.
ఒకప్పుడు హైదరాబాద్ అంటే గుర్తొచ్చేవి చార్మినార్, బిర్యానీ, హైటెక్ సిటీ, ఐటీ కంపెనీలు. ఆ తర్వాత ఫార్మా, స్టార్టప్లు, డేటా సెంటర్లు కూడా ఆ జాబితాలో చేరాయి. ఇప్పుడు ఆ జాబితాలోకి మరో పేరు చేరుతోంది… ప్రపంచ ప్రఖ్యాత విశ్వవిద్యాలయాలు!
హార్వర్డ్ యూనివర్సిటీ హైదరాబాద్లో ఎగ్జిక్యూటివ్ ఎడ్యుకేషన్ కోర్సులను ప్రారంభించబోతోంది. డిసెంబర్ 2026 నుంచి ఈ కార్యక్రమాలు ప్రారంభమవుతాయని తెలంగాణ ముఖ్యమంత్రి రేవంత్ రెడ్డి ప్రకటించాడు. ఇప్పటికే ఈ ఏడాది హార్వర్డ్ కెన్నడీ స్కూల్ ఆఫ్ గవర్నమెంట్లో ఆరు రోజుల లీడర్షిప్ ప్రోగ్రామ్లో పాల్గొన్న రేవంత్ రెడ్డి.. ఇప్పుడు హార్వర్డ్ విద్యా కార్యక్రమాలను హైదరాబాద్కు తీసుకురావడంపై ప్రకటన చేయడం విశేషమే…
Ads
ఇది చిన్న విషయం కాదు. హార్వర్డ్ పేరు ప్రపంచంలో ఉన్నత విద్యకు ఒక బ్రాండ్. అయితే ఇక్కడ ఒక విషయం స్పష్టంగా చెప్పాలి. హార్వర్డ్ హైదరాబాద్లో పూర్తి స్థాయి డిగ్రీ క్యాంపస్ను ఏర్పాటు చేస్తోంది అని కాదు. ప్రస్తుతం ప్రకటించింది ఎగ్జిక్యూటివ్ ఎడ్యుకేషన్ కార్యక్రమాలు. ఏ కోర్సులు? ఎవరికి? ఎంత ఫీజు? అడ్మిషన్ ఎలా? వంటి పూర్తి వివరాలు ఇంకా వెల్లడి కాలేదు. ఈ కార్యక్రమం డాక్టర్ మర్రి చెన్నారెడ్డి మానవ వనరుల అభివృద్ధి సంస్థతో అనుసంధానంగా ఉండే అవకాశం ఉన్నట్లు సమాచారం.
కానీ అసలు ఆసక్తికరమైన విషయం హార్వర్డ్ ఒక్కటే కాదు. హైదరాబాద్ వైపు ఇప్పుడు ప్రపంచంలోని ప్రముఖ విద్యాసంస్థలు చూస్తున్నాయి. యూనివర్సిటీ ఆఫ్ లండన్, నార్త్ ఈస్టర్న్ యూనివర్సిటీ ఇప్పటికే హైదరాబాద్లో ఆఫ్షోర్ క్యాంపస్ల ఏర్పాటుపై ముందుకు వస్తున్నాయి. ఎంఐటీ, పర్డ్యూ వంటి సంస్థలతోనూ చర్చలు జరుగుతున్నాయని ప్రభుత్వం చెబుతోంది. హార్వర్డ్, ఎంఐటీ, యూనివర్సిటీ ఆఫ్ లండన్, వర్జీనియా టెక్, నార్త్ ఈస్టర్న్ వంటి సంస్థలతో ఎగ్జిక్యూటివ్ ప్రోగ్రామ్లు, డ్యూయల్ డిగ్రీలు, ఫ్యాకల్టీ ట్రైనింగ్, రీసెర్చ్ వంటి అంశాల్లో భాగస్వామ్యాలపై చర్చలు జరుగుతున్నాయి.
అంటే… హైదరాబాద్ ఇక కేవలం “ఉద్యోగాల కోసం వెళ్లే నగరం” మాత్రమే కాదు… “చదువుకోవడానికి ప్రపంచం వచ్చే నగరం”గా మారే ప్రయత్నం మొదలైందన్నమాట. ఇది తెలంగాణ పిల్లలకు మరింత ముఖ్యమైన పరిణామం… అవకాశం…
ఇప్పటివరకు ప్రపంచ స్థాయి సంస్థల్లో చదవాలంటే అమెరికా, బ్రిటన్ వంటి దేశాలకు వెళ్లాల్సి వచ్చేది. దానికి భారీ ఫీజులు, ప్రయాణ ఖర్చులు, వీసా సమస్యలు, వసతి ఖర్చులు… ఇలా ఎన్నో అడ్డంకులు. అంతేకాదు, అక్కడి విద్యా వ్యవస్థకు సరిపోయేలా ముందే పెద్ద మొత్తంలో పెట్టుబడి పెట్టాల్సి ఉంటుంది.
అదే ప్రపంచ స్థాయి విద్యా సంస్థల కార్యక్రమాలు హైదరాబాద్లో అందుబాటులోకి వస్తే? ప్రపంచ విద్యకు మన నగరంలోనే ఒక తలుపు తెరుచుకున్నట్టే.
అయితే దీనిని కేవలం తెలంగాణకే పరిమితం చేయాల్సిన అవసరం లేదు. హైదరాబాద్ ఇప్పటికే దేశవ్యాప్తంగా విద్యార్థులను ఆకర్షిస్తున్న నగరం. ఐఐటీ హైదరాబాద్, యూనివర్సిటీ ఆఫ్ హైదరాబాద్, ఉస్మానియా యూనివర్సిటీ, ఐఎస్బీ, నల్సార్ వంటి విద్యాసంస్థలతో పాటు మెడికల్, ఫార్మా, టెక్నాలజీ, మేనేజ్మెంట్ రంగాల్లో ఇప్పటికే బలమైన ఎకోసిస్టమ్ ఉంది. ఇప్పుడు అంతర్జాతీయ విశ్వవిద్యాలయాలు కూడా చేరితే ఆ వ్యవస్థకు మరో స్థాయి వస్తుంది.
ఇక్కడే బ్రెయిన్ డ్రెయిన్కు కూడా కొంత సమాధానం దొరకొచ్చు. ప్రపంచ స్థాయి చదువుల కోసం మన పిల్లలు విదేశాలకు వెళ్లడం తప్పు కాదు. కానీ ప్రపంచ స్థాయి అవకాశాలే ఇక్కడికి వస్తే? విదేశీ విద్య కోసం వెళ్లాల్సిన అవసరం ఉన్న సందర్భాలు తగ్గుతాయి. అంతర్జాతీయ ఫ్యాకల్టీ, కొత్త పరిశోధనలు, విదేశీ విద్యార్థులు, గ్లోబల్ కంపెనీలతో అనుసంధానం… ఇవన్నీ ఒకే ఎకోసిస్టమ్లో పెరిగే అవకాశం ఉంటుంది.
అందుకే భారత్ ఫ్యూచర్ సిటీలో ఎడ్యుకేషన్ హబ్ ఏర్పాటు చేయాలన్న తెలంగాణ ప్రభుత్వ ఆలోచన కూడా ఆసక్తికరంగా మారుతోంది. అక్కడ యంగ్ ఇండియా స్కిల్స్ యూనివర్సిటీతో పాటు విద్య, పరిశ్రమ, పరిశోధనలను ఒకే వేదికపైకి తీసుకురావాలన్న లక్ష్యం ఉంది. ఇది సరిగ్గా జరిగితే హైదరాబాద్కు మరో కొత్త గుర్తింపు రావచ్చు. సైబర్ సిటీ… ఫార్మా సిటీ… ఇప్పుడు నాలెడ్జ్ సిటీ!
అయితే ఇందులో మరో ముఖ్యమైన ప్రశ్న కూడా ఉంది. ప్రపంచ స్థాయి సంస్థలు రావడం ఒక విషయం. వాటి విద్యను సామాన్య విద్యార్థికి ఎంతవరకు అందుబాటులోకి తీసుకురాగలమన్నది మరో విషయం. ఫీజులు, సీట్లు, అర్హతలు, స్కాలర్షిప్లు, స్థానిక విశ్వవిద్యాలయాలతో అనుసంధానం వంటి అంశాలే అసలు ప్రభావాన్ని నిర్ణయిస్తాయి. ఇక ముందు ఎన్ని ప్రపంచ స్థాయి విశ్వవిద్యాలయాలు హైదరాబాద్ గడప తొక్కుతాయో చూడాలి!
Share this Article