.
Subramanyam Dogiparthi …… ఈ ఆత్మబలం ఆ ఆత్మబలం కాదు . అక్కినేని , బి సరోజాదేవి , జగ్గయ్యలు నటించిన ఆ ఆత్మబలంలో ఆత్మ అంటే Will . ఆత్మబలం అంటే Will Power… కానీ బాలకృష్ణ , భానుప్రియ , సిల్క్ స్మితలు నటించిన ఈ ఆత్మబలంలో ఆత్మ అంటే పునర్జన్మతో మళ్ళా వచ్చిన ఆ ఆత్మ …
హిందీలో 1980లో వచ్చిన కర్జ్ సినిమాకు రీమేక్ మన తెలుగు సినిమా . కర్జ్ అంటే బహుశా బాకీ , అంటే పగ , అనుకుంటాను . హిందీలో రిషికపూర్ , టీనా మునిం , సిమి గరేవాల్ , ప్రాణ్ , ప్రేమనాధులు నటించారు . హిందీలో కూడా బాగా ఆడలేదు .
Ads
అయినా మనవాళ్లు ధైర్యంగా రైట్స్ తీసుకుని రీమేక్ చేసారు . తాతినేని ప్రసాద్ దర్శకుడు . ఇక్కడ కూడా బాగా ఆడలేదు . ప్రధాన పాత్రలలో నటించిన బాలకృష్ణ , సిల్క్ స్మిత , భానుప్రియ బాగానే , కాదు బాగా , నటించారు …
జమీందార్ శరత్ బాబు సిల్క్ స్మితను ప్రేమిస్తాడు . విలన్ నంబియార్ స్మితను జమీందారుని పెళ్ళి చేసుకుని చంపేయమని హుకుం జారీ చేస్తాడు . పెళ్ళి అయి జమీనుకు వెళ్ళే మార్గంలో కాళీ మాత ఆలయం వద్ద జమీందారుని జీపుతో గుద్ది గుద్ది చంపేస్తుంది . జమీనుని హస్తగతం చేసుకుంటుంది . జమీందార్ తల్లిని , చెల్లెలిని బంగళాలో నుంచి బయటకు నెట్టేస్తుంది .
చంపబడిన జమీందార్ బాలకృష్ణగా తిరిగి పుడతాడు . పెద్ద పాప్ సింగర్ అవుతాడు . గత జన్మలోని బంగళా , ఇతర ప్రదేశాలను చూసాక బాలకృష్ణకు గత జన్మ గుర్తుకొస్తుంది . ప్రేయసి భానుప్రియ , కబీర్ పాత్రధారి సత్యనారాయణలతో కలిసి గత జన్మలో ఏ కాళీ మాత ఆలయం వద్ద తనను చంపిందో అక్కడే స్మితను చంపుతాడు . సినిమా ముగుస్తుంది .
సినిమాకు హీరోహీరోయిన్లు బాలకృష్ణ , భానుప్రియలు అయితే నెగటివ్ షీరో సిల్క్ స్మితే . కధంతా ఆమె , హీరో బాలకృష్ణ చుట్టే తిరుగుతుంది . హిందీలో ప్రాణ్ వేసిన పాత్రలన్నీ ఆల్మోస్ట్ సత్యనారాయణనే వరించాయి ఈ సినిమాతో సహా . ఇతర ప్రధాన పాత్రలలో శరత్ బాబు , అంజలీదేవి , దీప , మిక్కిలినేని , సారధి ప్రభృతులు నటించారు . 1985 జనవరిలో వచ్చింది .
The movie is a musical one . పాటలన్నీ చక్రవర్తి సంగీత దర్శకత్వంలో బాగుంటాయి . వేటూరి వ్రాయగా బాలసుబ్రమణ్యం , సుశీలమ్మలు పాడారు . క్లైమాక్స్ సాంగ్ హైలైట్ . ఒక వన్నెల చిన్నెల అమ్మాయి అంటూ సాగే పాటలో గత జన్మలో జమీందారుని స్మిత ఎలా చంపిందో చూపుతూ సాగుతుంది .
మిగిలిన పాటలు చలిచలిగా , ఆకాశవీధిలో అందాల తారవో , కప్పుకుంటే దుప్పటేమిటో హుషారు హుషారుగా ఉంటాయి . ఓం శాంతి ఓం శాంతి శాంతి శాంతి పాట బాగా హిట్టయిన పాట . ట్యూన్స్ హిందీ సినిమా లోనివే వాడారు .
నేను హిందీ సినిమా కూడా చూసాను . సినిమా యూట్యూబులో ఉంది . బాలకృష్ణ , సిల్క్ స్మిత అభిమానులు ట్రై చేయవచ్చు . #తెలుగుసినిమాలసింహావలోకనం #తెలుగుసినిమాలు #సినిమాకబుర్లు
Share this Article