Subramanyam Dogiparthi……. వాణిశ్రీ జైత్రయాత్రలో మరో సినిమా 1970 లో వచ్చిన ఈ చిట్టిచెల్లెలు సినిమా . NTR- సావిత్రిల రక్తసంబంధం సినిమాలో సూరేకాంతం అన్నాచెల్లెళ్ళను హింసిస్తే , ఈ చిట్టిచెల్లెలు సినిమాలో అన్నను విధి హింసిస్తుంది . NTR నటన అద్భుతం . చిన్నప్పటి నుంచి తానే తల్లీతండ్రయి చెల్లెల్ని పెంచి , విధి ఆడిన నాటకంలో తన తండ్రే చెల్లెలు భర్తను హత్య చేస్తే , ఆ నిజాన్ని చెల్లెలుకు తెలియకుండా , బిడ్డను కని చనిపోయిన చెల్లెలు బిడ్డకు మళ్లా తానే తల్లీతండ్రి కావటానికి సిధ్ధపడటం . ఇదే క్లుప్తంగా ఆయన పాత్ర . విషాద సన్నివేశాల్లో ఆయన నటన బ్రహ్మాండం .
అన్నాచెల్లెళ్ళ సెంటిమెంట్ ఏ రోజుల్లో అయినా పండుతుంది . NTR రక్తసంబంధం , ఆడపడుచు , ఈ చిట్టిచెల్లెలు , ANR బంగారుగాజులు , రజనీకాంత్- కీర్తి సురేష్ పెద్దన్న , రాధిక- శశికుమార్ రక్తసంబంధం , రాజశేఖర్ గోరింటాకు ఇందుకు తార్కాణాలు . అయితే , NTR తో మరొకరిని పోల్చలేం . ఈ సినిమాలో కూడా మనకు ఎన్టీఆర్- సావిత్రిలను గుర్తుకుతెస్తారు NTR- వాణిశ్రీ .
ఎలా అయితే రక్తసంబంధం సినిమా చూసి కళ్ళు చెమర్చకుండా ఉండవో , అలాగే ఈ చిట్టిచెల్లెలు సినిమా కూడా . NTR నటన ఎంతటి పాషాణ హృదయుడికయినా కళ్ళు చెమర్చాల్సిందే .
Ads
యస్ రాజేశ్వరరావు సంగీత దర్శకత్వంలో పాటలన్నీ ఈరోజుకీ సూపర్ హిట్టే . దాశరధి వ్రాసిన అందాల పసిపాపా అందరికీ కనుపాపా పాట మూడు సార్లు వస్తుంది . సాహిత్యం , సంగీతం , సుశీల -ఘంటసాలల గాత్రం చాలా గొప్పగా ఉంటాయి . నారాయణరెడ్డి వ్రాసిన ఈరేయి తీయనిది ఈ చిరుగాలి మనసైనది పాట శ్రావ్యంగా ఉంటుంది . దాశరధి వ్రాసిన మరో చక్కటి పాట మంగళ గౌరి మముగన్న తల్లి మా మనవి దయతో వినవమ్మా పాట ఆడవాళ్లు పేరంటాళ్ళల్లో కూడా పాడుతుంటారు . అంత హిట్టయింది .
NTR సినిమా అంటే ఎలాగోలాగా ఓ మారు వేషం ఉండాల్సిందే కదా ! ఈ సినిమాలో మారు వేషమయితే ఉండదు కానీ , ఓ నాటకం వేషం మాత్రం ఉంటుంది . అది శ్రీరామ వనవాసం నాటకంలో రాములోరి పాత్ర . ఆయన నటించటేం ఏంటి నా మొహం ! ఆయనే రాముడయితే . ఈ నాటకంలో ఆయనతోపాటు సీతగా గీతాంజలి , లక్ష్మణుడిగా పద్మనాభం , శూర్పణఖగా సురభి బాలసరస్వతి నటిస్తారు . గీతాంజలి మరోసారి versatile నటి అని మనం కితాబు ఇవ్వక తప్పదు .
NTR శైలిలో పట్టాలి అరక దున్నాలి మెరక అనే వ్యవసాయం పాట , ఝుం ఝం ఝుం తుమ్మెద పాడింది , వన్ టు త్రీ ఇటు రావయ్యా పాటలు బాగుంటాయి . NTR జోడీగా రాజశ్రీకు చాలా హుందా అయిన పాత్ర లభించింది ఈ సినిమాలో . ప్రేమించిన వ్యక్తికి అండగా , కొండంత అండగా నిలబడే పాత్ర . ఇప్పటి తరం ప్రేమికులకు ఆశ్చర్యం కూడా కలుగుతుందేమో ! ఇప్పుడు ప్రేమంటే use & throw కదా ! సతీ సుమతిలు , సతీ సావిత్రిలు , శ్రీరామచంద్రులూ ఎక్కడ దొరుకుతారు . Materialistic , opportunistic and pecuniary relationships .
మహిళల మెప్పు పొందిన ఈ సినిమా వంద రోజులు ఆడింది . కమర్షియల్ గా , కళాపరంగా , అన్ని కోణాల్లో గొప్ప చిత్రం . చూడని వాళ్ళు ఎవరయినా ఉంటే యూట్యూబులో తప్పక చూడండి . NTR- వాణిశ్రీల నటన అలరిస్తుంది . Unmissable , sentimental , emotional movie .
Share this Article