‘‘ వసూళ్లు తప్ప విలువల్లేవు – నేనిక నటించను – ఇక చాలు ’’

.

అనంత నాగ్… నిస్సందేహంగా మంచి నటుడు, చాలా సీనియర్, కన్నడ ఇండస్ట్రీలో ప్రముఖుడు, సుదీర్ఘమైన అనుభవం… తనకు భారతీయ చలనచిత్ర రంగంలో అత్యున్నత పురస్కారమైన ‘దాదాసాహెబ్ ఫాల్కే అవార్డు’ (2024) వరించింది… ఈ నేపథ్యంలో, కన్నడ దిగ్గజ నటుడు అనంత నాగ్ చేసిన వ్యాఖ్యలు ప్రస్తుతం సినీ వర్గాల్లో తీవ్ర చర్చనీయాంశంగా మారాయి.

ఐదు దశాబ్దాలకు పైగా సుదీర్ఘ అనుభవం, 300కి పైగా చిత్రాల్లో నటించిన అనుభవం ఉన్న ఆయన ఇకపై నటనకు పూర్తిగా స్వస్తి పలకాలని నిర్ణయించుకున్నట్లు ప్రకటించాడు… విజయ కర్నాటక, ఎన్డీటీవీ, సినిమా ఎక్స్‌ప్రెస్ కథనాల ప్రకారం ఆయన విలేకరులకు చెప్పిన వివరాలు ఏమిటంటే..?

• వసూళ్ల వేటపై తీవ్ర అసంతృప్తి…: ఇండస్ట్రీ పూర్తిగా కమర్షియల్ బాక్సాఫీస్ లెక్కలు, వసూళ్ల మోజులో పడిపోయిందని ఆయన ఆవేదన వ్యక్తం చేశాడు. కేవలం కలెక్షన్ల చుట్టూనే సినిమాలు తిరుగుతుండటం వల్ల తనకు తీవ్ర చిరాకుగా ఉందని స్పష్టం చేశాడు… 

• కథల నాణ్యత పడిపోవడం…: నేటి చిత్రాల్లో మంచి కథలు, అర్థవంతమైన సంభాషణలు కరువయ్యాయని, కేవలం టెక్నాలజీ, గ్రాఫిక్స్, భారీ అర్భాటాలకు మాత్రమే ప్రాధాన్యత ఇస్తున్నారని  విమర్శించాడు. ప్రేక్షకులకు కంటెంట్ ఇచ్చే విషయంలో దర్శక- నిర్మాతలు విఫలమవుతున్నారని అభిప్రాయపడ్డాడు….

• చివరి 5 సినిమాల చేదు అనుభవం…: తాను ఇటీవలి కాలంలో ఎంతో నమ్మి ఒప్పుకున్న చివరి ఐదు సినిమాలు బాక్సాఫీస్ వద్ద పరాజయంపాలు కావడం తన నిర్ణయానికి తక్షణ కారణమని ఆయన కుండబద్దలు కొట్టాడు…. “ఇక చాలు, ఇక్కడితో ఇవన్నీ ఆపేయడమే మంచిది అని ఆ క్షణమే నిర్ణయించుకున్నాను. ఇకపై ఎలాంటి సినిమాల్లోనూ నటించను” అని ఆయన స్పష్టం చేశాడు…

• ఆరోగ్య సమస్యలనే వదంతులకు చెక్…: తాను నటన నుంచి తప్పుకోవడానికి ఆరోగ్య సమస్యలే కారణమంటూ వస్తున్న వదంతులను ఆయన పూర్తిగా కొట్టిపారేశాడు. కేవలం మారుతున్న సినీ వాతావరణం, రుచించని స్క్రిప్ట్‌లు, పరిశ్రమలో వస్తున్న చెడు పోకడల కారణంగానే ఈ కఠిన నిర్ణయం తీసుకున్నట్లు తేల్చిచెప్పాడు…

సుదీర్ఘకాలం పాటు తన సహజమైన నటనతో, ‘మాల్గుడి డేస్’ వంటి క్లాసిక్స్ నుండి ‘కె.ಜಿ.ఎఫ్’ వంటి మాస్ చిత్రాల వరకు వైవిధ్యమైన పాత్రలతో ప్రేక్షకులను అలరించిన ఒక దిగ్గజ నటుడు… దేశ అత్యున్నత పురస్కారం అందుకునే తరుణంలోనే పరిశ్రమ ప్రస్తుత తీరుపై ఇంతటి నిరాసక్తత వ్యక్తం చేయడం నిజంగా సినీరంగంలో ఆత్మపరిశీలన చేసుకోవాల్సిన విషయమని ప్రముఖ మీడియా సంస్థలు విశ్లేషించాయి.

ఐదు దశాబ్దాలకు పైగా ఎంతో మందికి స్ఫూర్తినిచ్చిన ఆయన లాంటి సీనియర్ నటుడు పూర్తిగా తప్పుకోవడానికి బదులుగా, తన స్థాయికి తగిన పాత్రలు వస్తే నటిస్తానని చెప్పి ఉంటే బాగుండేదని చాలామంది సినీ అభిమానులు భావిస్తున్నారు.

కానీ, ప్రస్తుత ఇండస్ట్రీలో కమర్షియల్ హడావుడి మధ్య తన లాంటి అనుభవజ్ఞులకు నటనకు ఆస్కారం ఉన్న పాత్రలు దొరకడం కష్టమైపోయిందని ఆయన ఆవేదన చెంది ఉంటాడు. వసూళ్ల ఒత్తిడిలో పడి మంచి పాత్రలను సైతం పక్కన పెడుతున్న ప్రస్తుత సినీ వాతావరణంపై ఉన్న తీవ్రమైన విసుగు వల్లే ఆయన అలా ఆవేశంగా లేదా ఆఖరి నిర్ణయంలాగా మాట్లాడి ఉండవచ్చు. మంచి నటీనటులకు ఇలాంటి నిరాశలు కలగడం పరిశ్రమకు నిజంగానే నష్టమే. చూడాలి.