.
ఒక్క సినిమాకు నాలుగు OTT మార్కెట్లు.. రూ.600 కోట్ల డిజిటల్ బిజినెస్ సాధ్యమేనా? ఒకప్పుడు తెలుగు సినిమా అంటే తెలుగు రాష్ట్రాల మార్కెట్. ఆ తర్వాత పాన్ ఇండియా. ఇప్పుడు పాన్ వరల్డ్! తెలుగు సినిమా ప్రయాణం చూస్తుంటే ఈ పరిణామం వెనుక రాజమౌళి వంటి దర్శకుల కృషి ఎంత ఉందో అర్థమవుతుంది. ముఖ్యంగా ‘బాహుబలి’, ‘ఆర్ఆర్ఆర్’ సినిమాలు తెలుగు సినిమాకు అంతర్జాతీయంగా కొత్త గుర్తింపును తీసుకొచ్చాయి. ఇప్పుడు మహేశ్‌బాబుతో రాజమౌళి తెరకెక్కిస్తున్న ‘వారణాసి’పై కూడా అదే స్థాయిలో భారీ అంచనాలున్నాయి.
అయితే, ఈ సినిమా థియేటర్లలో ఎంత వసూలు చేస్తుందన్నదే కాదు.. విడుదలకు ముందే డిజిటల్ హక్కుల ద్వారా ఎంత బిజినెస్ చేయగలదన్నది ఇప్పుడు ఆసక్తికరంగా మారింది.
Ads
నెట్‌ఫ్లిక్స్ ఆఫర్ రూ.150 కోట్లేనా? వారణాసి OTT హక్కుల కోసం నెట్‌ఫ్లిక్స్ రూ.150 కోట్లు ఆఫర్ చేసిందన్న వార్తలు ఇటీవల చర్చనీయాంశమయ్యాయి… మరోవైపు, సినిమా స్థాయికి ఈ మొత్తం చాలా తక్కువని, నిర్మాతలు ఇంకా పెద్ద మొత్తాన్ని ఆశిస్తున్నారని కథనాలు వచ్చాయి… కొన్ని మీడియా సంస్థలు రూ.500 కోట్ల నుంచి రూ.650 కోట్ల వరకు డిజిటల్ బిజినెస్ ఉండవచ్చంటూ అంచనాలు కూడా ప్రచురించాయి…
ఇక్కడే మరో ఆసక్తికరమైన వాదన తెరపైకి వచ్చింది… నెట్‌ఫ్లిక్స్ ఇచ్చినట్లు చెబుతున్న రూ.150 కోట్ల ఆఫర్ మొత్తం సినిమా హక్కుల కోసం కాకుండా ఒక భాషకు మాత్రమేనని, నిర్మాతలు హక్కులను భాషలు, అంతర్జాతీయ మార్కెట్లవారీగా విడగొట్టి వేర్వేరు సంస్థలకు విక్రయించే వ్యూహం అనుసరిస్తున్నారని ప్రచారం జరుగుతోంది…
ఇదే నిజమైతే బిజినెస్ లెక్కలు పూర్తిగా మారిపోతాయి… కానీ ఈ నాలుగు విభాగాల వ్యూహం అధికారికంగా ధ్రువీకరణ పొందలేదు. కాబట్టి ప్రస్తుతానికి దీన్ని ఆసక్తికరమైన పరిశ్రమ ప్రచారంగానే చూడాలి…
నాలుగు మార్కెట్లుగా విడగొడితే? ప్రచారంలో ఉన్న వాదన ప్రకారం వారణాసి డిజిటల్ హక్కులను నాలుగు విభాగాలుగా చూడొచ్చు… తెలుగు ఒరిజినల్ వెర్షన్, హిందీ వెర్షన్, ఇతర భారతీయ భాషల వెర్షన్లు, అంతర్జాతీయ భాషల వెర్షన్లు…
ఈ విభజన వెనుక వ్యాపారపరమైన ఆలోచన అర్థం చేసుకోవడం కష్టం కాదు… తెలుగు వెర్షన్‌కు ఒక మార్కెట్ ఉంది… హిందీ వెర్షన్‌కు మరో భారీ ప్రేక్షకవర్గం ఉంది… తమిళం, కన్నడ, మలయాళం భాషల్లోనూ డిమాండ్ ఉండొచ్చు… ఇక అంతర్జాతీయ మార్కెట్‌లో ఇంగ్లీష్‌తో పాటు ఇతర భాషల ద్వారా ప్రేక్షకులను చేరుకోవాలన్నది మరో అవకాశంగా కనిపిస్తుంది…
అయితే, భాషలవారీగా హక్కులను విక్రయించడం ఒక విషయం… ప్రతి భాషలోనూ వేర్వేరు OTT సంస్థలు భారీ మొత్తాలు చెల్లించడానికి సిద్ధంగా ఉండటం మరో విషయం… అంతర్జాతీయ వెర్షన్‌కు డాలర్లలో బిడ్డింగ్ జరుగుతోందన్న ప్రచారానికి మాత్రం ఇప్పటివరకు ధ్రువీకరణ లేదు…
రాజమౌళి మార్కెటింగ్‌కి ఉన్న బలం ఇదే! రాజమౌళి ప్రత్యేకత కేవలం భారీ సెట్లు, విజువల్ ఎఫెక్ట్స్, స్టార్ హీరోలతో సినిమాలు తీయడంలోనే లేదు… సినిమా విడుదలకు ముందే దానిపై ప్రేక్షకుల్లో ఆసక్తి పెంచడం, సినిమా పరిధిని విస్తరించడం, ప్రతి ప్రచార కార్యక్రమాన్నీ ఒక ఈవెంట్‌గా మార్చడం కూడా ఆయనకు బాగా తెలుసు… తను ఏదైనా సరే, ఎక్కువ రేటుకు అమ్మగలడు…
‘ఆర్ఆర్ఆర్’కు పాశ్చాత్య దేశాల్లో వచ్చిన గుర్తింపు, అంతర్జాతీయ ప్రేక్షకుల్లో భారతీయ సినిమాల పట్ల పెరిగిన ఆసక్తి ‘వారణాసి’కి ఉపయోగపడవచ్చు… మహేశ్‌బాబు, ప్రియాంక చోప్రా, పృథ్వీరాజ్ సుకుమారన్ వంటి నటీనటులు ఉండటం కూడా సినిమాపై అంచనాలను పెంచుతోంది…
అయితే, అంతర్జాతీయ గుర్తింపు వచ్చిందంటే అంతర్జాతీయ OTT సంస్థలు ఎంత ధరైనా చెల్లిస్తాయనుకోవడం పొరపాటు… ఆయా మార్కెట్లలో ప్రేక్షకుల సంఖ్య, సినిమాను ప్రమోట్ చేయడానికి అయ్యే ఖర్చు, ఇతర సినిమాలతో పోటీ, హక్కుల కాలపరిమితి వంటి అంశాలన్నీ ధరను ప్రభావితం చేస్తాయి…
వారణాసి నిజంగానే తెలుగు సినిమాను పాన్ వరల్డ్ స్థాయికి తీసుకెళ్తుందా? లేక ఆ స్థాయి అంచనాలే ముందుగా బిజినెస్‌ను ఆకాశానికి తీసుకెళ్తున్నాయా? దీనికి సమాధానం సినిమా విడుదలైన తర్వాతే కాదు, దాని అసలు ఒప్పందాల వివరాలు బయటకు వచ్చినప్పుడే తెలుస్తాయి…
Share this Article