.
Gottimukkala Kamalakar… జ్ఞానపీఠమైనా కవి పాదపీఠమే…!
ఈ నేల మీద పుట్టిన పోతన తర్వాత అంతటి పాండిత్యప్రకర్ష గల సాహితీ ధురీణుడు సినారె..!
జానపదాలు, సినీగీతాలు, జ్ఞానపథాలు, గజళ్లూ, ద్విపదలూ, ఖండకావ్యాలు, దీర్ఘ కవితలూ, లఘు కవితలూ, పరిశోధనా గ్రంధాలూ, ఓ సినిమా కి మాటలూ, ఆయన రాసిన ప్రతీ అక్షరమూ అక్షయమే…!
ఆయన చిరంజీవి..!
**** పరుగు పరుగు పాయలోన పైకి పైకి తేలుతుంటె నురగ తీరుగా ఉంటవే…!
విచ్చుకోని మొగ్గవోలె, పచ్చిపాల నిగ్గువోలె ముచ్చటెత్తి పోతున్నావే…!
ఇది పల్లెపడుచును వర్ణించిన జనపదం.
Ads
*** వినీల కచభర విలాసబంధుర తనూలతిక చంచలించి పోగా ఆడవే..!
ఇది కవి రసహృదయం.
*** సౌందర్యమూ, సౌశీల్యమూ నిలువెల్ల నెలకొన్న కలభాషిణికి అభినందన మందారమాలా…!
ఇది ప్రబంధకారుడి ప్రణయోద్వేగం.
*** ఆ నెన్నడుము ఆడిన చాలూ; రవళించులే నవకవితా ప్రబంధాలు..!
ఇది అభిమాని ఆరాధనాగీతం.
*** చిట్టి ఈడు పాయెనని, చిగురు ఈడు వచ్చెనని చీర కట్టినారె గుమ్మలూ..!
అంటూ పల్లెపిల్ల సవర్తాడిన ముచ్చట చెప్పినా,
కొండపల్లి కొయ్యబొమ్మా కోక కట్టి కూర్చుందమ్మా..!
అంటూ పుష్పవతి ఐన మేనమరదలి ముందు బావ సింగారాలు పోయినా అది సినారె పాటే..!
**** రామచక్కని బంగారు బొమ్మ రాత రంపపుకోత అయ్యిందన్నా అది సినారె రాతే…!
**** తెలుగు సినిమా పాటకు కవిత్వాన్ని వేటూరి అద్దితే; అదే తెలుగు పాటకు సినారె కావ్య నగిషీలు అద్దాడని చెప్పడం ఏ మాత్రం అతిశయోక్తి కాదు.
కిలికించితం; అమవస నిశి; గుత్తపు రవిక; అమ్మకచెల్ల లాంటి ప్రయోగాలు ఆయనకు పెన్నుతో పెట్టిన విద్య..!
ఓ పక్క పల్లెపదం; ఇంకోపక్క పండితపథం..!
ఎంతటి మహరాజైనా “బింబాధర మధురిమలనూ, బిగికౌగిలి గుసగుసలనూ” వాంఛిస్తాడని ఖలనాయకుడితో ఆయన పలికించిన యుగళ గీతం న భూతో..!
NTR బ్లాక్ &వైట్ సినిమా ఎంతిష్టమో, ఆయన ద్వారా సినిమా కి పరిచయమైన సినారె సాహిత్యం అంటే అంత వెర్రి ప్రేమ నాకు.
- సీతారామశాస్త్రి గారి భాషలో చెప్పాలంటే సినారె సెలయేరులాంటి సముద్రం. నా భాషలో మహాసాగరం. జానపదమైనా; జాణపదమైనా; ఙ్ఞానపథమైనా ఆ కారణజన్ముడి ముందు మిగిలిపోయిన మూక అంగుష్ఠసమానులు.
సినిమా పాటలు; ఏకవీరకి మాటలు; కవితలు ; కావ్యాలు; దీర్ఘకావ్యాలు; గజల్లు; వచన సాహిత్యం; ఉర్దూ సాహిత్యం..! ఆయన అధిరోహించని శిఖరాలులేవు.
***
ఆయన ఙ్ఞానపీఠాన్ని అధిరోహించినపుడు
ఎవడికిరా సన్మానం
ఎందుకురా సన్మానం
చెట్టంతటి పేరొందిన
చిగురుకు ఈ సన్మానం..!
పేరేమో సింగిరెడ్డి
నారాయణ రెడ్డి కాని
కులంకీళ్లు విరిచే
నా కలానికీ సన్మానం…!
అన్నారు. కానీ ఆయన చిగురంత పేరే పొందిన మహావృక్షం.
**** మహాకవీ.., జాషువా గారు చెప్పినట్లు మీకు మరణం ఉండదు. మీరు కాలత్రయాతీతులు.
మృత్యోర్మా అమృతంగమయా....!!
Share this Article