నువ్వు ‘మగాడివిరా’ బుజ్జీ..! అందరి మనసులూ గెలుచుకున్నావ్..!!

.

నిజంగానే… సినిమా కథలను మించిన అద్భుతమైన ట్విస్ట్ ఇది! కాలం ఎప్పుడు ఏ మలుపు తిరుగుతుందో, పంతాలు- పట్టింపుల మధ్య నలిగిపోయిన బంధాలు ఏ క్షణంలో మళ్లీ ఒక్కటవుతాయో ఎవరూ ఊహించలేరు. ఒకరి ముఖం ఒకరు చూసుకోవడానికి కూడా ఇష్టపడని ఇద్దరు వ్యక్తులను, ఒకే ఒక్క సంఘటన మళ్లీ జీవితాంతం కలిసి నడిచేలా చేసింది.

ఈ హృదయ విదారక, అదే సమయంలో ఎంతో స్ఫూర్తిదాయకమైన కథనం ఇదీ …  వరకట్నం కేసు నుండి వైవాహిక బంధం దాకా…: మనసులను కరిగించిన శిఖ, సౌరభ్‌ల నిజ జీవిత సినిమా!

అహాలు, కోపాలు, కోర్టుల చుట్టూ తిరిగే కేసులు… నేటి తరం దాంపత్య జీవితాల్లో ఇవి చాలా సర్వసాధారణం అయిపోయాయి. చిన్న చిన్న మనస్పర్థలకే విడాకుల దాకా వెళ్తూ, పచ్చని సంసారాలను ముక్కలు చేసుకుంటున్న జంటలు ఎందరో.

కానీ, లాయర్ల ఫీజులు, కోర్టు వాయిదాల మధ్య నలిగిపోయిన ఒక బంధం… మరణం అంచుల్లోంచి ఒకరి ప్రాణాన్ని కాపాడే క్రమంలో ఎలా మళ్లీ చిగురించిందో తెలియజేసే సంఘటన ఇది. ఢిల్లీకి చెందిన శిఖ, సౌరభ్‌ల కథ ఇప్పుడు సోషల్ మీడియాలో వైరల్ అవ్వడమే కాదు, విడిపోవాలనుకునే ఎందరో జంటల కళ్లు తెరిపిస్తోంది.

వివాహం… వివాదం… కోర్టు మెట్లు! కథలోకి వెళ్తే… ఢిల్లీకి చెందిన శిఖ సింగ్, సౌరభ్‌ల వివాహం 2020లో ఎన్నో ఆశలతో జరిగింది. కానీ, విధి ఆడిన వింత నాటకంలో పెళ్లైన కొద్దిరోజులకే వీరి మధ్య గొడవలు మొదలయ్యాయి. అవి కాస్తా ముదిరి కోర్టు దాకా వెళ్లాయి. భర్తపై శిఖ వరకట్నం కేసు పెట్టడంతో ఇరు కుటుంబాల మధ్య దూరం పెరిగింది. ఈ కేసు, కోర్టుల చుట్టూ తిరగడం ఒక సాధారణ మిడిల్ క్లాస్ తండ్రికి ఎంత భారంగా మారుతుందో ప్రత్యేకంగా చెప్పక్కర్లేదు.

కూతురు కాపురం చెడిపోతోందనే బాధ ఒకవైపు, కోర్టు ఖర్చులు, లాయర్ల ఫీజుల భారం మరోవైపు శిఖ తండ్రిని కోలుకోలేని దెబ్బ తీశాయి. తన దగ్గరున్న డబ్బంతా ఈ కేసులకే ఖర్చయిపోయింది. మానసిక ఒత్తిడి, ఆర్థిక ఇబ్బందుల వల్ల ఆయన ఆరోగ్యం క్షీణించింది. చివరికి సొంతంగా చికిత్స చేయించుకోవడానికి కూడా రూపాయి లేని పరిస్థితి దాపురించింది.

ప్రాణం నిలిపిన ‘శత్రువు’… ఒకరోజు తీవ్రమైన గుండెపోటు రావడంతో శిఖ తండ్రిని అత్యవసర స్థితిలో ఒక ప్రభుత్వ ఆసుపత్రిలో చేర్పించారు. ప్రైవేట్ హాస్పిటల్‌కు తీసుకెళ్లే స్తోమత లేక, అక్కడ తండ్రి బతుకుతాడో లేదో తెలియని పరిస్థితిలో శిఖ కన్నీరుమున్నీరుగా విలపిస్తోంది. సరిగ్గా అదే సమయంలో కథలోకి ‘హీరో’ ఎంట్రీ ఇచ్చాడు.

తన మామ గారి పరిస్థితి గురించి తెలియగానే, పాత పగలు, కోర్టు కేసులు, ఇగోలు అన్నింటినీ పక్కన పెట్టేసి సౌరభ్ వెంటనే ఆ ప్రభుత్వ ఆసుపత్రికి చేరుకున్నాడు. క్షణం కూడా ఆలస్యం చేయకుండా, ఆయనను గుర్గావ్‌లోని అత్యంత ప్రతిష్టాత్మకమైన ‘మేదాంత గ్రూప్’ ఆసుపత్రికి తరలించాడు. స్వయంగా దగ్గరుండి, భారీ ఖర్చును భరించి వైద్యం చేయించాడు. సౌరభ్ చూపిన ఆ ఉదారత, సమయస్ఫూర్తి వల్ల శిఖ తండ్రి పూర్తిగా కోలుకుని, మళ్లీ ఆరోగ్యంగా ఇంటికి తిరిగొచ్చారు.

కోర్టు హాల్‌లో కన్నీటి క్లైమాక్స్! … ఈ ఘటన తర్వాత ఢిల్లీ కోర్టులో వీరి విడాకుల కేసు తదుపరి విచారణకు వచ్చింది. శిఖ కోర్టు హాల్‌లోకి అడుగుపెట్టింది. కానీ ఈసారి ఆమె మనసులో కోపం లేదు, కళ్లలో పంతం లేదు… కేవలం తన తండ్రికి పునర్జన్మ నిచ్చిన భర్తపై అపారమైన కృతజ్ఞత, ప్రేమ మాత్రమే ఉన్నాయి.

అందరూ చూస్తుండగానే, జడ్జి ముందే విడాకుల కాగితాలన్నింటినీ ముక్కలు ముక్కలుగా చింపేసింది! ఎదురుగా ఉన్న భర్త సౌరభ్‌ను గట్టిగా కౌగిలించుకుని, చిన్నపిల్లలా ఏడ్చేసింది. ఈ ఊహించని దృశ్యాన్ని చూసి కోర్టు హాల్‌లోని వారంతా ఒక్కసారిగా భావోద్వేగానికి గురయ్యారు. ఎవరో సెల్‌ఫోన్‌లో తీసిన ఈ చిన్న వీడియో క్లిప్ ఇప్పుడు ఇంటర్నెట్‌ను షేక్ చేస్తోంది.

https://www.facebook.com/reel/27397459359937473

అవును, బంధాలు విడిపోవడానికి ఒక్క చిన్న కారణం చాలు… కానీ కలిసి ఉండటానికి ‘ప్రేమ, మానవత్వం’ ఉంటే చాలని ఈ జంట నిరూపించింది. ఇగోల కోసం కోర్టుల చుట్టూ తిరుగుతూ జీవితాలను నాశనం చేసుకునే వారికి శిఖ- సౌరభ్‌ల కథ ఒక అద్భుతమైన సందేశం!