.
చిరంజీవి నటించిన మొదటి సినిమా . 1979 లో వచ్చిన ఈ పునాదిరాళ్ళు సినిమా చిరంజీవికి అద్భుతమైన పునాదిని వేసింది .
పల్లెటూర్లలో పెత్తందార్ల దాష్టీకం మీద కుప్పలకుప్పలు సినిమాలు ఈ సినిమా ముందూ వచ్చాయి , తర్వాతా వచ్చాయి . సినిమా సక్సెస్ అయ్యేది కానిదీ ఆడియన్సుకు ఎలా ప్రెజెంట్ చేసారు అనేదాన్ని బట్టి ఉంటుంది .
Ads
ఆడియన్సుకు పట్టేలా ఈ సినిమాను ప్రెజెంట్ చేసారు . టైటిల్సులోనే నిర్మాతలు సినిమా ఉద్దేశం చెప్పేసారు . యువతే పునాదిరాళ్ళు అని . యాదృచ్చికంగా చిరంజీవి మొదటి మూడు సినిమాలు ఇలాంటి కధాంశంతోనే వచ్చాయి . మన ఊరి పాండవులు , ప్రాణం ఖరీదు కూడా ఈ కోవకు చెందినవే .
చిరంజీవి నలుగురు మిత్రులలో ఒకడిగా నటించినా తన ప్రతిభను చక్కగా ప్రదర్శించుకున్నాడు . ముఖ్యంగా ఏ పల్లె ఏ వాడ అనే పాటలో చీరె కట్టుకుని కులుకు డాన్స్ వేసి తన ప్రత్యేకతను చాటుకున్నాడు . సాఫ్ట్ విలనీలో గోకిన రామారావు గొప్ప నటనను ప్రదర్శించాడు . ఇలాంటి పాత్రలు అతనికీ కొట్టిన పిండే .
ఇతర పాత్రల్లో నరసింహరాజు , కె వి చలం , కవిత , రోజారమణి , మహానటి సావిత్రి , జయమాలిని నటించారు . ఈ సినిమాకు హీరో నరసింహరాజే . హీరోయిన్ రోజారమణే అని చెప్పాలి . బాలనటిగా కానివ్వండి యువతిగా కానివ్వండి ఈ సినిమా ఆమెకు వందో సినిమా అని ఓ ఇంటర్వ్యూలో ఆమే చెప్పారు .
ఈ సినిమాకు దర్శకుడు , మొదట సోలో నిర్మాత గూడపాటి రాజకుమార్ . మొదట బ్లాక్ & వైట్లో కొంత తీసిన తర్వాత కలర్లో తీయాలనే ఆలోచనతో ఫజలుల్లా హక్ అనే ఔత్సాహకుడిని కలుపుకున్నారు . నిర్మాతగా టైటిల్సులో ఈయన పేరే ఉంటుంది . ఆయనతో పాటు మరి కొందరు ఆయన స్నేహితులు భాగస్తులులాగా ఉన్నారు . చాలా ముస్లిం పేర్లు టైటిల్సులో పడతాయి . కధ , మాటలు ధర్మవిజయ పిక్చర్స్ అనే పేర్కొన్నారు .
ఈ సినిమాకు సంగీత దర్శకత్వాన్ని ప్రేంజీ అందించారు . పాటలన్నీ శ్రావ్యంగా ఉంటాయి . బయట కూడా బాగానే పాపులర్ అయ్యాయి . చిరు చిరు నవ్వుల చిలకల్లారా అనే పాట పిల్లల మీద తీసింది చాలా బాగుంటుంది . అలాగే భారతదేశపు భావి పౌరులం అనే పాట నరసింహరాజు , చిరంజీవి , వారి మిత్రుల మీద ఉంటుంది . బాగా చిత్రీకరించారు కూడా .
కంచె చేను మేయునాడు కాచువాడు ఎవడురా అనే విషాదగీతం బాగుంటుంది . పాటల్ని జాలాది , గూడపాటి రాజకుమార్లే వ్రాసారు . పి యస్ నివాస్ ఫొటోగ్రాఫీ దర్శకుడు . ఈ సినిమాలో నటనకు గోకిన రామారావుకు ఉత్తమ నటుడిగా నంది అవార్డు వచ్చింది . అలాగే సినిమాకు కూడా కాంస్య నంది వచ్చింది .
మొత్తం మీద చిరంజీవికి గట్టి పునాది వేసిన ఈ పునాదిరాళ్ళు సినిమా చూడవలసిన సినిమాయే . యూట్యూబులో ఉంది . వీడియో క్వాలిటీ బాగాలేదు . చిరంజీవి అభిమాన సంఘాలు తమ మెగాస్టార్ మొదటి సినిమా వీడియోని క్వాలిటీగా ఉండేదాన్ని యూట్యూబులోకి ఎక్కించుకోకపోతే ఎలా ! మీ తర్వాత తరం అభిమానులు చిరంజీవి మొదటి సినిమాను క్వాలిటీగా చూడాలి కదా అభిమానులూ ! ఆ పని మీద ఉండండి .
#తెలుగుసినిమాలసింహావలోకనం #తెలుగుసినిమాలు ……… — దోగిపర్తి సుబ్రహ్మణ్యం
Share this Article