సోనియా నారంగ్… సోషల్ ప్రచారంలో నిజాలెన్ని..? అతిశయోక్తులెన్ని..?

సోనియా నారంగ్…: ‘లేడీ సింగం’పై సోషల్ మీడియా సృష్టించిన కట్టుకథలు.. అసలు నిజాలివే! నేటి సోషల్ మీడియా కాలంలో నిజాయితీ గల అధికారుల గురించి కథలు రాయడం ఒక ట్రెండ్. కానీ ఆ ఉత్సాహంలో వాస్తవాలను వదిలేసి, సినిమా స్క్రిప్టులను తలపించేలా అబద్ధాలను అల్లేస్తున్నారు.

2002 బ్యాచ్ కర్ణాటక క్యాడర్ ఐపీఎస్ అధికారిణి సోనియా నారంగ్ గురించి ప్రస్తుతం వైరల్ అవుతున్న పోస్ట్ కూడా సరిగ్గా అలాంటిదే. అందులో ఉన్న అతిశయోక్తులు ఏంటి? అసలు ఆమె వ్యక్తిత్వం ఏంటి? అన్నది ఒకసారి విశ్లేషిస్తే..

ఆ 16 వేల కోట్ల కథ ఏంటి? వైరల్ పోస్ట్‌లో చెప్పినట్లుగా, 2015లో అప్పటి కర్ణాటక ముఖ్యమంత్రి సిద్ధరామయ్య ఆమెపై పగబట్టి 16 వేల కోట్ల అవినీతి కేసు వేశారన్నది పచ్చి అబద్ధం... వాస్తవానికి జరిగింది దీనికి రివర్స్! సోనియా నారంగ్ కర్ణాటక లోకాయుక్తలో ఎస్పీగా ఉన్నప్పుడు, స్వయంగా ఆ సంస్థలోనే జరుగుతున్న భారీ అవినీతి నెట్‌వర్క్‌ గుట్టురట్టు చేశారు.

లోకాయుక్త పేరు చెప్పి అధికారులను బెదిరించి వసూళ్లకు పాల్పడుతున్న ముఠాను ఆమె ధైర్యంగా బయటపెట్టారు. ఆ విచారణ సెగ అప్పటి లోకాయుక్త జస్టిస్ భాస్కర్ రావు కుమారుడి దాకా వెళ్ళింది. ఫలితంగా లోకాయుక్తనే రాజీనామా చేయాల్సి వచ్చింది. అంటే ఆమె అవినీతి చేయలేదు.. అవినీతి తిమింగలాల గుండెల్లో నిద్రపోయింది!

‘లేడీ సింగం’ బిరుదు ఊరికే రాలేదు… ఆమెపై వచ్చిన ప్రచారంలో “ఆమె ఎవరికీ భయపడదు” అన్న మాట మాత్రం అక్షర సత్యం…

• రాజకీయ నాయకుడిపై చేయి…: 2006లో విధులకు ఆటంకం కలిగించినందుకు ఒక శక్తివంతమైన రాజకీయ నాయకుడిని ఆమె బహిరంగంగానే చెంపదెబ్బ కొట్టారు… ఆ ఘటనతోనే ఆమె పేరు రాష్ట్రవ్యాప్తంగా మారుమోగిపోయింది…

• మైనింగ్ మాఫియాపై ఉక్కుపాదం…: కర్ణాటకను గడగడలాడించిన అక్రమ మైనింగ్ కేసుల విచారణలో ఆమె కీలక పాత్ర పోషించారు… ఎవరెంతటి వారైనా సరే ఫైళ్లను వదలని ఆమె నైజం అనేకమంది నేతలకు నిద్ర లేకుండా చేసింది…

పగబట్టిన ముఖ్యమంత్రి.. నిజమేనా? వ్యవస్థలో మార్పు కోసం పోరాడే అధికారులకు బదిలీలు, రాజకీయ ఒత్తిళ్లు సహజం. సోనియా నారంగ్ కూడా అలాంటి ఇబ్బందులు ఎదుర్కొన్నారు. కానీ ముఖ్యమంత్రి స్థాయి వ్యక్తి స్వయంగా వేల కోట్ల కేసు పెట్టారనడం కేవలం పాఠకుల సానుభూతి కోసమో, లేదా రాజకీయ విమర్శల కోసమో సృష్టించిన కల్పిత గాథ మాత్రమే.

ఇప్పుడు ఎక్కడ ఉన్నారు? ఆమె నిజాయితీకి గుర్తింపుగా కేంద్ర ప్రభుత్వం ఆమెను డెప్యుటేషన్‌పై పిలిపించుకుంది. ప్రస్తుతం ఆమె ఎన్‌ఫోర్స్‌మెంట్ డైరెక్టరేట్ (ED) లో అత్యున్నత బాధ్యతలు నిర్వహిస్తున్నారు. దేశవ్యాప్తంగా సంచలనం సృష్టించిన పలు ఆర్థిక నేరాల దర్యాప్తు ఆమె పర్యవేక్షణలోనే జరుగుతున్నాయి.

సోనియా నారంగ్ నిజంగానే ఒక ఇన్పిరేషనల్ ఆఫీసర్. ఆమెకు తన నిజాయితీని నిరూపించుకోవడానికి సోషల్ మీడియా కల్పించే అబద్ధాల తోడ్పాటు అవసరం లేదు. ఆమె చేసిన దర్యాప్తులు, ఆమె పట్టుకున్న అవినీతి తిమింగలాలే ఆమె ధైర్యానికి నిదర్శనం. ఫేక్ న్యూస్‌తో ఆమెను ఒక బాధితురాలిగా చూపడం కంటే, వ్యవస్థను ప్రక్షాళన చేసిన ధీశాలిగా చూడటమే ఆమెకు మనం ఇచ్చే అసలైన గౌరవం.