.
Subramanyam Dogiparthi …. బాలకృష్ణ- విజయశాంతి కాంబో జైత్రయాత్రలో సూపర్ డూపర్ సినిమా 1990 డిసెంబర్లో వచ్చిన ఈ లారీ డ్రైవర్ . తరచూ ఏదో ఒక టివి చానల్లో వస్తూనే ఉంటుంది . వచ్చిన ప్రతీ సారి కట్టిపడేస్తుంది . సినిమా అంతా చూస్తుంటాను . మొత్తం సినిమాలో ఎక్కడా ఓ అయిదు నిమిషాలు కూడా బోరించకుండా దడదడా లాక్కెళ్ళిపోతూ ఉంటుంది .
ఇంత బిర్రయిన కధను , స్క్రీన్ ప్లేని తయారు చేసిన రచయిత ఆంజనేయ పుష్పానందుని (పుష్ప ప్రసాద్) మెచ్చుకోవాలి . ఆ కధకు దీటుగా పరుచూరి బ్రదర్స్ డైలాగులను సంధించారు . హాస్య సన్నివేశాల్లో డైలాగులు ఇంకా సరదాగా , ఆహ్లాదకరంగా ఉంటాయి .
Ads
గుడివాడ రౌడీని కాదు . అచ్చు తప్పు . గుడివాడ రాయుడు అనలేక గుడివాడ రౌడీ అంటారు అనే విలన్ మోహన్ రాజ్ డైలాగ్ వీర పాపులర్ . ఇంక బాలకృష్ణ డైలాగుల గురించి చెప్పేదేముంది ! బాలకృష్ణ కూడా వీర , రౌద్ర , ప్రేమ , శృంగార రసాలను జోరుగా కురిపించారు .
విజయశాంతితో డ్యూయెట్లు , గ్రూప్ డాన్సులు అదిరిపోతాయి . బోరింగు పాప జయలలితతో డ్యూయట్ ఎంత హాటుగా ఉంటుందంటే ఏదయినా పొరపాటు జరిగిపోతుందా వెండితెరపై అని భయమేస్తుంది . నృత్య దర్శకులు సుందరం , ప్రభు , రఘురాం , తార బ్రహ్మాండంగా కంపోజ్ చేసారు . సినిమా విజయానికి బాగా దోహదపడ్డాయి . ప్రభు అంటే ప్రభుదేవానా !
బాలకృష్ణ- విజయశాంతి జోడీ ,శారద- విజయకుమార్ జోడీ , వాళ్ళ నటన , కెమిస్ట్రీ అద్భుతంగా ఉంటాయి . బాలకృష్ణ , విజయశాంతి పెళ్ళిచూపుల్లో శారద , విజయకుమార్ చెరొక వైపు చేరి ప్రేక్షకులను రంజింపచేస్తారు .
పరుచూరి బ్రదర్స్ లెవెల్లో ఉంటుంది ఓ సీన్ . కలెక్టర్ శారదని గుడివాడ రౌడీ చెంపదెబ్బ కొట్టి అవమానించే సీన్ . ఈ సీన్లో , శారద కుటుంబానికి ఆసరాగా నిలబడే ప్రతి సీన్లో బాలకృష్ణ , అతనితో పాటు విజయశాంతి ప్రేక్షకరంజకంగా నటించారు .
విజయశాంతి సోడా బుడ్లు వేయటం , రౌడీయిజం చేయటం , బాలకృష్ణ కనపడగానే ఐస్ లాగా కరిగిపోవటం , డిఫరెంట్ షేడ్లను అద్భుతంగా చూపింది . వీరి తర్వాత మెచ్చుకోవలసిన పాత్ర రావు గోపాలరావుది . గొప్ప పాత్ర . క్లైమాక్సులో అవినీతిపరుడైన పోలీస్ ఇనస్పెక్టర్ కొడుకునే చంపేసే పాత్ర .
విలన్లుగా రాజా కృష్ణమూర్తి (కిట్టీ) , బాబూమోహన్ , బాబ్ ఏంధొనీ , మోహన్ రాజ్ , తనికెళ్ళ భరణి గొప్పగా నటించారు . ఇంకా నూతన్ ప్రసాద్ , రాళ్ళపల్లి , జయప్రకాష్ రెడ్డి , వినోద్ తదితరులు నటించారు.
చక్రవర్తి సంగీత దర్శకత్వంలో సిరివెన్నెల వారు , జొన్నవిత్తుల వారు వ్రాసిన పాటలను బాలసుబ్రమణ్యం , జానకమ్మ , చిత్ర బాగా పాడారు . బాగా హిట్టయ్యాయి కూడా . బాలయ్యా బాలయ్యా గుండెల్లో గోలయ్యా , మావా మంచమెక్కు చేస్తా కనువిందు , జింగు జింగు చీరె కోణంగి కొంగు జార డ్యూయెట్లు విజయశాంతి , బాలకృష్ణ మీద రంజుగా ఉంటాయి .
దసరా వచ్చిందయ్యా సరదా తెచ్చిందయ్యా , కన్నె చిలకా నిన్ను కొరక అంటూ సాగే రెండు గ్రూప్ డాన్సులు బాగుంటాయి . బాలకృష్ణ , మా గుంటూరు జయలలితపై అబ్బ నీ పట్టెంత గట్టిదయ్య హాట్ సాంగ్ గురించి ఆల్రెడీ చెప్పేసా .
రావు గోపాలరావు స్వంత సినిమా అయిన ఈ లారీడ్రైవర్ బి గోపాల్ దర్శకత్వంలో నిర్మించబడింది . ఈ సూపర్ హిట్ సినిమా యూట్యూబులో ఉంది . చూడనివారు ఎవరయినా ఉంటే చూసేయండి . It’s a wonderful , feel good entertainer .
బాలకృష్ణ , విజయశాంతి , మా గుంటూరు జయలలితల అభిమానులు మళ్ళా మళ్ళా కూడా చూడొచ్చు .
#తెలుగుసినిమాలసింహావలోకనం #సినిమా_కబుర్లు #సినిమా_స్కూల్
Share this Article