.
అమెరికా తొలిసారిగా అంతరిక్షంలో తమ ఆయుధాలు మోహరించినట్లు అధికారికంగా ప్రకటించడం ప్రపంచవ్యాప్తంగా సంచలనం సృష్టించింది. అగ్రరాజ్యాల మధ్య ఇప్పటివరకు “ఓపెన్ సీక్రెట్”గా ఉన్న స్పేస్ వార్ఫేర్ (అంతరిక్ష యుద్ధం) ఇకపై బహిరంగ వాస్తవంగా మారింది. ఐతే అవి ఏ రకం ఆయుధాలు? టార్గెట్స్ ఏమిటి..?
లేజరా? మైక్రోవేవా? మిసైళ్లా? అమెరికా ఎయిర్ ఫోర్స్ సెక్రటరీ ట్రాయ్ మీంక్ (Troy Meink), స్పేస్ ఫోర్స్ వెల్లడించిన వివరాల ప్రకారం, వీటిని “ఆన్-ఆర్బిట్ స్పేస్ కంట్రోల్ వెపన్స్” (On-orbit space control weapons) అని పిలుస్తున్నారు…
Ads
-
ఖచ్చితమైన వివరాలు గోప్యత…: ఈ ఆయుధాలు లేజర్లా, మైక్రోవేవ్లా లేదా కైనేటిక్ (భౌతిక దాడి చేసే) మిసైళ్లా అనేదానిపై అమెరికా పెంటగాన్ క్లారిటీ ఇవ్వలేదు. శత్రు దేశాలకు సరైన అంచనా అందకుండా వ్యూహాత్మకంగా ఈ గోప్యత పాటిస్తున్నట్లు తెలిపింది.
-
కైనెటిక్ మరియు నాన్-కైనెటిక్ మార్గాలు…: స్పేస్ ఫోర్స్ ప్రకటన ప్రకారం ఇవి కైనెటిక్ (భౌతికంగా ఢీకొని ధ్వంసం చేసేవి), నాన్ -కైనెటిక్ (ఎలక్ట్రానిక్ జామింగ్, సైబర్ దాడి, లేజర్ లేదా మైక్రోవేవ్ ద్వారా శత్రు శాటిలైట్లను నిర్వీర్యం చేసేవి) రెండు విధాలుగానూ పని చేయగలవు.
-
డెబ్రిస్ (చెత్త) సమస్య…: స్పేస్లో ఒక శాటిలైట్ను క్షిపణితో పేల్చివేస్తే వచ్చే చెత్త వేల కిలోమీటర్ల వేగంతో తిరుగుతూ ఇతర దేశాల శాటిలైట్లతో పాటు అమెరికా సొంత శాటిలైట్లను కూడా ధ్వంసం చేస్తుంది. అందుకే అమెరికా ఎక్కువగా నాన్- కైనెటిక్ (జామింగ్ లేదా లేజర్) విధానాల వైపు మొగ్గు చూపుతున్నట్లు రక్షణ నిపుణులు అంచనా వేస్తున్నారు.
ఇతర దేశాల పోటీ ఎలా ఉంది? ఏ స్థితిలో ఉన్నాయి? ఈ అంతరిక్ష ఆయుధ పోటీలో కేవలం అమెరికానే కాదు, రష్యా, చైనా కూడా చాలా కాలంగా ముందడుగులో ఉన్నాయి…
-
రష్యా…: రష్యా ఇప్పటికే కొన్ని ప్రత్యేక శాటిలైట్లను (ఉదాహరణకు: Nivelir సిరీస్ లేదా Kosmos శాటిలైట్లు) అమెరికా నిఘా శాటిలైట్ల కక్ష్యలోనే ప్రవేశపెట్టి, వాటికి అతి సమీపంగా తిప్పుతూ భయపెడుతున్నట్లు అమెరికా ఆరోపించింది. అంతేకాకుండా గతంలో సొంత శాటిలైట్పైనే మిసైల్ ప్రయోగించి పరీక్షలు జరిపింది.
-
చైనా…: చైనా కూడా స్పేస్లో ‘డాగ్ఫైటింగ్’ (అంతరిక్షంలో ఒకదానిని ఒకటి వెంబడించడం, సమీపించడం) చేయగల సామర్థ్యమున్న శాటిలైట్లను ప్రయోగించింది. శత్రు దేశాల కమ్యూనికేషన్స్ను జామ్ చేసే శక్తివంతమైన మైక్రోవేవ్, లేజర్ ఆయుధాలను అభివృద్ధి చేసింది.
-
ఇతర దేశాలు…: భారత్ కూడా ‘మిషన్ శక్తి’ ద్వారా యాంటీ- శాటిలైట్ (A-SAT) క్షిపణి సామర్థ్యాన్ని విజయవంతంగా పరీక్షించిన విషయం తెలిసిందే. బ్రిటన్, జర్మనీ వంటి యూరోపియన్ దేశాలు కూడా రష్యా, చైనా అంతరిక్ష కార్యకలాపాలపై ఆందోళన వ్యక్తం చేస్తున్నాయి.
అమెరికా తాజా ప్రకటనపై చైనా, రష్యాలు తీవ్రంగా స్పందిస్తూ.. అమెరికా అంతరిక్షాన్ని యుద్ధ భూమిగా మారుస్తోందని, ఇది స్పేస్ ఆర్మ్స్ రేస్కు (ఆయుధ పోటీకి) దారితీస్తుందని హెచ్చరించాయి.
హాలీవుడ్ ‘స్టార్ వార్స్’ సినిమాలకూ, దీనికి తేడా ఏమిటి?
-
సినిమాల్లో (Star Wars): అంతరిక్షంలో భారీ అంతరిక్ష నౌకలు (Spaceships) లేజర్ గన్లతో ఒకదానిపై ఒకటి విజువల్ ఎఫెక్ట్స్తో దాడి చేసుకోవడం, గ్రహాల మధ్య యుద్ధాలు జరగడం చూపిస్తారు. ఇదంతా కల్పితం (Fiction)…
-
వాస్తవంలో…: ఇక్కడ మనుషులు స్పేస్ష్రిప్లలో కూర్చుని యుద్ధాలు చేయడం లేదు. భూమికి వందల, వేల కిలోమీటర్ల ఎత్తున భూమి చుట్టూ ప్రదక్షిణ చేసే శాటిలైట్లు (ఉపగ్రహాలు) దీనికి కేంద్రబిందువు. శత్రు దేశం మన జీపీఎస్, కమ్యూనికేషన్ లేదా మిలిటరీ నిఘా శాటిలైట్లను డియాక్టివేట్ చేయకుండా కాపాడుకోవడం లేదా శత్రువుల శాటిలైట్లను కంట్రోల్ చేయడం దీని అసలు ఉద్దేశం.
అంతర్జాతీయ చట్టాలు ఏం చెబుతున్నాయి? 1967 నాటి ‘ఔటర్ స్పేస్ ట్రీటీ’ (Outer Space Treaty) ప్రకారం అంతరిక్షంలో అణుబాంబులు లేదా ఇతర సామూహిక వినాశన ఆయుధాలు (WMD) మోహరించడాన్ని పూర్తిగా నిషేధించారు. అయితే, సాంప్రదాయ లేదా కన్వెన్షనల్ ఆయుధాలు, స్పేస్ కంట్రోల్ సిస్టమ్స్ గురించి ఆ ఒప్పందంలో స్పష్టమైన నిబంధనలు లేవు. దీన్ని ఆసరా చేసుకునే అగ్రరాజ్యాలు ఈ సాంకేతికతను అభివృద్ధి చేస్తున్నాయి….
Share this Article