మన అన్నం పళ్లెంపై ఈయన పేరు! ఆకలి తీర్చిన నాయకుడు!!

.

ఆకలి తీర్చిన ‘అజ్ఞాత’ యోధుడు: సి. సుబ్రహ్మణ్యం…. అది 1960ల నాటి భారతదేశం. దేశమంటే కేవలం సరిహద్దులు కాదు, అప్పుడు దేశమంటే ‘ఆకలి’. పొద్దున్నే లేస్తే కడుపు నిండా తిండి దొరుకుతుందో లేదో తెలియని దయనీయ స్థితి. అమెరికా పంపే పాతబడిన ఎర్ర గోధుమల కోసం మన ఓడరేవుల వైపు ఆశగా చూసేవాళ్లం. ‘షిప్-టు-మౌత్’ (ఓడ వస్తేనే నోట్లోకి ముద్ద) అనే బతుకు మనది.

ఆ సమయంలో దేశ వ్యవసాయ శాఖా మంత్రిగా బాధ్యతలు తీసుకున్నారు సి. సుబ్రహ్మణ్యం. ఒకవైపు కరువు, మరోవైపు ఆకలితో అలమటిస్తున్న కోట్లాది మంది ప్రజలు. ఈ సమస్యకు పరిష్కారం అప్పుడే ప్రపంచంలో వినిపిస్తున్న ‘హరిత విప్లవం’. డాక్టర్ ఎం.ఎస్. స్వామినాథన్, నార్మన్ బోర్లాగ్ సూచించిన మెక్సికన్ పొట్టి గోధుమ విత్తనాలు ఒక ఆశాకిరణంలా కనిపించాయి.

కానీ, మార్పును ఆహ్వానించడం కన్నా, భయపడటమే ఎక్కువైంది అప్పట్లో. “విదేశీ విత్తనాలు వద్దు, మన మట్టి పాడవుతుంది” అని శాస్త్రవేత్తలనే కాకుండా, సొంత మంత్రులు, ప్రతిపక్షాలు సుబ్రహ్మణ్యంని తీవ్రంగా విమర్శించారు. ఎవరూ ఆ విత్తనాలను నమ్మలేదు.

ఒక మంత్రికాదు.. ఒక రైతుగా మారిన నాయకుడు! ఎవరైతే విమర్శించారో, వారందరికీ నోరు మూయించేలా సుబ్రహ్మణ్యం ఒక సాహసం చేశారు. ఎవరికీ భయపడకుండా, తన ప్రభుత్వ బంగ్లాలోని అందమైన గడ్డిని (Lawn) తొలగించి, అక్కడ ఆ కొత్త విత్తనాలను నాటారు. తన ఇంటినే ఒక ప్రయోగశాలగా మార్చుకుని, మట్టిలో దిగి స్వయంగా రైతుగా మారారు. ఆయన నాటిన విత్తనాలు అద్భుతమైన దిగుబడిని ఇచ్చాయి. అది చూశాక కానీ ఎవరికీ నమ్మకం కలగలేదు.

రిస్క్.. ఒక దేశ భవిష్యత్తును మార్చిన నిర్ణయం! ప్రయోగం సక్సెస్ అయ్యాక, ఆయన ఆగలేదు. 18,000 టన్నుల విత్తనాలను దిగుమతి చేసుకున్నారు. ఆ నిర్ణయం ఎంత పెద్ద రిస్కో ఆయనకు తెలుసు. ఆ విత్తనాలు విఫలమైతే, ఆయన రాజకీయ జీవితం సమాప్తం, దేశంలో ఆకలి చావులు ఇంకా పెరుగుతాయి. కానీ ఆయన తన పదవి కంటే ప్రజల ఆకలికే ప్రాధాన్యతనిచ్చారు.

ఆ తర్వాత దేశం గర్వించే నిర్ణయాలు తీసుకున్నారు….

• MSP (కనీస మద్దతు ధర)…: రైతు పండించిన పంటకు గ్యారెంటీ ఇచ్చారు.

• FCI (ఫుడ్ కార్పొరేషన్ ఆఫ్ ఇండియా)…: దేశం కోసం ధాన్యం నిల్వ ఉంచే వ్యవస్థను నిర్మించారు.

ఫలితం… రెండేళ్లలో భారత్ అద్భుతాన్ని సృష్టించింది. 10 మిలియన్ టన్నుల గోధుమ దిగుబడి 17 మిలియన్ టన్నులకు పెరిగింది. అడుక్కునే దేశం నుంచి, ఎగుమతి చేసే స్థాయికి ఎదిగాం. 1998లో భారత ప్రభుత్వం ఆయనకు ‘భారతరత్న’ ఇచ్చి గౌరవించింది.

నేటి యువతకు సందేశం…: నేడు మనకు చిన్న కష్టం రాగానే, సోషల్ మీడియాలో వచ్చే చిన్న విమర్శకే కుంగిపోతున్నాం. కానీ సుబ్రహ్మణ్యం జీవితం మనకు నేర్పే పాఠం ఒక్కటే: “మనం చేసే పని సరైనదైతే, ప్రపంచం ఎదురు నిలిచినా లెక్కచేయకండి. మాటలతో కాదు, మీరు సాధించిన రిజల్ట్స్ తో సమాధానం చెప్పండి…”

మనం తినే ప్రతి మెతుకు వెనుక ఒక రైతు శ్రమ ఉంటే.. ఆ మెతుకు మన ప్లేట్ లోకి వచ్చేలా చేసిన దార్శనికత సి. సుబ్రహ్మణ్యందే…