మోదీ వెనుక నీడలా ఓ నాగా మహిళ – ఎవరీమె..? నేపథ్యం ఏమిటి..?

.

మోదీ వెనుక నడుస్తున్న ఆ మహిళ ఎవరు? మణిపూర్ కొండల్లోంచి దేశ ప్రధాని భద్రతా వలయంలోకి వచ్చిన అదాసో కపేసా…

ప్రధాని నరేంద్ర మోదీ ఎక్కడికి వెళ్లినా ఆయన చుట్టూ కనిపించే భద్రతా వలయం గురించి ప్రత్యేకంగా చెప్పాల్సిన పనిలేదు. నల్ల సూట్లు, ఇయర్‌ పీసులు, క్షణక్షణం చుట్టూ పరిశీలించే కళ్లతో ఉండే ఎస్పీజీ కమాండోలు… వాళ్లంతా మోదీకి కొన్ని అడుగుల దూరంలోనే ఉంటారు.

కానీ 2025లో మోదీ బ్రిటన్ పర్యటన సందర్భంగా బయటకు వచ్చిన ఓ ఫొటోలో మాత్రం చాలామంది దృష్టి ప్రధాని మీద కంటే ఆయన వెనుక నడుస్తున్న ఓ మహిళా అధికారిపైనే పడింది. నల్లటి సూట్. చెవిలో ఇయర్‌పీస్. ముఖంలో ఎలాంటి భావోద్వేగం కనిపించదు. చూపు మాత్రం చుట్టూ ఉన్న ప్రతి కదలికను గమనిస్తున్నట్టుగా ఉంటుంది.

ఆమె పేరు అదాసో కపేసా. ఆమె సాధారణ పోలీసు అధికారి కాదు. భారత ప్రధాని భద్రతను చూసే దేశంలోని అత్యంత ప్రతిష్టాత్మకమైన భద్రతా వ్యవస్థ అయిన *స్పెషల్ ప్రొటెక్షన్ గ్రూప్ (SPG)*లో విధులు నిర్వర్తిస్తున్న ఇన్‌స్పెక్టర్.

అంతకంటే ఆసక్తికరమైన విషయం ఏమిటంటే… SPGలోకి ప్రవేశించిన తొలి మహిళా అధికారిగా ఆమె పేరు చరిత్రలో నిలిచింది. మణిపూర్‌లోని ఓ చిన్న గ్రామం నుంచి… అదాసో కపేసా మణిపూర్‌లోని సేనాపతి జిల్లాకు చెందిన కైబి గ్రామం వాసి. ఆమె మావో నాగ (Mao Naga) గిరిజన సమాజానికి చెందిన మహిళ…

• దేశ రాజధానిలోని అధికార కేంద్రాలకు వేల కిలోమీటర్ల దూరంలో ఉన్న ఈశాన్య భారతంలోని ఒక చిన్న గ్రామం నుంచి బయలుదేరిన ఓ అమ్మాయి చివరకు దేశ ప్రధానమంత్రి భద్రతా వలయంలో కీలక బాధ్యతకు చేరుకోవడం… ఆమె కథలో అసలైన ఆసక్తి అక్కడే ఉంది.

కపేసా గురించి అందుబాటులో ఉన్న వివరాలు చాలా పరిమితమే. అదే సహజం కూడా. ప్రధాని భద్రతా బృందంలో పనిచేసే అధికారుల వ్యక్తిగత వివరాలు సాధారణంగా బహిరంగంగా ఉండవు. కానీ ఆమె సర్వీస్ రికార్డుకు సంబంధించిన ఓ ముఖ్యమైన ఆధారం మాత్రం ప్రభుత్వ పత్రంలో కనిపిస్తోంది.

CRPF వెబ్‌సైట్‌లో ఉన్న అధికారిక జాబితాలో “Adaso Kapesa” పేరుతో ఆమెను Inspector (GD), SSB, 55వ బెటాలియన్, పిథోరాగఢ్గా పేర్కొన్నారు. అదే ఎంట్రీలో ప్రస్తుతం ఆమె SPGకి డిప్యుటేషన్‌పై ఉన్నట్లు స్పష్టంగా ఉంది.

SSB నుంచి SPG వరకు… అదాసో కపేసా ప్రయాణం నేరుగా SPGతో మొదలుకాలేదు. ఆమె ముందుగా *సశస్త్ర సీమా బల్ (SSB)*లో చేరింది. SSB కేంద్ర సాయుధ పోలీసు దళాల్లో ఒకటి. ఆమె 55వ బెటాలియన్‌లో, ఉత్తరాఖండ్‌లోని పిథోరాగఢ్‌లో విధులు నిర్వహించింది. అక్కడి నుంచి అత్యంత కఠినమైన ఎంపిక, శిక్షణ ప్రక్రియను దాటి SPGలో డిప్యుటేషన్‌పైకి వెళ్లింది.

ఇది సాధారణ బదిలీ కాదు. SPG అంటే దేశ ప్రధాని భద్రత కోసం ఏర్పాటు చేసిన అత్యున్నత స్థాయి ప్రత్యేక భద్రతా దళం. అక్కడ పనిచేసే సిబ్బందికి శారీరక సామర్థ్యం మాత్రమే కాదు… అత్యంత వేగంగా నిర్ణయం తీసుకునే సామర్థ్యం, అప్రమత్తత, ఆయుధ వినియోగ నైపుణ్యం, క్లోజ్ ప్రొటెక్షన్ టెక్నిక్స్, పరిస్థితిని క్షణాల్లో అంచనా వేసే సామర్థ్యం అవసరం. అందుకే అక్కడికి వెళ్లడం అంటే ఒక పోలీసు ఉద్యోగి కెరీర్‌లో సాధారణ పోస్టింగ్ కాదు.

ఇక్కడే అసలు చరిత్ర… SPG ఏర్పడినప్పటి నుంచి దాని ప్రధాన ముఖచిత్రం దాదాపుగా పురుషులదే.  అలాంటి వ్యవస్థలోకి ఒక మహిళా అధికారి రావడం చిన్న విషయం కాదు. అదాసో కపేసా ఆ గోడను దాటింది. అందుకే ఆమెను కేవలం “మోదీ మహిళా బాడీగార్డ్” అని పిలవడం ఆమె సాధించిన దాన్ని చాలా చిన్నదిగా చూపించడమే.

ఆమె ప్రధాని వెనుక నడుస్తున్న ఒక మహిళ మాత్రమే కాదు. భారత భద్రతా వ్యవస్థలో ఒక కొత్త అధ్యాయానికి కనిపించే ముఖం. మణిపూర్ నుంచి వచ్చిన సందేశం. అదాసో కపేసా కథలో మరో ప్రత్యేకత ఉంది. మణిపూర్….

దేశంలోనే అత్యంత సంక్లిష్టమైన సామాజిక, భౌగోళిక పరిస్థితులు ఎదుర్కొంటున్న ఈశాన్య రాష్ట్రాల్లో ఒకటి. అక్కడి సేనాపతి జిల్లాలోని ఒక చిన్న గ్రామానికి చెందిన మావో నాగ మహిళ… దేశ ప్రధానమంత్రి చుట్టూ ఉండే అత్యంత కట్టుదిట్టమైన భద్రతా వలయంలోకి చేరడం ఒక ప్రతీకాత్మక విజయమే.

మణిపూర్‌లోని కొండ ప్రాంతాల నుంచి ఢిల్లీ అధికార కేంద్రం వరకు ఆమె ప్రయాణం ఒక విషయాన్ని మాత్రం చాలా స్పష్టంగా చెబుతోంది. అవకాశం దొరికితే ప్రతిభకు భౌగోళిక సరిహద్దులు ఉండవు. గ్రామం చిన్నదా, పెద్దదా కాదు. మీరు ఎక్కడ పుట్టారన్నది అంత ముఖ్యం కాదు. ఎంత కఠినమైన పరీక్షను ఎదుర్కొని ఎక్కడికి చేరారన్నదే ముఖ్యం. ప్లస్ ఆమె ట్రాక్ రికార్డ్, కుటుంబ చరిత్ర కూడా..!!

.

ఇక్కడ మీకు ఒకటి గుర్తుచేయాలి…అమెరికా గత ఎన్నికల ముందు కావచ్చు బహుశా… ట్రంపు మీద కాల్పులు జరిగినప్పుడు తన వెంట ఉండే లేడీ కమెండో ఒకామె తన ప్రాణాలను అడ్డుపెట్టి ట్రంపు బాడీని కంప్లీట్ కవర్ చేసింది… గుర్తుందా..? కమెండోలు అంటే ప్రాణాలకు పణంగా పెట్టేవాళ్లు, పురుషులైతేనేం, మహిళలైతేనేం… అంకితభావం, చురుకుదానం ముఖ్యం…!! ప్లస్ మహిళలు ఎవరికీ తీసిపోరు!!!