.
హైదరాబాద్… ఏడిచేవాడు ఏడుస్తూనే ఉంటాడు, ఇది విశ్వనగరంగా ఎప్పటికప్పుడు అనేక రంగాల్లో ప్రపంచం దృష్టిలో ఎదుగుతూనే ఉంటుంది… ఓ తాజా ఉదాహరణ కావాలా..? ప్రపంచ విమానయాన, రక్షణ తయారీ రంగాల చూపు మరోసారి హైదరాబాద్ వైపు మళ్లింది. ‘ఏరోమార్ట్ హైదరాబాద్ 2026’ (Aeromart Hyderabad 2026) రూపంలో నగరం మరో ప్రతిష్టాత్మక అంతర్జాతీయ సదస్సుకు సిద్ధమవుతోంది.
జూన్ 30 నుంచి జూలై 2 వరకు హైదరాబాద్ ఇంటర్నేషనల్ కన్వెన్షన్ సెంటర్ (HICC) వేదికగా జరగనున్న ఈ కార్యక్రమం, కేవలం ఒక సదస్సు మాత్రమే కాదు, భారతీయ తయారీ రంగానికి కొత్త దిశను నిర్దేశించే ఒక మైలురాయి.
Ads
మరి ఈ సదస్సు ప్రాముఖ్యత ఏమిటి? ‘ఏరోమార్ట్ హైదరాబాద్ 2026’ దేశీయ విమానయాన పరిశ్రమకు ఎన్నో అవకాశాలను తీసుకువస్తోంది. ఈ సదస్సు ఎందుకు కీలకమైందంటే: ప్రపంచ స్థాయి భాగస్వామ్యాలు: 25 దేశాల నుంచి సుమారు 400కు పైగా ప్రముఖ విమానయాన, రక్షణ సంస్థలు, 1,200 మందికి పైగా ప్రతినిధులు ఈ సదస్సులో పాల్గొంటున్నారు.
MSMEలకు సువర్ణ అవకాశం…: మన దేశంలోని సూక్ష్మ, చిన్న, మధ్య తరహా పరిశ్రమలు (MSMEs) నేరుగా ప్రపంచ దిగ్గజ సంస్థలతో సమావేశమై, సరఫరా ఒప్పందాలు కుదుర్చుకునేందుకు ఇది ఒక గొప్ప వేదిక.
ఆత్మనిర్భర్ భారత్: దేశీయ తయారీ రంగాన్ని బలోపేతం చేయడం, రక్షణ ఉత్పత్తుల్లో స్వావలంబన సాధించడం, ఎగుమతులను పెంచడం వంటి అంశాలు ఈ సదస్సులో ప్రధాన చర్చాంశాలుగా ఉండనున్నాయి.
హైదరాబాద్ ఎలా ఒక “గ్లోబల్ డెస్టినేషన్”గా మారుతోంది?
హైదరాబాద్ కేవలం ఈ సదస్సుకే కాదు, ప్రపంచస్థాయి ఈవెంట్లకు, ఇలాంటి వ్యాపార సదస్సులకు, ప్రదర్శనేలకు ఒక ప్రముఖ కేంద్రంగా ఎదుగుతోంది. ఇందుకు ప్రధాన కారణం ఇక్కడ ఉన్న బలమైన పారిశ్రామిక – పరిశోధనా పర్యావరణ వ్యవస్థ. ఎందుకు హైదరాబాద్ను అంతర్జాతీయ సంస్థలు ఇష్టపడుతున్నాయంటే:
1. బలమైన మౌలిక వసతులు
నగరంలో నాలుగు ప్రత్యేక ఏరోస్పేస్ పార్కులు ఉండటం ఈ రంగానికి కొండంత బలాన్నిస్తోంది. అంతేకాకుండా, డిఆర్డీఓ (DRDO) ప్రయోగశాలలు, ప్రభుత్వ రంగ సంస్థలు, ప్రఖ్యాత విద్యాసంస్థలు ఇక్కడ ఉండటం పరిశోధన, అభివృద్ధికి (R&D) ఎంతో దోహదపడుతున్నాయి.
2. దిగ్గజ కంపెనీల ఉనికి
హైదరాబాద్ ఇప్పటికే బోయింగ్, ఎయిర్బస్, లాక్ హీడ్ మార్టిన్, జిఇ ఏరోస్పేస్, హానీవెల్ వంటి ప్రపంచ ప్రఖ్యాతి గాంచిన సంస్థలకు నిలయంగా మారింది. ఈ కంపెనీల ఉనికి నగరం యొక్క విశ్వసనీయతను అంతర్జాతీయంగా పెంచింది.
3. పారిశ్రామిక పర్యావరణ వ్యవస్థ (Ecosystem)
రాష్ట్రంలో 25కు పైగా ప్రధాన ఏరోస్పేస్, డిఫెన్స్ సంస్థలు, వెయ్యికి పైగా సరఫరా సంస్థలు (Suppliers) ఉండటం వల్ల, ఇక్కడ ఒక పూర్తి స్థాయి సప్లై చైన్ అందుబాటులో ఉంది. విమాన విడిభాగాల తయారీ, నిర్వహణ (MRO), అధునాతన ఇంజినీరింగ్ సేవలకు హైదరాబాద్ ఇప్పుడు కేంద్రంగా గుర్తింపు పొందింది.
4. సహకార వేదికలు
అడ్వాన్స్డ్ బిజినెస్ ఈవెంట్స్ (ABE), బిసిఐ ఏరోస్పేస్ వంటి సంస్థలు తెలంగాణ ప్రభుత్వం, తెలంగాణ రైజింగ్, టిజిబ ఐసి (TGBIC) వంటి సంస్థలతో కలిసి పనిచేయడం వల్ల, ఇలాంటి అంతర్జాతీయ కార్యక్రమాలను నిర్వహించడంలో హైదరాబాద్కు ప్రత్యేక సామర్థ్యం ఉంది.
‘ఏరోమార్ట్ హైదరాబాద్ 2026’ కేవలం ఒక వ్యాపార సమావేశం మాత్రమే కాదు; ఇది తెలంగాణను, తద్వారా భారతదేశాన్ని ప్రపంచ ఏరోస్పేస్ మ్యాప్లో మరింత ఉన్నత స్థానంలో నిలబెట్టే ప్రయత్నం. స్థానిక పరిశ్రమలకు అంతర్జాతీయ మార్కెట్లలో ప్రవేశం కల్పించడంతో పాటు, నగరానికి కొత్త పెట్టుబడులను ఆకర్షించేందుకు ఈ సదస్సు బాటలు వేయనుంది.
Share this Article