హీరో ఎంట్రీ అంత వీజీ కాదు… నెత్తురు పారాలి, దుమ్ము రేగాలి, దేహాలు తెగాలి…

గతంలో ఎన్టీఆర్.. కృష్ణ లాంటి హీరోల ఎంట్రీ కెమెరా యాంగిల్ ముందు కాలి బూటుతో మొదలై తలకు చేరేది !

అభిమాన హీరో ముఖం కనిపించగానే హాలంతా కెవ్వు కేకలు !

ఈమధ్యలో వెనక మైదాన సంగీతం (అదేలేండి ఇప్పుడు బ్యాక్ గ్రౌండ్ మ్యూజిక్ (బీజీఎం) అంటున్నారుగా ) అదరగొట్టేది !

ఆ రోజుల్లో దాదాపు చాలామంది హీరోల ముఖ దర్శనం పాదాలతోనే మొదలయ్యేది !

ముందు పాదపూజ అయితేగానీ సర్వ దర్శనం అయ్యేది కాదు !

సరే ఇప్పుడు తరం మారింది కదా

పద్ధతులు కూడా మారాయి !

ఓ వందమందినో

వెయ్యిమందినో రౌడీలను

హీరో ఆర్టీసీ బస్సు వేసుకునో

లారీ వేసుకునో

పైనుంచి హెలికాఫ్టర్ మీన్నుంచి దూకో

వెండితెరపై ఎంట్రీ ఇస్తాడు !

ముందు మనకి హీరో కనిపించడు !

ఉన్నపళంగా రౌడీలు వన్ బై వన్ గాల్లోకి లేస్తూ కింద పడిపోతారు !

ఏం జరుగుతుందో ఎవరికీ తెలీదు !

అసలు తమ రౌడీలు ఊరికే అలా గాల్లోకి ఎందుకు లేస్తున్నారో అర్థం కాక సహచర రౌడీలు ఎర్ర(ర్రి) ముఖం వేసుకుని గాల్లోకే చూస్తుంటారు !

రౌడీల చేతిలో ఉన్న చైనా మేడు

రష్యా మేడు

ఆయుధాలు కూడా చేష్టలుడిగి గాల్లోకి చూస్తుంటాయ్ !

ఆయుధాలైతే ఎక్కడెక్కడినుంచో ఏరుకుని తెచ్చుకున్నారు కానీ ట్రిగ్గర్ నొక్కటం ఒక్క రౌడీ కొడుక్కి తెలీదు !

సరిగ్గా ఇప్పుడు హీరో గాల్లోనుంచి ఊడి పడతాడు !

ఆ పడే టైములో ఓ ఇరవై డ్రమ్ముల మీద విపరీతంగా బాదేస్తాడు మ్యూజిక్ డైరెక్టర్ (బీజీఎం…బీజీఎం) !

గుండు సూదితో హీరో లైనుగా ఒక్కొక్కడిని గుచ్చుకుంటూ వెళ్ళిపోతాడు !

ఒక డ్యాముకి సరిపడా బ్లడ్డు అక్కడ కాలవై పారుతుంది !

ఇప్పుడు మనకి హీరో ముఖం కనిపిస్తుంది !

అప్పటిదాకా అసలు తమవాళ్ళు అలా గాల్లోకి ఎందుకు లేస్తున్నారో అర్థం కాక బిక్క ముఖం వేసుకున్న రౌడీలతో పాటు మనం కూడా అమ్మయ్య ఇది హీరోగారి పని అని ఎయిర్ పీల్చుకుంటాం !

ఇప్పుడు హీరో గారి పంచ్ డైలాగ్ ఒకటుంటుంది !

రేయ్ చీమ కుడితే చిమచిమలాడుతోంది

దోమ కుడితే రిమరిమలాడుతోంది

నేను కొడితే హోలు బాడీయే పటపటలాడిపోతుంది !

ఇంకేవుంది

చప్పట్లే చప్పట్లు !

నిన్ననే ఓటీటీ లో బోయపాటి వారి స్కంద అనబడే ఓ కళాఖండం చూసా !

అబ్బాబ్బా హీరోకి ఏమి ఎలివేషను..ఏమి ఎలివేషను !

హీరోగారు ఏకంగా స్టెన్ గన్ లతో ఫుల్ సెక్యూరిటీ ఉన్న సీఎం ఇంటికే వెళ్లి చిన్న ఉల్లిపాయ కత్తితో డీజీపీని.. ఎస్పీని బెదిరిస్తూ ( మధ్యలో అడ్డొచ్చాడని ఎస్పీ ని గుచ్చుతాడు కూడా ) సీఎం కూతురిని హెలికాఫ్టర్ లో లేపుకుపోతాడు !

సీఎం ఇంటికి ఓ ఉల్లిపాయ కత్తితో వెళ్లి దర్జాగా ఎవర్నైనా లేపుకురావొచ్చనే కొత్త సంగతి నాకు తెలిసింది !

ఆ మధ్య కేజీఎఫ్ లో కూడా హీరో గారు చిన్న వాన్ వేసుకుని పోలీస్ క్యాంప్ బయట నిదానంగా మెషిన్ గన్ మోపు చేసుకుని దీపావళి టపాసులు కాల్చినట్టు ఓ పావుగంట పేల్చి కాల్చి కాలిన ఆ గొట్టంతోనే సిగరెట్ వెలిగించుకుంటాడు !

ఇది హీరోయిజానికి పరాకాష్ట

ప్రేక్షకుడి సహనానికి’ ఫైర్ ఎగ్ఝామ్ !’

హీరో గారు హీరోయిజం చూపించటంలో తప్పులేదు

అయితే ఆ హీరోయిజం మోతాదు మించితే లిక్కర్ లెక్కన అవుతుంది !

బలహీన ప్రేక్షకుడికి మత్తెక్కువైపోయి చిత్తయిపోతాడు !

తట్టుకోలేడు

సరే ,

ఇవన్నీ దేనికి సూచిక

దర్శకుల పైత్యానికా

మారుతున్న ట్రెండుకా

లేకపోతే జనం అవే కోరుకుంటున్నారా ?…… పరేష్ తుర్లపాటి