందనే నిర్ధారిత రికార్డు కనిపించలేదు. అందువల్ల దీనిని ఓ వైరల్ కథగా చూడటం మంచిది; నిర్ధారిత వార్తగా కాదు…
అయితే ఈ కథ చెప్పే భావం మాత్రం చాలామందిని ఆలోచింపజేస్తుంది. ఆకలి ఉన్న మనిషికి అందం కనిపించదు. భయం వెంటాడుతున్న వ్యక్తికి స్టార్డమ్ గుర్తుకురాదు. మనసు ప్రశాంతంగా ఉన్నప్పుడే ప్రపంచం అందంగా కనిపిస్తుంది.
జీవితంలో ఒక చిన్న సంఘటన… ఒక అపరిచిత వ్యక్తి… ఒక ప్రశ్న… లేదా ఒక అవకాశం… ఎవరి జీవితాన్నైనా ఊహించని మలుపు తిప్పవచ్చు. అందుకే… ఈరోజు కష్టంగా ఉందని రేపు కూడా అలాగే ఉంటుందని అనుకోవద్దు. విధి ఎప్పుడు ఎలాంటి తలుపు తెరుస్తుందో… ఎవరికీ ముందుగా తెలియదు. అదే జీవితం. అదే దాని వింత…
Share this Article