.
Subramanyam Dogiparthi …. మరో దుష్టశిక్షణ సినిమా ఇది . టైటిల్ ఆయుధం… అయితే ఈ దుష్టశిక్షణ చట్టప్రకారం కలెక్టర్ గారి పాత్రలో కృష్ణ చేసే దుష్టశిక్షణ . సినిమా చూడబుల్ గా ఉండేదానికి ప్రధాన కారణం పరుచూరి బ్రదర్స్ కధ , సంభాషణలు .
1990s లో మద్యపానానికి వ్యతిరేకంగా జనం ఉద్యమాలు చేయటమే కాకుండా ఈనాడు వంటి పత్రికలు , సినిమా మాధ్యమం కూడా బాగా కష్టపడ్డాయి . ఈ సినిమాలో సారాయి కాంట్రాక్టులు , సిండికేట్లు వంటి అంశాలతో పాటు భూకబ్జా మీద కూడా చెణుకులు ఉన్నాయి .
Ads
జిల్లా పరిషత్ చైర్మన్ పాత్రలో సత్యనారాయణ 300 ఎకరాల పోరంబోకు భూమిని కబ్జా చేసి మెడికల్ కాలేజీ కట్టడం , దానిని ఏకరానికి వెయ్యి రూపాయలు కట్టి రెగ్యలరైజ్ చేయించుకోవటం వంటి విషయాల మీద చెణుకులు ఉంటాయి .
ఈ 35 ఏళ్ళలో సమాజం ఆలోచించే విధానంలో మార్పులు చాలా వచ్చాయి . మద్యపానాన్ని పత్రికలు , టివిలు , ప్రభుత్వాలు , మేధావులు తప్పు అనటం మానేసారు . పైగా తప్పేముంది అని కూడా దబాయిస్తున్నారు .
అలాగే భూకబ్జాలు . బడాబాబులు కబ్జాలు చేయటమే కాదు ; డబ్బులు కడుతున్నాం కదా అని కూడా దబాయిస్తున్నారు . కొండొకచో ప్రభుత్వాలే రూపాయికి , పావలాకు సంతర్పణ చేస్తున్నాయి .
ఈ సినిమాలో ఈ రెండు అంశాలూ ఉన్నాయి . ఈ దురాగతాలను ఆపే పాత్రలో కృష్ణ చాలా హుందాగా , ఎనర్జిటిగ్గా నటించారు . చైర్మన్ పెంపుడు రౌడీగా రమేష్ బాబు బాగానే నటించాడు . వీరిద్దరికి జోడీలుగా రాధ , వాణీ విశ్వనాధ్ గ్లామర్ స్పేసుని బ్రహ్మాండంగా ఫిల్ చేసారు . చాదస్తపు , డాబుసరి , ఆశబోతు కలెక్టర్ గారి భార్యగా రాధ ఓ కొత్త పాత్రలో కనిపిస్తుంది .
విలనుగా సత్యనారాయణ ఎడం చేత్తో చేసేసాడు . చైర్మన్ కొడుకుగా , కుర్ర విలనుగా సాయికుమార్ అక్షరాలు దిద్దుకునే స్టేజిలో కనిపిస్తాడు . ఇతర ప్రధాన పాత్రల్లో పి యల్ నారాయణ , సుత్తి వేలు , మాడా , అనిత , అనూరాధ , బట్టల సత్యం , యువశ్రీ తదితరులు నటించారు .
చక్రవర్తి సంగీత దర్శకత్వంలో వేటూరి పాటలను బాలసుబ్రమణ్యం , జానకమ్మ , మనో శ్రావ్యంగా పాడారు . బయట హిట్ కాకపోయినా థియేటర్లలో బాగానే ఉంటాయి . ప్రౌఢ జంట కృష్ణ , రాధల డ్యూయెట్లు కూడా బాగానే ఉంటాయి .
కె మురళీమోహన్ రావు దర్శకత్వంలో 1990 మే నెలలో వచ్చిన ఈ సినిమా యూట్యూబులో ఉంది . కృష్ణ అభిమానులు ఇంతకుముందు చూసి ఉండకపోతో ట్రై చేయొచ్చు . చూడబులే .It’s a Krishna-mark action movie.
నేను పరిచయం చేస్తున్న 1236 వ సినిమా. #తెలుగు_సినిమాల_సింహావలోకనం #సినిమా_స్కూల్ #సినిమా_కబుర్లు (ఆయుధం అనే టైటిల్తో తరువాత కాలంలో రాజశేఖర్ హీరోగా కూడా ఓ సినిమా వచ్చింది)…
Share this Article